Nuk i japim territor Kosovës, Darmanoviç: Jemi kundër Mini Shengenit!
Ministri i Jashtëm i Malit të Zi, Srgjan Darmanoviç, tha se nuk ka marrë pjesë në asnjë lloj negociate për ti dhënë territor ndonjërit prej shteteve fqinje ndërsa sqaroi se pse Mali i Zi është kundër “Mini Shengenit Ballkanik” të inicuar nga Aleksandar Vuçiç dhe Edi Rama.
Deputeti i Frontit Demokratik, DF, Millun Zogoviç, tha sot në parlament se procesi i përckatimit të kufirit me Kosovën nuk ka përfunduar
“Pala jonë e ka lënë të hapur mundësinë për heqje dorë nga Marrëveshja për përcaktimin e kufirit me Kosovën, edhe pse është ratifikuar,” tha Zogoviç dhe duke ju referuar deklaratave të politikanëve kosovarë ai tha se Marrëveshja nuk do të respektohet dhe se do të ketë ndryshim të kufijve.
Duke ju përgjigjur akuzave të Frontit Demokratik, DF, Darmanoviç tha se negociata të tilla nuk janë zhvilluar kurrë ndërsa shtoi se Mali i Zi ka marrëdhënie të mira me Kosovën, të cilat, tha ai, bazohen në parimet e mirëbesimit dhe perspektivën e përbashkët evropiane. Ai rikujtoi se Marrëveshja për përcaktimin e kufirit me Kosovën është në fuqi nga qershori i vitit 2018.
“Përcaktimi i kufirit shtetëror mund të bëhet vetëm duke u bazuar në Marrëveshjen e ratifikuar,” tha Dermanoviç ndërsa iu përgjigj edhe akuzave të Zogoviçit se bashkëpunon me shërbimet e huaja sekrete, përkatësisht CIA-n amerikane:
”Kurrë nuk kam pasur kontake me asnjë shërbim të huaj sekret, kështu që nuk kam se çfarë të shtoj, kjo është e vërteta e vetme,” tha Darmanoviç.
Në fund, Ministri i Jashtëm I Malit të Zi, Srgjan Darmanoviç, sqaroi se “Mini Shengeni” është inicuar në mungesë të çeljes së negociatave me Shqipërinë dhe Maqedoninë e Veriut, por ai ishte i prerë se Mali i Zi nuk do të ketë alternativa në procesin e integrimeve evropiane. “Nuk kemi modele alternative për ndërtimin e shoqërisë tonë, dhe as sisteme alternative të vlerave përballë atyre për të cilat angazhohemi,” tha Darmanoviç duke i mbyllur derën aventurave të Presidentit të Serbisë, Aleksandar Vuçiç dhe Kryeministrit të Shqipërisë, Edi Rama të cilët gënjyen qytetarët e tyre, se shtetet të cilët nuk ishin në takimin e Novi Sadit do të bashkohen në takimin e Ohrit më 9 Nëntor ose atë të Tiranës, data e të cilit do të vendoset në Ohër.
