Numri i ri i revistës “Arkivat Shqiptare”
Bashkëpunimi tashmë traditë në mes Drejtorisë së Përgjithshme të Arkivave dhe Agjencisë Shtetërore të Arkivave të Kosovës u kurorëzua me numrin e radhës të revistës “Arkivat Shqiptare” me ç’rast krerët e këtyre dy institucioneve, Prof.Asoc.Dr. Ardit Bido dhe Mr.Sc. Bedri Zyberaj, shprehën dhe vullnetin për ndërveprim të mëtejshëm të dy arkivave simotra.
“Kemi kënaqësinë që fundin e këtij viti ta kurorëzojmë me bashkëpunimin e sjellë në traditë tashmë mes Drejtorisë së Përgjithshme të Arkivave dhe Agjencisë Shtetëore të Arkivave të Kosovës, revistën ‘Arkivat Shqiptare’. Ky botim yni i përbashkët për vitin e pestë radhazi, me origjinë në botimet e vazhdueshme të institucioneve tona përgjatë 57 vjetëve, është i vetmi në fushën e arkivave në mbarë trojet shqiptare. Kam kënqësinë që edhe sivjet është në treg, në mënyrë që çdo arkivist, çdokush që ka dëshirë, interes apo pasion arkivistikën si shkencë më vete, të palidhur me historinë apo shkenca të tjera të përafërta, të mund të marrë risitë në këtë fushë, trajnimin e nevojshëm, duke lëvruar bashkarisht, të pandarë, pa kufij, shkencën tonë të përbashkët në gjuhën shqipe, pavërësisht se jemi dy shtete të ndryshme,” tha Drejtori i DPA, Ardit Bido, ndërsa Kryeshefi i ASHAK, Bedri Zyberaj, vlerësoi se në sajë të bashkëpunimit ndërinstitucional, publikimi i revistës arkivore ka shënuar një rritje të standartit dhe të cilësisë të problematikave të trajtura nga ekspertët dhe studiuesit e arkivave të vendeve shqipfolëse dhe të arkivave të rajonit.
“Kënaqësi e veçantë për mua që sot marr pjesë në këtë aktivitet për përurimin e revistës arkivore, fryt i punës sonë të përbashkët. Ky numër i ri është pak më i veçantë, sepse ka shënuar një standart tjetër, duke siguruar që materialet t’i shmangen konceptit historik dhe revista të merret me problematika që kanë të bëjnë me arkivistikën në përgjithësi dhe arkivat tona në veçanti,” tha Bedri Zyberaj.
Ndryshe, synimi i revistës “Arkivat Shqiptare” është të bëjë bashkë periodikisht hulumtues të fushës përkatëse, për të shqyrtuar problematikat, metodologjinë e studimit, digjitalizimin dhe përmirësimin e infrastrukturës së përmbajtjes, inovacionit, si edhe vizionin e punës së arkivave në realitetin e sotëm.
