Nxënësi i Sri Chinmoy në Athinë!
nga Agim Popoci
Ligjërimi i Kryeminisrtit Edi Rama në Athinë fillimisht i ngjante një nxënësi të Sri Chinmoy i cili kishte ndryshuar jetën e vetë përmes leksioneve të këtij filozofi të njohur amerikan, aq më shumë që është dhe piktor i njohur!
Por, jo, ligjëruesi i njohur amerikan i Harvardit, Cambridge, Princeton, Yale dhe Oxfordit nuk qenka djersitur për fat, ishte një mashtrim i perceptimit që mund të krijoi edhe një manipulues klasi si Kryeministri i Shqipërisë të cilin për pak sekonda e tradhton gjuha, dhe shihet qartë se nuk është ai njeriu që angazhohet për paqe, harmoni dhe unitet mes njerëzve, qoftë edhe për një event patriotik në Athinë, dhe shumë larg përkushtimit të Sri Chinmoy!
Dhe, njeriu që vetëm pesë ditë më parë e pranoi para Grupit Parlamentar të Partisë Socaliste në Tiranë, se përgjegjësia e tij si Kryeministër i Shqipërisë shkon deri te kujdesi për djalin e vogël në ndonjë shkëmb të lartë mbi det kur do të hidhet, por, jo dhe vjedhjen e buxhetit të shtetit nga ministrat e qeverisë që ai drejton, më 12 Maj para shqiptarëve në Athinë tregoi se kishte shumë më shumë përgjegjësi për të drejtat që do ti gëzojnë shqiptarët në Greqi.
Duke i cilësuar si të zotët e barabartë të kësaj shtëpie, fillimisht u tha shqiptarëve të shkretë që kishin ardhur ta dëgjojnë Kryeministrin si nga Athina ashtu dhe Bilishti e Mallakastra, Tepelena e Roskoveci, se kishte ardhur të flas me qytetarët e barasvlershëm të Greqisë demokratike, ku shqiptarët nuk janë më të ardhurit e leckosur nga malet apo barbarët e dyndur nga detet, po janë përfaqësuesit e një vendi krenar që është Shqipëria jonë!
Nuancat kuq e zi ndoshta mund ta kenë mpirë trurin e çdo shqiptari që po e ndiqte, por këto fjalë dilnin nga goja e njeriut i cili u fut në politikë dhe mori vota nga komunistët për të ardhur në krye të Bashkisë Tiranë, duke akuzuar tropojanët dhe kuksianët si malokë që shkatërruan kryeqytetin, dhe në emër të pushtetit të Saliut i mori me radhë deri sa u bë Kryeministër; Dhe, kurrë nuk i trajtoi jo si qytetarë të barabartë të kryeqytetit që drejtonte, por, as si pronar të shtëpisë së tyre që e kishin ndërtuar me shumë mund e djersë! Vendimtare, fatkeqësishst bash vendimtare ishte dhe është nëse janë të ardhurit e leckosur nga malet apo barbarët e dyndur nga malet e Saliut, për të mos gëzuar të drejtat elementare duke filluar nga shtatori i vitit 2013 kur erdhi në pushtet!
Pavarësisht se në fjalimin e tij johuman të bojatisur kuq e zi ndërsa foli për një program të veçantë për emigrantët shqiptarë që duan të investojnë kursimet e tyre në fshatra dhe zona malore të Shqipërisë për t’i kthyer në shtëpi, mori si shembull Thethin dhe Valbonën, ku me kursimet e punës në emigracion shqiptarët janë kthyer nga mërgimi dhe kanë hapur agroturizma dhe bujtina që sot janë plot me turistë; Pavarësisht, sepse urrejtjen e tij ndaj këtyre zonave e shpreh edhe sot kur investon nga buxheti i shtetit, ku nga 158 milionë euro që ndanë për 12 bashkitë e mëdha, vetëm 9.3 milionë euro i jep për katër komunat në veri ndonëse janë më të varfrat: Shkodër, Kukës, Dibër dhe Lezhë!
Ky heretik, emri i të cilit u lakua për fe vetëm kur u akuzua se ka vjedhur dhe shitë ikona, para administratës nga Shqipëria dhe ca emigrantëve shqiptarë në Greqi, tha se kurrë, asnjëherë, në asnjë rast, grekëve etnikë nuk iu është mohuar arbitrarisht nga shteti shqiptar e drejta e tyre e besimit, gjuhës, pronës dhe votës!
Përkundër duartrokitjeve nga shqiptarët prezentë në sallë dhe reagimeve që erdhën nga minoritarët, këta të fundit dhe vetë Athina zyrtare nuk kanë vend për shqetësim sepse këtë të drejtë nuk e kanë as shqiptarët rezidentë, e largqoftë ata që vinë nga Kosova, Lugina, Mali i Zi ose Maqedonia e Veriut!
E Kryeministri që ka përgjegjësi vetëm për Zahon në ndonjë shkëmb të lartë mbi det kur do të hidhet, u tha të pranishmëve se beson që kompleksiteti i marrëdhënieve Shqipëri-Greqi nuk mund të jetë kurrsesi një shtysë për tu mbytur në çdo lugë uji që sjell përditshmëria e politikës në oborrin e bashkëjetesës sonë! Por, e kujt është luga, kush, pse dhe me çka e mbushi, nuk e tha Edi Rama ndonëse shqiptarët që jetojnë në këtë tokë, janë dëshmitarë jo vetëm të politikës greke ndër vite e shekuj, por edhe të asaj që prodhon ky patriot i madh që buroi nga llumi dhe nuk ia doli dot të largohet!
Gjithsesi, Kryeministri i Zahos u kujdes t’ju rikujtoi poshtërimin e fshesave të zeza të fundshekullit XX që përjetuan, kur i shkulnin nga shtëpitë me rrobat e trupit nëpër natë për t’i deportuar në Shqipëri, siç, tha, si në një film i ri i një kohë shumë të vjetër të shpërnguljeve me dhunë të paraardhësve tanë nga shtëpitë e tyre në veriun e Greqisë.
Çamëria, po, por nuk e zuri dot në gojë edhe pse na u shit si patriot i madh në një sallë kuq e zi, por shqiptarët e kanë parasysh dhe nuk harrojnë dot, ndonëse për t’ju riprodhuar realitetin u kujdes regjimi i Edi Ramës me regjisorin e filmit “5D”, Lali Eri, për të parë në kryeqytet se si i ligu mund të shkul nga shtëpia me rrobat e trupit nëpër natë edhe shqiptarët sepse pesë drejtorë të Bashkisë Tiranë kanë marrë për detyrë të përfitojnë miliona euro për hajdutët socialistë!
Sërish një skenë krimi greke që iu rikujtoi Edi Rama shqiptarëve në Greqi, ku fëmijët mbyteshin në lot se kishin dalë më të mirët në shkollë, por nuk iu dha e drejta e ceremonisë së flamurit sepse kishin ardhur nga foleja e shqipes dykrenare dhe nuk kishin lindur nën mbrojtjen e kryqit të bardhë! Makabritet i gjallë, sa nuk ka imagjinatë kriminale që mund ta riprodhoi nëse nuk do të ekzistonte koka e Edi Ramës dhe shqiptarët nga Kosova të lindur për të vuajtur edhe në Tiranë; Del ekselent në bachelor, del edhe në TV me këtë Kryeministër shqiptar që akuzon grekët, dhe nuk regjistrohesh dot po në atë fakultet në master sepse kuota 1 është plotësuar, dhe nuk e vretë kush mendjen se është fjala për student që e kanë zënë ose e kanë blerë vendin e ekselentit; Arsyeja është madhore për të mos u shqetësuar: Shqiptar nga Kosova! Mbytje në lot shumë më e dhimbshme sepse je shqiptar dhe as shqipja dykrenare në Tiranë nuk të ndihmon, madje të shtyp kokën nga frika se mund të shpëtosh dhe s’ka universitet evropian që nuk të pranon!
Në Athinë shqiptarët dëgjuan edhe një marrëzi që e kishin dëgjuar nga ca sharlatanë që i vizitonin për të vjedhur fonde për botim librash, se ata erdhën, luftuan, fituan, dhe nuk duhet harruar kurrë se me ligj dhe me zakon, Greqia është sot edhe e tyre po aq sa është e vetë grekëve, pa e menduar se këtë do ta dëgjojnë edhe nga Kryeministri i vendit të tyre!
Duke pasur parasysh logjikën e tij dhe administratës që drejton, çfarë u duhet thënë shqiptarëve që vinë nga zonat mbi Fushë Krujë dhe jetojnë në Tiranë, dhe asgjë nuk gëzojnë nga këto dokrra që flet Edi Rama; Apo, shqiptarët në veri të Kosovës, ata në Luginën e Preshevës dhe në Maqedoninë e Veriut, ku vendos vetëm shkau dhe Edi Rama hesht!
Pa dashje, i ekzaltuar nga salla e mbushur kuq e zi me të cilën po i tregonte dhëmbët Mitsotakisit që është në kohë fushate zgjedhore greke, tregoi se ishte i ndërgjegjshëm për ekzistimin e kapadaillëkut ballkanik të tipit “Kush jemi ne, kush jeni ju”, që është një hap, siç tha, larg rënies në gropën e primitivizmit nacionalist; Por, është e çuditshme se ndërsa fletë për pasojat në mes të shqiptarëve dhe grekëve, në ligjërimin politik në Shqipëri ai si kryesocialist vazhdimisht ndjellë konflikt me demokratët, për të na çuar drejtë kësaj humnere, pikërisht duke thënë NE dhe ATA!
Por, Edi Rama nuk ngopet me prodhim dhe riprodhim tmerri në sytë e atyre që ndjeshmërinë e kanë ekstreme ndaj gjithë mizorive greke. Është e paimagjinueshme në një sallë stadiumi të mbushur me mijëra militantë socialistë shqiptarë Kryeministri të shprehë shqetësimin për Ligjin e Luftës, dhe prej vitit 2013 e deri më sot as L nga Ligji i Luftës të mos i dal nga goja në takimet zyrtare!
Por, ky është Edi Rama, dhe prapa tij vjen vetëm marrëzia! E për të treguar se sa shumë tallet me këtë çështje, nxjerrë nga goja një gënjeshtër edhe më makabre, se ai na paska hapur dialogun dypalësh në nivel teknik për lejet e qëndrimit dhe procedurën e marrjes të shtetësisë me natyralizim! Si mund të bëjë dialog një shtet për të ndryshuar Kushtetutën e shtetit tjetër, i cili ndryshe nga ai i Edi Ramës, funksionon; Dhe, nëse na qenka kaq e lehtë, pse vuajnë shqiptarët e Kosovës kaq shumë dhe dekretet për shtetësi në Shqipëri janë të mbushura më shumë me rus, kinez e së fundi edhe ukrainas se me shqiptarë jashtë Shqipërisë!
Normal që duartrokitjet nuk munguan edhe në rastin kur e quajti si fitore arritjen e çeljes së negociatave në nivel ekspertësh për marrëveshjen e pensioneve me Greqinë sepse deri dje ai nuk shikonte asnjë dritë në fund të tuneli. Që ka vështirësi nuk mund të dyshoj njeri, ashtu siç nuk mund të dyshojë askush që gjërat të tilla nuk trajtohen në salla të mbushura me militantë të ekzaltuar nga shpërblimi për mitingun që do marrin nga partia; E për ata që ishin të shqetësuar nga gjithë ato duartrokitje që dëgjuan, duhet të qetësohen ashtu si dhe Edi Rama me këtë kategori mbështetësish para të cilëve u zotua se nuk do të vjedhë pas shpine, pra, hapur!
Pikërisht, siç bënë me votat e tyre në atdhe dhe sot nuk i zuri në gojë fare, ashtu si dhe votimin e diasporës!
Në fund, për të gjithë ata që trurin e kanë të kuq ose blu, dhe janë të bindur se ky takim në Athinë nuk kishte se si të dilte ndryshe, situata nuk është e pashpresë. Është piktori dhe filozofi Sri Chinmoy që i jep rrugëzgjidhje këtij të paudhi që për taksiratin tonë u bë Kryeministër i Shqipërisë duke dëgjuar taksistin, vazhdoi me Batonin dhe përfundoi te këshillat e Mamicës:
“Dje isha i zgjuar. Për këtë arsye dëshiroja ta ndryshoja botën. Sot jam i mençur. Për këtë arsye do të ndryshoj vetëm veten!”
