Operacioni Itali-Shqipëri, Drejtuesi i SPAK: Do të hetojmë autoritetet shtetërore që lejuan grupin kriminal

Pas sekuestrimit të 3.5 tonë drogë me vlerë 40 milionë euro dhe arrestimit të 37 personave në Itali dhe Shqipëri, Drejtuesi i Prokurorisë së Posaçme, Arben Kraja, duke marrë pjesë në konferencën online të Anti- Mafias italiane sqaroi se SPAK nuk është kufizuar vetëm në urdhër-arreste por edhe në akuzat për pastrim të produkteve të veprës penale duke kryer edhe sekuestrime ndaj këtij grupi kriminal në Shqipëri.

SPAK, tha Kraja, do të hetojë për autoritetet që e lejuan këtë grup kriminal dhe e favorizuan që të trafikonte drogë duke çuar para përgjegjësisë penale këdo që është i përfshirë.

”Sot jemi konkretë në operacionin që kemi realizuar. Skuadrat e përbashkëta hetimore janë përgjigjia më efektive që mund t’i jepet krimit të organizuar që funksionon në rrafshin nëdrkombëtar.

Ajo që dua të them është që operacioni ishte  i suksesshëm. Koordinim perfekt, strukturave policore shqiptare dhe prokurorive shqiptare e italiane.

E reja që kemi thënë është që nuk jemi kufizuar vetëm tek arrestimi i personave përgjegjës, por kemi ngritur edhe akuza për pastrim të produkteve të veprës penale dhe kemi sekuestruar produkte të veprës penale.

Jemi të vendosur dhe dua të garantoj, që edhe ekipet e përbashkëta të vijojmë me të njëjtin seriozitet deri në përfundimin e hetimeve,” tha Drejtuesi i Prokurorisë së Posaçme, Arben Kraja, duke përfunduar:

“Do të vazhdojmë të hetojmë deri në detaje për përgjegjësitë e autoriteteve shtetërore që kanë lejuar trafikon e drogës nga grupi kriminal. Kushdo që të jetë i përfshirë, do dërgohet para përgjegjësisë penale. Ju falënderoj dhe besoj tek bashkëpunimi jonë i matëjeshëm.”