Opozitë Teknike!
nga Agim Popoci
Kërkesa e opozitës për Qeveri Teknike në prag të zgjedhjeve parlamentare të vitit 2025, për të garantuar një kontroll për zgjedhje të lira dhe të ndershme, nga shumë aktor politik u shikua me skepticizëm për shkak të përvojës së shëmtuar të Partisë Demokratike kur drejtohej nga Zotni Lafsha, por, siç duket, nga Kryeministri Edi Rama u studiua me përulje kriminale!
Nuk dihet se sa do ti shërbente një Qeveri Teknike qëllimeve të Partisë Demokratike, ose, sa do dëmtonte Partinë Socialiste në synimet e saj, sikur një qeveri e tillë do të krijohej si rezultat i një presioni ndërkombëtar, por deri tek ky synim opozitar Edi Rama bëri një hap para duke filluar me krijimin e Opozitës Teknike me qëllim të garantimit të fitores pavarësisht zhvillimit të akteve politike deri në ditën e gjykimit!
Ndryshimi i Rregullores për funksionimin e Parlamentit sipas orekseve të Edi Ramës ishte akti i parë për krijimin e Opozitës Teknike me mundësi të përjashtimit të deputetëve liderë opozitarë nga punimet e parlamentit deri në 60 ditë, sa herë që opozita arrin të tejkalon parashikimet e Sigurimit të Shtetit dhe unifikon qëndrimin!
Vënia e SPAK-ut në lëvizje për të arrestuar dy liderët e opozitës, Sali Berisha dhe Ilir Meta, duke lënë në duart e Sekretarëve të Përgjithshëm, si Partinë Demokratike ashtu dhe Partinë e Lirisë, përveç se akti i dytë i Edi Ramës në realizimin e projektit të fitores elektorale të radhës, Opozitë Teknike, dëshmoi me mungesën e reagimit të çastit në të dy ratstet e arrestimit të liderëve opozitarë, se opozita nuk është as e mirëorganizuar dhe as e mobilizuar në luftën kundër regjimit të Edi Ramës!
Dhe, akti i tretë, besimi i plotë i Edi Ramës në suksesin e realizimit të projektit, Opozitë Teknike, duke projektuar dhe formatimin e opozitës me krijimin e partive të reja opozitare me Adriatik Lapajn, Agron Shehajn dhe Agron Kapllanajn, tregon preokupimin serioz që ka Kryeministri i Shkodrës, Himarës dhe gjithë Shqipërisë!
T’i kërkosh zgjedhje të lira dhe të ndershme me Qeveri Teknike një lideri politik si Edi Rama, i cili nga viti 2003 ka korrur gjithë ato fitore elektorale vetëm duke manipuluar procesin, sot, kur janë publikuar dhjetëra dëshmi për qeveri të korruptuar qendrore si dhe ato lokale ku qeverisin socialistët, kur arreston liderët politik dhe deputetë që guxojnë të denoncojnë, si dhe largon deputetë nga parlamenti vetëm pse ngrenë zërin kundër Kryeministrit Edi Rama, në rastin më të mirë është shterim i ideve opozitare dhe qeverisëse, ndryshe lidershipi në detyrë është në vendin e gabuar!
Pas 45 vjet të qeverisjes komuniste ku nuk u zbardhën krimet ndësa propagandohej ideja se të përndjekurit politik nuk duan hakmarrje ndërkohë kriminelët komunistë të pandëshkuar zunë vendet kyçe në administratë, profesioni i vrasësit u bë i dashur për të rinjtë shqiptar; Dhe, pas 35 vjet tranzicioni të mirëkontrolluar nga Sigurimi i Shtetit ku vjedhja, trafikimi i drogës dhe korrupsioni u bë synimi kryesor i të rinjve shqiptarë pas shkollimit edhe sot kur kemi SPAK, vetëm nga lideri i partisë në pushtet Edi Rama mund të dëgjohet një ligjërim i transformuar që i garanton fitoren, ndonëse padyshim është kriminal!
Por, ai ligjërim i dedikohet elektoratit që Edi Rama drejton dhe së bashku gajasen nga ana tjetër me popullin opozitar, për të cilin tashmë janë të bindur se kurrë nuk do të vijnë në pushtet!
Nga ana tjetër, Partia Demokratike që në vitet e qeverisjes së saj dështoi si në kthimin e dinjitetit të përndjekurve politik ashtu dhe pronarëve të plaçkitur nga komunizmi ndonëse mundësoi liberalizimin e vizave dhe anëtarësimin e Shqipërisë në NATO, sot, kur deputetët e saj nuk lejohen të futen në Parlamentin e Shqipërisë ndërsa janë të mirëpritur në Parlamentin Evropian, duhet të ndryshoj artikulimin politik me të cilin i drejtohet elektoratit dhe jo të funksionoj si Opozitë Teknike, ashtu siç e ka menduar Edi Rama kur filloi keqtrajtimin, përdhosjen dhe arrestimin e liderëve dhe deputetëve opozitarë, si dhe mbështetësve të tyre!
Sot, zotimi për të luftuar krimin e organizuar dhe korrupsionin nuk mund të admirohet dhe votohet nga një elektorat që tashmë është i konsiderueshëm dhe është pjesë e krimit të organizuar dhe korrupsionit, ndërsa drejtohet nga Edi Rama, që ka nën kontroll dhe paraardhësit e tyre!
Transformimi i këtij lloj zotimi është i domosdoshëm me hapin e kohës, dhe nëse Partia Demokratike mendon ti drejtohet atyre që e votojnë, duhet të zotohet që me ardhjen në pushtet do t’ia konfiskoi kapitalin e korrupsionit dhe krimit të organizuar shërbëtorëve të kësaj qeverie, dhe do t’ia dhuroj që në 100 ditët e para, atyre që Edi Rama i keqtrajtoi për 12 vjet: pensionistëve, familjeve në nevojë, familjeve të kryefamiljarëve policë të vrarë etj.
Në fund, nëse dikush në lidershipin e Partisë Demokratike e merr të mirëqënë se synimi i Edi Ramës është arritur dhe PD duhet të funksionoj si Opozitë Teknike ndërsa mendon ta zëvendësoj liderin e arrestuar nga Rama duke propaganduar zhvlerësimin e mbështetjes ndaj liderit të arrestuar Sali Berisha në tubimin e përnatshëm para shtëpisë së tij, ai në rastin më të mirë duhet të largohet nga forumet vendimmarrëse; Dhe, në rastin më të keq, duhet ti mohohet realizimi i qëllimit të Edi Ramës secilit që mendon ta imponoj këtë ide shkatërrimtare për PD-në, duke e larguar nga radhët e kësaj partie që çdo ditë po sakrifikon në luftën për liri kundër një regjimi diktatorial!
Çdo anëtar i PD duhet ta ketë të qartë se liria e liderit Sali Berisha dhe çdo anëtari të partisë, nuk është turp por është abc-ja e funksionimit të një organizmi i cili merr frymë vetëm duke qenë bashkë!
Dhe, ai demokrat që e ka projektuar fitoren dhe beson aq shumë në zgjedhje të lira e të ndershme me Qeveri Teknike, duhet ta kthjellojë errësirën e krijuar me të qenurit gjatë në opozitë dhe nën regjimin e Edi Ramës, se kjo lloj qeverie nuk ka se si funksionon me Opozitë Teknike!
