Pagat mbi 700 mijë lekë do të tatohen me 32%, nga 23% aktualisht

Individët me paga bruto mbi 700 mijë lekë në muaj do të përballen me një normë më të lartë tatimi mbi të ardhurat, që do të arrijë në 32 për qind, nga 23 për qind që është aktualisht.

Paketa e re fiskale parashikon vendosjen e një shkalle të tretë tatimore për pagat e larta, ndërsa për pagat nga 200 mijë deri në 300 mijë lekë parashikohet lehtësim i barrës tatimore.

Ndryshimet janë pjesë e propozimeve për rishikimin e ligjit nr. 29, datë 30.03.2023, “Për tatimin mbi të ardhurat”, që synojnë ndryshimin e strukturës progresive të tatimit mbi të ardhurat nga punësimi.

Sipas propozimit, për herë të parë do të vendoset një normë marxhinale tatimore prej 32 për qind për pagat bruto mbi 700 mijë lekë në muaj, që korrespondon me një bazë tatimore vjetore mbi 8.040.000 lekë, pas aplikimit të zbritjes tatimore.

Norma e re prej 32 për qind do të zbatohet vetëm mbi pjesën e të ardhurave që tejkalon pragun e përcaktuar dhe jo mbi të gjithë pagën. Aktualisht, të ardhurat mbi kufirin e fashës së parë tatohen me normën 23 për qind, pa një shkallë të tretë për pagat më të larta.

Në relacionin shoqërues të ndryshimeve, Ministria e Financave argumenton se vendosja e shkallës së tretë synon forcimin e progresivitetit të sistemit tatimor, duke e lidhur barrën fiskale me aftësinë paguese të individëve.

Ndërkohë, për pagat më të ulëta se 700 mijë lekë parashikohet lehtësim i tatimit, përmes rritjes së kufirit të fashës së parë tatimore.

Aktualisht, norma 23 për qind zbatohet mbi pjesën e pagës bruto që tejkalon 200 mijë lekë në muaj. Me ndryshimet e propozuara, ky prag do të rritet në 300 mijë lekë, duke zgjeruar fashën e të ardhurave që tatohen me normën 13 për qind.

Për pagat bruto nga 300.001 deri në 700,000 lekë në muaj, norma marxhinale e tatimit do të jetë 23 për qind.

Sipas relacionit, kjo ndërhyrje synon lehtësimin e barrës tatimore për shtresën e mesme dhe profesionistët e kualifikuar, ndërsa individët me të ardhura më të larta do t’i nënshtrohen një norme më të lartë tatimore.

Me formulën e re, tatimi progresiv mbi të ardhurat nga punësimi do të ketë tri shkallë, të përcaktuara sipas bazës tatimore vjetore:

Kufijtë e mësipërm i referohen bazës tatimore vjetore pas zbritjes tatimore të parashikuar në ligj, ndërsa pragjet mujore prej 300 mijë dhe 700 mijë lekësh i referohen pagës bruto.

Propozimet janë pjesë e paketës së re fiskale dhe duhet të miratohen përpara se të hyjnë në fuqi./Monitor/