Pas nisjes së hetimeve për Ilir Metën, Ambasadorja e SHBA takim me kreun e SPAK

Pas nisjes së hetimeve për Ish-Presidentin Ilir Meta nga Prokuroria e Posaçme kundër Korrupsionit dhe Krimit të Organizuar, sot Ambasadorja e SHBA në Tiranë, Yuri Kim, sot ka zhvilluar një takim me kreun e SPAK, Arben Kraja, duke shprehur mbështetje të fuqishme të Shteteve të Bashkuara për Prokurorinë e Posaçme dhe institucioneve të tjera të Reformës në Drejtësi

“Kënaqësi të mirëprisja Kreun e SPAK Arben Kraja pas vizitës së tij zyrtare në Washington, e cila forcon akoma më shumë bashkëpunimin midis Shteteve të Bashkuara dhe Shqipërisë në luftën kundër korrupsionit dhe krimit të organizuar,” thekson përmes rrjeteve sociale Ambasadorja e Shteteve të Bashkuara, Yuri Kim, pas takimit me kreun e SPAK duke përfunduar:

“Shtetet e Bashkuara do të vijojnë të mbështesin fuqimisht punën e SPAK dhe institucioneve të tjera të reformës në drejtësi.”

Ndryshe, pas një kallëzimi të bërë nga ish-deputeti, Halit Valteri, për financim të paligjshëm të Partisë së Lirisë, dje u bë e ditur se Prokuroria e Posaçme kundër Korrupsionit dhe Krimit të Organizuar, SPAK ka nisur zyrtarisht hetimet për ish-presidentin Ilir Meta, duke iu drejtuar fillimisht KQZ-së dhe Gjendjes Civile.