Sot Ballkani-Shkupi, përballje për histori

Skuadra kampione e Kosovës, Ballkani do të luajë sonte në stadiumin “Fadil Vokrri” ndeshjen më të rëndësishme në histori të klubit, përballë kampiones së Maqedonisë së Veriut, skuadrës shqiptare Shkupi, ndeshje kjo e kthimit të play-offit për Ligën e Konferencës.

Skuadra e Ilir Dajës shënoi fitore një javë më parë në Shkup, 2:1, dhe tani synon ta menaxhojë epërsinë e krijuar dhe ta sigurojë kualifikimin në fazën e grupeve, që do të ishte sukses historik jo vetëm për këtë klub, por edhe në përgjithësi për futbollin kosovar.

Në anën tjetër, historinë e synon edhe Shkupi, pasi në rast se arrin ta përmbysë rezultatin e ndeshjes së parë, atëherë po ashtu për herë të parë do të gjendej në fazën e grupeve të një lige evropiane.

Ndeshja fillon në orën 20:00, derisa raportohet se tashmë janë shitur të gjitha biletat, prandaj edhe atmosfera pritet të jetë e zjarrtë nga tifozeritë e të dyja skuadrave.