Pavarësisht kush del fitues, Osmani: SHBA do mbetet aleati më i rëndësishëm strategjik i Kosovës!
Presidentja e Kosovës, Vjosa Osmani, tha sot se pavarësisht se kush do t’i fitojë zgjedhjet presidenciale në Shtetet e Bashkuara, demokratja Kamala Harris apo republikani Donald Trump, SHBA do të mbetet aleati më i rëndësishëm strategjik i Kosovës.
E pyetur për ndikimin e zgjedhjeve amerikane në Kosovë, Presidentja Osmani tha se vendi ynë në vazhdimësi e ka pasur mbështetjen e qeverisë amerikane pavarësisht se kush ka udhëhequr me Shtëpinë e Bardhë.
“E kemi fituar lirinë kur në qeverisje kanë qenë demokratët, derisa kur kemi fituar pavarësinë në qeveri kanë qenë republikanët. Pra, Kosova vërtetë ka qenë shtet i bekuar me përkrahje dypartiake amerikane. Është vendim i popullit amerikan, ne do të vazhdojmë bashkëpunimin me këdo që do të zgjidhet,” tha Vjosa Osmani duke përfunduar:
“Me rëndësi është që SHBA-të vazhdojnë të jenë lider të botës së lirë dhe aleati më i rëndësishëm strategjik i Kosovës. Ashtu do të vazhdojë të jetë edhe pas kësaj date.”
Ndryshe, Presidentja e Kosovës, Vjosa Osmani, sot u pyet mbi zgjedhjet në SHBA, pas lansimit të raportit të UNICEF-it mbi gjendjen klimatike për fëmijët në Prishtinë.
