PD depoziton në prokurori kallzimin ndaj Ramës dhe dy ministrave
Partia Demokratike ka depozituar në Prokurorinë e Përgjithshme kallzimin penal ndaj Kryeministrit Edi Rama dhe ministrave Ogerta Manastirliu dhe Lindita Nikolla.
Padia e PD-së është bërë pas urdhrit të dalë nga ministria e Arsimit dhe ajo e Shëndetësisë për të mbledhur të dhënat personale.
Albana Vokshi dhe Bardh Spahia kanë dorëzuar gjatë paradites së sotme në Prokurorinë e Përgjithshme padinë penale për mbledhjen e paligjshme të të dhënave personale të qytetarëve.
Pas denoncimit të PD-së, këto dy institucione i tërhoqën këto urdhra, por demokratët kanë vendosur që ti padisin institucionet.
“Në emër të PD-së sapo dorëzuam një kallëzim penal ndaj Ramës, Nikollës dhe Manastirliut për marrjen, grumbullimin dhe përpunimin etë dhënave personale të prindërve të nxënësve të të gjithë shkollave dhe ndërhyrjen në të dhënat mjekësore të pacientëve në të gjithë Shqipërinë.
Informacionet e kërkuara sipas ligjit të të dhënave personale konsiderohen të mbrojtura me ligj. Marrja e tyre është shkelje ligjore dhe veprim antikushtetues. Këto të dhëna konsiderohen të mbrojtura me Kushtetutë dhe ligj.
Duke mbledhur të dhënat personale, Rama hedh në kosh dhe rekomandimet e OSBE/ODIHR që ka kërkuar t’i japë fund abuzimit me administratën dhe në këtë rast ka përdorur administratën për marrjen e të dhënave të qytetarëve shqiptarë, si psh marrjen e numrave të telefonit dhe adresave të emailit.
Duke qënë se Gjykata e Lartë dhe ajo Kushtetuese janë jofunksione, edhe Prokuroria është nën ndikimin e Edi Ramës, ajo mbetet institucioni i vetëm ku mund të drejtohet opozita për të kërkuar hetim për shpërdorim detyre”, tha Vokshi.
