Plotësimi Gjykatës Kushtetuese/ Ambasadori i SHBA: Zgjidhni juristë të mirë që reflektojnë diversitetin e Kosovës

Ambasadori i SHBA në Kosovë, Greg Delawie ka kërkuar nga deputetët e Parlamenti të Kosovës  që për Gjykatën Kushtetuese të zgjedhin gjyqtarët jashtë politikës dhe të jenë juristë të mire dhe jo vetëm. Ai përmes Twitter-it ka bërë thirrje që gjyqtarët e ri të Gjykatës Kushtetuese të Kosovës  të jenë juristë të mirë që reflektojnë diversitetin e Kosovës, duke përfshirë gra.

Ndryshe, sot deputetët e Parlamentit të Kosovës do të votojnë për dhjetë kandidatët të cilët muaj më parë i kanë hyrë garës për “gardianë” të Kushtetutës. Konform aktit më të lart juridik të shtetit, për secilën nga pesë pozitat që do të plotësohen në Kushtetuese garojnë nga dy kandidatë. Prej pesëshes që pritet të zgjidhet nga Parlamenti, një pozitë i takon komuniteteve pakicë në Kosovë.

Vullnetit të deputetëve do t’i nënshtrohen: Nexhmi  Rexhepi,  Remzije Istrefi-Peci, Radomir Laban, Hajzer Salihu, Safet Hoxha, Bajram Latifi, Shkëmb Manaj, Vigan Qorroli, Shqipe Ibraj- Mala dhe Nebojsha Boriçiç.

Prej tyre, Radomir Laban dhe Nebojsha Boriçiç “luftojnë” të veçuar nga të tjerët për vendin në Gjykatë.

Në rast se procesi shkon siç duhet, atëherë Gjykata Kushtetuese për herë të parë do të jetë pa asnjë ndërkombëtar. Sipas procedurës, votimi i kandidatëve për gjyqtar kushtetues është i fshehtë

 Ja dhe postim i plotë i Delawie:

Vota e sotme e Parlamentit për të plotësuar pesë vendet e zbrazëta në Gjykatën Kushtetuese është kyçe për forcimin e sundimit të ligjit në Kosovë. U bëj thirrje deputetëve që ta lënë anash politikën dhe t’i zgjedhin kandidatët që janë njerëzit më të mirë për këtë punë – juristë të mirë që reflektojnë diversitetin e Kosovës, përfshirë gra.