SHBA me ushtrinë më të fuqishme në botë, ku renditen Shqipëria, Kosova dhe Serbia
Global Firepower edhe për vitin 2023 shpallë ushtrinë e Shteteve të Bashkuara, më të fuqishmen në botë. Sipas “Power Index”, Ushtria e Shqipërisë renditet në vendin 91 nga gjithsejë 145 fuqi botërore ndërsa Kosova në vendin 134.
Duke vlerësuar Forcat e Armatosura më të fuqishme dhe më të dobëta në botë, Global Firepower çdo vit harton renditjen duke pasur parasysh faktorët siç janë sasia e pajisjeve ushtarake dhe ushtarët e çdo shteti, por dhe situata e tyre financiare, logjistika, kapacitetet dhe kushtet gjeografike.
Bazuar në këta faktor gjenerohet vlerësimi “Power Index”, ku vlerësimi më i ulët tregon ushtrinë më të fortë, e ku për fat të keq, Serbia zë vendin e 58 si ushtria më e fuqishme në Ballkan, duke vazhduar të tolerohet nga fuqitë e mëdha që të vazhdojë të jetë rreziku i përhershëm i këtij rajoni edhe pas luftërave të përgjakshme që shkaktoi në vitet ’90-të.
Ndërkohë Kroacia rendit në vendin 69, Maqedonia e Veriut 108, Mali i Zi 128 ndërsa Bosnje Hercegovina renditet në vendin 133.
SHBA me ushtrinë më të fuqishme
Në dhjetë vendet e para, Shtetet e Bashkuara vazhdojnë të kryesojnë për shumë arsye duke lënë pas Rusinë, Kinën, Indinë, Mbretërinë e Bashkuar, Korenë e Jugut, Pakistanin, Japoninë, Francën dhe Italinë.
Global Firepower thekson se SHBA ka zënë vendin e parë me shifrat më të mira në kategoritë kryesore, materiale, financiare dhe të burimeve“.
Shtetet e Bashkuara që janë vlerësuar me Power Index 0,0712, udhëheqin botën në aspektin teknologjik, thekson Raporti, dhe janë përparimtar në sektorët kyç, mjekësor, ajror dhe të telekomunikimit, njëkohësisht duke ruajtur përparësinë në disa tregje kryesore industriale, që mundëson një nivel të caktuar të vetëmbajtjes.
Me 92 destroyer, 11 avionëmbajtëse, 13.300 avionë dhe 983 helikopterë ushtarakë, sipas të dhënave nga muaji Prill i vitit 2023, Shtetet e Bashkuara renditet para në shumë fusha, duke përfshirë këtu madhësinë e flotës së avionëve, numrin e anijeve luftarake dhe forcat e flotës transportuese.
Gjithashtu, SHBA ka buxhetin shumë më të madh të mbrojtjes krahasuar me shtetet tjera, 761,7 miliardë dollarë, që është gati sa trefishi i Kinës që renditet e dyta me buxhetin më të madh të mbrojtjes prej 230 miliardë dollarësh, raporton Business Insider për ushtrinë e SHBA, e cila është vlerësuar më e fuqishmja në botë.
Në fund, Ukraina e cila aktualisht me shumë sukses po përballet me njërën ndër fuqitë ushtarake më të mëdha në botë, Rusinë, sipas vlerësimit të Global Firepower renditet në vendin e 15-të.
