PPE foli, Sigurimi i Shtetit në alarm!
nga Agim Popoci
“Faleminderit zoti Berisha për prezantimin. Siç e dini, ju keni mbështetjen tonë më të madhe dhe Grupi ju uron suksese, me bindjen se do të fitoni në zgjedhjet e ardhshme,” ishin këto fjalët e kreut të Grupit të Partive Popullore Evropiane, Pablo Hispan, pas fjalës së Kryetarit të PD, Sali Berisha, në Strasburg, i cili përveç mbështetjes së organizatës më të madhe politike të Evropës dhe garancisë se do dërgoi një delegacion të madh nga PPE që të mbikëqyrim zgjedhjet, për të mbështetur demokracinë dhe transparencën për popullin shqiptar, alarmoi Sigurimin e Shtetit në Tiranë i cili ishte në hall për mallin propagandistik që i ka mbetur për të mashtruar miletin!
Hodhi në tregun mediatik degdisjen e Tinka Kurtit të harruar në një azil pleqsh, duke menduar se do të ketë të njëjtin efekt sikur drama me Parashqevi Simakun.
Por, nuk ngjiti! Lëre që nuk ngjiti, por nuk reagoi njeri as ndaj shkrimeve të ca injoranteve që e shitën Tinkën e harruar si një turp të madh shoqëror, kur ajo sot është vërtetë TURP, por, një turp i komunitetit të artistëve që përdoret nga Edi Rama, të cilën ai nuk e harroi kurrë; E përdori sa herë iu deshtë, siç e përdori dhjetorin e vitit 2022 për të hedhur gurin e parë në themelin e Teatrit të ri Kombëtar, pikërisht aty ku Lali Eri e hodhi për toke trashëgiminë e fundit që kishte lënë shefi i tij, Kryeministri i SPAK-ut, përgjimeve dhe të gjitha burgjeve, Edi Rama!
Këtu u pa se Sigurimi i Shtetit duhet të lëshonte në opinion më shumë bretkosa me shigjeta helmuese, sepse mediat ordinere që ka ngritur,nuk po arrijnë më të çorientojnë opinionin me shpejtësi!
Ekranet u bllokuan me pamjet e ceremonisë së nderimit të Kryeministrit Edi Rama në Izrael me Medaljen Presidenciale të Nderit! Angazhimi i tij në luftën kundër antisemitizmit ishte një tallje edhe për veshin shqiptar ndërsa kontributi i madh i Shqipërisë në mbrojtjen e hebrenjve gjatë Luftës së Dytë Botërore padyshim që e meritonte këtë Medalje, vetëm se ai që ishte më meritori nuk u zu në gojë fare!
Edi Rama për Medalje tha se merita ka populli shqiptar, ashtu siç thotë për çdo ngjarje kur ai nuk ishte Kryeministër, si për liberalizimin e vizave, anëtarësimin në NATO, vizitën e Presidentit të SHBA në Shqipëri etj.
Disa edhe e paragjykuan pa e kuptuar se Kryeministri Edi Rama për kaç kishte marrë leje nga Sigurimi i Shtetit për të thënë, se kush i shpëtoi hebrenjtë në Luftën e Dytë Botërore !
Sot ndoshta është e lehtë të thuhet se këta hebrenj i shpëtoi Kryeministri i Shqipërisë, Mustafa Kruja, por, komunistët janë në pushtet, komplikohet paksa situata, ashtu siç ju komplikua Sigurimit të Shtetit efekti propagandistik i kësaj ceremonie!
Dava komunistësh, sepse për të rrëfyer ashtu siç ka ndodhur në të vërtetë shpëtimi i hebrenjve duhej pranuar si shpëtimtar shumë armiq të morrave të kuq, si bejlerët e Mitrovicës, ata të Pejës dhe Prishtinës, pikat fundore të kontaktit në Gjakovë dhe Prizren, Xhafer Devës, dhe, autorit të akti final të pasaportizimit të hebrenjve me pasaportë shqiptare, Kryeministër Mustafa Merlika Kruja!
Por, jo gjithçka mbaroi me Grupin Parlamentar të PPE, sërish shfaqet Sali Berisha, tashmë para Grupit Parlamentar të Konservatorëve dhe Patriotëve Evropian!
Pavarësisht menaxhimit për bllokimin e transmetimit të drejtëpërdrejtë të kësaj ngjarje, si dhe sfumimit të takimit me Presidentin e Asamblesë Parlamentare të Këshillit të Evropës, Theodoros Roussopoulos, institucionet evropiane në Strasburg tashmë ishin të qartë për narkoshtetin shqiptar, qeverinë dhe kreun e saj Edi Rama që mashtron për plotë 12 vjet me reformat e tij me ministra të Brendshëm trafikant ndërkombëtar të drogës, ministra të Shëndetësisë dhe Bujqësisë që vjedhin edhe fonde evropiane, dhe kryetar bashkie të kryeqendrës evropiane që vjedh si xhepin e ndërtuesve ashtu dhe xhepin e vetë, ndërsa qindra miliona euro të inceneratorit të Tiranës që nuk ekziston, nuk gjenden në faqen e dheut edhe kur Zv/Kryeministri Arben Ahmetaj tregon me gisht thesarin!
Kështu rikthimi i Sali Berishës në skenën evropiane u bë temë e tavolinave shqiptare por dhe shqetësim i Sigurimit të Shtetit i cili u vu në lëvizje për të turbulluar këtë mendje shqiptare me barkun bosh, dhe e menduan se askush më mirë se Fevzo nuk mund ti ndihmonte!
Kur gjithçka po bubulonte rreth Bashkimit Evropian, narkoshtetit të Edi Ramës në Strasburg dhe Saliut, një rrëfim në orët e mbrëmjes për paratë e miliarderit shqiptar të shpallur nga Forbes, u mendua si kryeasi në mëngën e Koranit!
Por, sërish zhgënjim, nuk zhgënjen vetëm Sigurimi por edhe Korani! Që Samir Mane ishte miliarder këtë shqiptarët nuk kishin nevojë ta dinin nga Forbes, por menduan se do të dëgjojnë diçka nga intrigat që u tha po nga Forbes pasi e shpalli Samirin e Edi Ramës miliarder; Mbi pasurimin me ndihmën e bashkëpunëtorit të Slobodan Milosheviçit dhe Zv/Kryeministrit të tij, Miroslav Mishkoviç, për të cilin deri më tani dihej se vetëm i shiti dhe i bleu brenda një viti, QTU-në!
Por, edhe këtu Sigurimi i Shtetit dështoi me sukses! Me bindjen mbi superioitetin që zotëron për të zhvlerësuar vlerat e Saliut, gjithë fatin e zhvlerësimit të premtimit të PPE për të mos toleruar manipulimin e zgjedhjeve të 11 Majit nga Edi Rama dhe urimin e fitores për PD-në, e la në llapën e Samir Manes dhe servilitetin e Fevziut, duke harruar një detaj shumë domethënës, mileti e ka në duar edhe pultin!
E mileti ndoshta edhe do të binte në kurthin e kësaj dyshe injorante sikur intervista të intrigohej me serbin e Milosheviçit, parajsat fiskale, milionat që nuk kanë prejardhje, rolin e miliarderëve të postkomunizmit në këtë pasuri, dhe, ndonjë momenti kur Samir Mane edhe mund të heshte!
Por, jo, bisedë si në byrektore, miell, qepë, domate dhe myshteri si Llulli…
Dhe, nuk kishte se si të përfundonte ndryshe edhe takimi i sotëm me shefen e diplomacisë evropiane, Kaja Kallas, e cila pas një të hëne të suksesshme të Sali Berishës dhe dështimit pare excellence të Sigurimit të Shtetit, i tha qartë Kryeministrit Edi Rama që duhet të bashkëpunoj me gjithë spektrin politik – gjë që Rama nuk e ka bërë për 12 vjet, që të zbatoj Reformat – gjë që Rama nuk e ka bërë as për 12 orë, dhe sundim të ligjit të fortë me sistem gjyqësor të pavarur, ku qytetarët të shohin që lufta kundër korrupsionit po merret seriozisht dhe po jep rezultate – gjë që Rama nuk e ka bërë as për 12 minuta!
Në fund, për ata që Sigurimi i Shtetit nuk i la të dëgjojnë kreun e Grupit Parlamentar të PPE në Asamblenë Parlamentare të KiE, ishte Kaja Kallas e votuar nga ky Grup në Parlamentin Evropian që i bëri të qartë sot Edi Ramës se zgjedhjet e 11 Majit do të monitorohen, e nëse ka menduar të blejë vota si zakonisht, mesazhi ishte i qartë:
Paratë e taksapaguesve të shkojnë aty ku duhet!
