Pse e do KFOR-in në veri Edi Rama?!

nga Agim Popoci

Pas sulmit terrorist serb afër Banjskës në veri të Kosovës, vrasjes së një polici të Kosovës, zbulimit të një arsenali armësh serbe dhe jo vetëm me vlerë 5 milionë euro brenda Manastirit të Banjskës, dhe  shpalljen ditë zie nga Presidenti i Serbisë për vrasësit e policit shqiptar që u eliminuan nga Policia e Kosovës, Presidenti i Serbisë, Aleksandar Vuçiç nuk priti as hetimin e ngjarjes por kërkoi tërheqjen e policisë kosovare për ta zëvendësuar me KFOR-in!

Sot kur hetimet nuk kanë përfunduar, kur ngjarja tragjike me vrasjen e një polici kosovar përfundoi me dështimin e terroristëve serbë, kur Policia e Kosovës e përmbylli këtë aksion terrorist serb me një menaxhim të jashtëzakonshëm që u përshëndet nga SHBA dhe BE, i vetmi që dështoi dhe favorizoi terroristët në këtë aksion me moskontrollin e kufirit,  ishte KFOR-i; Dhe, po këtë KFOR e kërkon në veri të Kosovës Presidenti i Serbisë!

Dhe jo vetëm kaq! Ndonëse në qershorin e këtij viti, Kryeministri Edi Rama e përkufizoi shumë mirë se vendosja e KFOR-it në Veri do të thoshte humbje e kontrollit të shtetit mbi territorin, çuditërisht ai tani mbron idenë e vëllait të tij nga shqyerja e Ballkanit, se në veri duhet të tërhiqet Policia e Kosovës dhe të vendoset KFOR-i!

Ndoshta për Aleksandar Vuçiçin nuk është mirë nëse hetimet e këtij sulmi terroristë në Banjskë kryhen deri në fund dhe zbulohet se disa pjesëtarë të KFOR-it kanë mbyllur sytë në mënyrë që deri në Manastirin e Banjskës të transportohen armë e deri dhe autoblinda!

Mund të jetë e sikletshme për Presidentin e Serbisë nëse konfirmohet se kush ishin ata ushtarë të KFOR-it që lejuan trafikimin e armëve nga Serbia në Kosovë përmes autoambulancave, shkarkimin e tyre në kishat ortodokse dhe ndalimin e hetimit të këtyre fakteve të regjimentit britanik, ashtu siç kishte deklaruar në këtë fillimkorrik Kryetarja e Komisionit të Punëve të Jashtme pranë Parlamentit të Mbretërisë së Bashkuar, deputetja britanike, Alicia Kearns.

Hetimet mund të zbulojnë dhe ndërmjetësin serb me KFOR-in që shpëtoi terroristët serbë të largohen nga Manastiri i Banjskës të dielën e 24 shtatorit!

Por, çfarë e lidhë këtu Kryeministrin e Shqipërisë, Edi Rama, me kërkesën për të larguar Policinë e Kosovës e cila ka aktualisht kontrollin e plotë në veri, dhe vendosjen e KFOR-it!

Sikur Policia e Kosovës do të dështonte në operacionin për shuarjen e synimeve të terroristëve serbë në depërtimin me atë arsenal armësh edhe në komunat tjera të veriut, ose me operacionin joprofesional të policisë numri i viktimave të ishte joproporcional me rrezikun që i kanosej Kosovës, kërkesa e Edi Ramës edhe mund të diskutohej!

Ndërkaq, kur Presidenti Vuçiç shfajësoi veten se nuk ka lidhje me sulmin terrorist dhe drejtoi gishtin nga serbët lokal që mund të jenë ata të zemëruarit me Albin Kurtin që e kanë ndërmarrë këtë aksion, dhe një ditë pas kësaj deklarate kur asgjë nuk e qetësoi situatën ndonëse shpalli ditë zie për terroristët e vrarë serbë i drejtohet kombit duke deklaruar se situata në veri po zien por Kurti ka bashkuar serbët me vrasjen e “tre martirëve dhe shenjëtorëve” , gjithçka vërtetë filloi të ziente, por, jo vetëm në veri të Kosovës, por, në gjithë  Serbinë! Pse?!

Një ditë pas aktit terrorist Aleksandar Vuçiç mendoi se e kishte edhe gurin edhe arrën, ishte i bindur se  ia kishte hedhur dhe terri i plotë informativ që kishte servirur për serbët kishte dhënë rezultat ndërsa informimi nga  mediat e Kosovës dhe ato ndërkombëtare shikohej me dozë të madhe dyshimi si në vitin 1999, erdhi reagimi zyrtar i SHBA dhe BE që dënojnë sulmin terrorist të vrasjes së policit kosovar dhe kërkojnë që përgjegjësit të dalin para drejtësisë,  reagimi i cili nxiti serbët të fillojnë edhe të mendojnë!

Pyetja e parë që u shtrua ishte pse Presidenti i tyre shpall ditë zie për tre njerëz që kishin vrarë një polic ndërkohë sikur presidenti i tyre të ishte serb aq i madh siç po e shet veten, nuk do të kishte refuzuar vetëm një vit më parë të shpallte ditë zie po “për ngjarje tragjike”, kur 8 minatorë humbën jetën dhe 18 u plagosën pas shpërthimit të metanit në minierën “Soko”!

Dhe, përgjigja logjike u gjet menjëherë me faktin se ndoshta këta minatorë të shkretë u shpërfillën jo se nuk mund të konsiderohen martirë, por, miniera ku ata dhanë edhe shpirtin nuk është pronë e kriminelit Milan Radoiçiç!

Këtij krimineli që për zemër e ka Aleksandar Vuçiç, por nuk është rastësi që për zemër e kanë edhe batonët dhe buzhalët e Edi Ramës; Të cilët vazhduan pa pushuar edhe me promovimin e idesë së Presidentit të Serbisë, se ky sulm mund të jetë realizuar nga ata serbë që janë të zemëruar me qeverinë e Albin Kurtit! 

Ndoshta ky arsyetim edhe mund të zinte vend sikur ti jepte të drejtë të gjithë atyre që janë të zemëruar në Serbi me regjimin e Aleksandar Vuçiçit, të armatosen dhe me armë të këtij lloji e të zgjidhin problemet e tyre me këtë autokrat! Dhe, jo vetëm në Luginë të Preshevës, Sanxhak dhe Vojvodinë , por, edhe në Serbinë qendrore ku dy injorant si Vulin e Radoiçiç bëjnë ligjin!

Ose dhe vetë Albin Kurtit të zemëruar me Aleksandar Vuçiçin dhe hyzmeqarët e tij Hill, Borrell e Lajçak, a do ti quhej zgjidhje një aksion i tillë terroristë…

 Apo kjo është e tepruar sepse një gjë e tillë është e pamundur si për furnizimin me armë ashtu dhe veprimin e terroristëve, sepse si në Vojvodinë, Luginë të Preshevës, Sanxhak dhe në selinë e BE-së në Bruksel, një gjë e tillë është e pamundur sepse aty nuk ka KFOR! 

Në fund, sot, kur të gjithë shqiptarët që i thonë bukës – bukë, e ujit – ujë, e dinë se qyteti i  Mitrovicës u nda në sy të KFOR-it  francez, se zjarri iu vu Kishës Ortodkse në jug të Mitrovicës  në vitin 2004 vetëm pas largimit misterioz të KFOR-it grek, ata e presin të qetë vetëm përfundimin e hetimit për të konfirmuar se kush ishte organizatori dhe zbatuesi i sulmit terrorist në veri të Kosovës më 24 shtator 2023, sepse hetimet po kryhen nga Prokuroria e Kosovës!

Deri në përfundimin e këtij hetimi, për shkak të imunitetin që gëzojnë dhe jo konfliktin e interesit që proklamoi dishepulli i Enver Hoxhës, Aleksandar Vuçiç dhe Edi Rama mund të vazhdojnë ëndrrën e tyre ideologjike të bashkimit të Serbisë me Shqipërinë, por jo dhe jetësimin e kësaj ëndrre duke ngatërruar edhe KFOR-in! KFOR-i është forcë politiko-ushtarake e NATO-së me mision të qartë dhe ka zot shpie pavarësisht se kush është Kryeministër i Shqipërisë! Aq më pak Presidenti i Serbisë, këtij shteti i cili mund të vazhdoj të ekzistoj si shtet, por, perëndimor nuk do të jetë kurrë, pavarësisht se kush e drejton!