Reshje bore në Qarkun Korçë, trashësia deri 60 cm. ARRSH: Qarkullimi vazhdon normalisht!

Reshjet e borës në disa zona të qarkut të Korçës kanë vijuar përgjatë gjithë natës. Në zonat e larta malore mbi 1000 m trashësia shkon nga 10 deri në 60 cm në zonën e Mashkullores.

Në Dardhë, në aksin nga km 8 deri në km e 12  trashësia ka shkuar deri në 12 cm ndërsa në Voskopojë dhe Qafa e Qarrit janë regjistruar reshje të pakta dëbore ku herë pas here kishte dhe reshje shiu.

Ndërprerje të energjisë elektrike ka pasur në zonën e Gorës, bashkia Pogradec, si dhe në fshatrat Vithkuq dhe Panarit, bashkia Korçë. Grupet e punës, raportohet se janë në terren për riparimin e defekteve.

Ndërkohë Autoriteti RRugor Shqiptar raporton se gjatë natës ka pasur reshje shiu me intensitet mesatar pa shkaktuar probleme në qarkullimin e mjeteve.

“Kontraktorët kanë qenë në terren ku kanë bërë pastrimin e akseve nga rënia e gurëve apo inerteve si në: Qafë Mali-Fierzë, Sopot-Kam, Koplik-Bogë, Dedaj-Razëm, Gramsh-Kodovajt dhe në zonën e Poçemit.

Në Valbonë, në Qafën e Qarrit, në Dardhë dhe në Voskopojë ka pasur reshje bore, rrugët janë të hapura dhe qarkullimi vazhdon pa probleme,” thekson ARRSH duke i bërë thirrje drejtuesve të mjeteve të pajisen me goma dimërore dhe zinxhirë.