Rikthehet Orkestra Simfonike e Shkodrës, Spahia: Arti dhe Kultura, ushqim shpirtëror për këtë qytet!

Shkodrës i kthehet një identitet, një simbol i fortë i artit dhe kulturës, vlerësoi Kryetari i Bashkisë Bardh Spahia rikthimin pas 32 vitesh të Orkestrës Simfonike të Shkodrës, sot kur ky formacion artistik nisi provën e parë nën drejtimin e maestro Jetmir Barbullushi, duke u bërë gati për koncertin e muajit Mars.

“Orkestra Simfonike e Shkodrës pas 32 vitesh mungesë, është tashmë një realitet! Ju bashkova me kënaqësi provës së parë që ky formacion zhvilloi nën drejtimin e maestro Jetmir Barbullushi.

Ka qënë për mua privilegj por edhe përgjegjësi të bëja realitet rikthimin e kësaj sipërmarrje të madhe artistike, por që i kishte munguar dhe padiskutim ishte domosdoshmëri për komunitetin e artistëve në veçanti dhe Shkodrën në tërësi. Arti e kultura janë identitet dhe ushqim shpirtëror për këtë qytet,” tha Kryetari i Bashkisë Shkodër, Bardh Spahia, duke falenderuar çdo kontribues që ndër vite ka hedhur nga një gur për të ardhur deri tek kjo ditë, shpreh mirënjohjen dhe mbështetjen time për të gjithë artistët profesionist dhe brezin e ri që ju bashkua nismës për t’i dhënë jetë Orkestrës Simfonike të Shkodrës ndërsa përfundoi:

“Kam bindjen absolute se me këtë përkushtim e profesionalizëm, shumë shpejt kjo orkestër do të jetë aty ku e meriton, duke shkelqyer përpara publikut të dashur shkodran, shqiptar dhe më gjërë.”