SERPENTINE 2026, Kurti: Një kapitull i ri për artin dhe kulturën në Kosovë
Një kapitull i ri për artin dhe kulturën në Kosovë, e cilësoi Kryeministri në detyrë Albin Kurti në hapjen zyrtare të SERPENTINE 2026, ku mori pjesë të mbrëmjen e së martës në fshatin Kukaj të Prishtinës, të kësaj hapësire të re shumëdisiplinare dedikuar artit dhe kulturës.
Nuk është vetëm një objekt për organizimin e ngjarjeve kulturore, por një hapësirë ku arti mund të krijohet, zhvillohet dhe prezantohet, tha Kurti për SERPENTINE i cili sjell një program që ndërthur teatrin bashkëkohor, muzikën, instalacionet artistike e zanore, si dhe forma të tjera të krijimtarisë.
SERPENTINE përfshin tri hapësira teatrore, instalacione permanente artistike e zanore, tha Kurti, “Muzeun Emocional”, “Shtëpitë e Kujtimeve”, “Akuariumin e Kujtesës” dhe programin e rezidencave artistike, ndërsa vlerësoi gjithashtu mundësitë që kjo hapësirë krijon për bashkëpunimin e artistëve nga Kosova me artistë nga rajoni dhe Evropa.
“Dy hapësira kulturore në një fshat të vogël janë një pasuri e madhe për gjithë Kosovën,” tha Albin Kurti, duke iu referuar edhe EtnoFestit, i cili prej vitesh zhvillohet në Kukaj.
Kryeministri në detyrë tha se EtnoFesti dhe SERPENTINE, ndonëse të ndryshme në karakter, e plotësojnë njëra-tjetrën. Sipas tij, EtnoFesti ruan lidhjen me trashëgiminë, traditën dhe kujtesën kulturore, ndërsa SERPENTINE fokusohet në teatrin bashkëkohor, instalacionin, muzikën dhe format e reja të shprehjes artistike.
Në fund të ceremonisë, Kryeministri në detyrë i Kosovës, Albin Kurti uroi themelueset e SERPENTINE, Arta dhe Ilirjana Arifi, si dhe ekipin e tyre, ndërsa shprehu mirënjohje për profesorin Fadil Hysaj dhe të gjithë të përfshirët në zhvillimin e EtnoFestit dhe jetës kulturore në Kukaj.
