SHBA hap çështjen e territorit britanik te Argjentina. Mbretëria e Bashkuar: S’mund të jemi më të qartë
Downing Street ka reaguar ndaj raportimeve se Shtetet e Bashkuara po shqyrtojnë mundësinë e rishqyrtimit të mbështetjes së tyre për sovranitetin britanik mbi Ishujt Falkland. Sipas një emaili të brendshëm, kjo është një nga opsionet që qeveria amerikane po shqyrton për të ndëshkuar aleatët e NATO-s që nuk e mbështetën luftën në Iran, raporton Sky News.
Qëndrimi i Londrës mbetet i pandryshuar
Zëdhënësi zyrtar i Kryeministrit Britanik u tha gazetarëve me këtë rast se qëndimi i Mbretërisë së Bashkuar mbetet i pandryshuar:
“Qëndrimi i Mbretërisë së Bashkuar për Ishujt Falkland nuk mund të ishte më i qartë. Është i qëndrueshëm dhe i pandryshuar. Sovraniteti i përket Mbretërisë së Bashkuar dhe vetëvendosja është me rëndësi të madhe.”
Kur u pyet nëse një qëndrim i tillë i ishte përcjellë qartë Donald Trump, zëdhënësi u përgjigj se nuk donte të paragjykonte çështjet. “Qëndrimi ynë është konsistent. Populli i Ishujve Falkland ka deklaruar më parë me shumicë dërrmuese se dëshiron të mbetet një territor britanik jashtë shtetit. Ne gjithmonë kemi mbështetur të drejtën e vetëvendosjes”, tha ai.
Pentagoni po shqyrton masa kundër aleatëve
Kujtojmë se Pentagoni po shqyrton disa opsione politike kundër aleatëve të NATO-s që, sipas vlerësimit të Washingtonit, nuk mbështetën operacionet amerikane në luftën me Iranin. Ndër propozimet janë pezullimi i Spanjës nga aktivitete të caktuara brenda Aleancës dhe një rishikim i mbështetjes amerikane për sovranitetin britanik mbi Ishujt Falkland.
Memorandumi i brendshëm, për të cilin raportoi Agjencia e lajmeve Reuters, shpreh zhgënjimin me disa anëtarë për refuzimin ose ngurrimin e tyre për të siguruar akses në baza, fluturime ajrore dhe mbështetje logjistike për forcat amerikane. Të drejta të tilla, të njohura si ABO, përshkruhen nga zyrtarët amerikanë si “themeli i mënyrës se si funksionon NATO”.
Të zhgënjyer për Spanjën dhe aleatët
Shtetet e Bashkuara ishin të zhgënjyera veçanërisht me Spanjën, qeveria e së cilës ka refuzuar të lejojë që bazat dhe hapësira e saj ajrore të përdoren për të sulmuar Iranin, edhe pse SHBA-të kanë instalime të rëndësishme ushtarake atje. Zyrtarët amerikanë thonë se NATO “nuk mund të jetë një rrugë me një sens” dhe se aleatët duhet të mbajnë më shumë përgjegjësi.
Presidenti i SHBA-së, Donald Trump, më parë i ka kritikuar ashpër anëtarët e aleancës për mospjesëmarrjen në operacione, duke përfshirë një bllokadë detare të Ngushticës së Hormuzit, dhe madje ka përmendur mundësinë e tërheqjes së SHBA-së nga NATO.
Pasojat e mundshme simbolike dhe politike
Ndërsa nuk është e qartë nëse ekziston një mekanizëm formal për pezullimin e një anëtari si Spanja, zyrtarët thonë se masa të tilla do të kishin një ndikim të fortë politik dhe simbolik. Opsionet përfshijnë shqyrtimin e mbështetjes së SHBA-së për “territoret e jashtme” evropiane, duke përfshirë Ishujt Falkland, të cilët pretendohen gjithashtu nga Argjentina.
Lufta me Iranin hapi më tej çështjen e marrëdhënieve brenda NATO-s dhe ngriti shqetësime midis aleatëve evropianë në lidhje me rolin e ardhshëm të SHBA-së në mbrojtjen kolektive.
