Shqipëria bëhet! Falemnderit Edi Rama!
nga Agim Popoci
Sot shqiptarët janë më të relaksuar jo se mbiu një Lali i ri për të krijuar parti, por, se prezantimi i kësaj partie të re i bëri që ata të reflektojnë dhe të vijnë në konkluzionin se në rrethanat e krijuara politike e sociale nga vetë Kryeministri Edi Rama, Shqipëria vërtetë do bëhet!
Shqipëria bëhet, jo me idetë që ka Lali i ri as me Kryeministrin e tij që tha se ka aftësi, por, sot, kur Edi Rama nuk i vari dot të gjithë komunistët siç kërkonte me rënien e komunizmit, ama bëri për vete gjithë llumin që proklamohej si antikomunistë dhe u mblodhën përreth Lulzim Bashës, krijoi mundësi reale për të gjithë ata që kanë lindur pas 20 shkurtit të vitit 1991!
Shqipëria bëhet, jo me të përndjekurit politik që i thanë JO Enver Hoxhës dhe tashmë po i thonë edhe Sali Berishës, e nga ana tjetër po i thënë PO, Edi Ramës dhe asqerit të tij Lulzim Basha, sepse thjeshtë janë të përndjekurit e vetes së tyre që me gjakun e shitur nuk i duhen më as atit, as birit dhe as shpirtit të shenjtë!
Shqipëria bëhet, jo me të plaçkiturit e pronave nga komunistët që pranuan të pagëzohen edhe ish-pronar, dhe u bënë palë me Edi Ramën dhe asqerit të tij Lulzim Basha për t’ju ngulur në kokë shqiptarëve se i vetmi hajdut i pronave pas Mbretit Zog na qenka Sali Berisha me Ligjin 7501!
Shqipëria bëhet, jo me ata që dështuan ta çrrënjosin komunizmin dhe sot fajësojnë Sali Berishën për kompromiset e bëra me pasardhësit e Enver Hoxhës gjatë 32 viteve tranzicion, vetëm pse kështu u thotë Edi Rama dhe impianti i tij propagandistik!
Shqipëria bëhet, jo me ata që e sollën atdheun buzë greminës dhe me pamjaftueshmëri ushqimore, dhe, krekosen nga OKB si sot Kryeministri Edi Rama duke mbrojtur Ukrainën ashtu siç bënte në vitin 1960 Kryeministri Mehmet Shehu me Kinën, pasi Moska nuk i përfill dhe jo që kanë mendësi perëndimore!
Shqipëria bëhet, sepse për 111 vite të ekzistencës së saj, përveç se pjelli kriminelë si Enver Hoxha dhe Mehmet Hoxha, antishqiptar si Fatos Nano e Ilir Meta, dhe hajdut si Edi Rama e Lulzim Basha, kishte koka të shumta që sakrifikuan për këtë vend, dhe për fatin e saj të mirë kanë trashëgimtarët e tyre!
Shqipëria bëhet, sepse zbardhjen e krimeve komuniste mund ta kenë penguar me ose pa qëllim, Nano e Berisha, Rama e Basha, me Institutet dhe Autoritetet e tyre, por, janë pasardhësit e të përndjekurve politik dhe atyre që u është vjedhur prona, që i kanë qëndruar besnik idesë së tyre dhe me koston e qëndrimit në ishullin e tyre pa bukë, shpi e katandi!
Shqipëria bëhet, sepse në këtë tokë të përgjakur me gjak nga komunistët vazhdojnë të frymojnë edhe shqiptarë që u arsimuan dhe punojnë pa u pranuar të bëhen sigurimsa e patronazhistë!
Shqipëria bëhet, sepse është një armatë e tërë e të rinjve që nuk ishin dhe nuk janë pjesë e asqerëve të Edi Ramës që luftojnë për hipotekimin e vulës së korrur në bahçen demokrate, ndërsa hipoteka e tyre më e madhe vazhdon të jetë bindja që kanë!
Shqipëria bëhet, sepse shumë prej të lindurve pas 20 shkurtit të vitit 1991, sot dhe mot, nuk bëhen dot komunist jo vetëm pse gjaku nuk është ujë, por, ishin komunistët si Enver Hoxha dhe Edi Rama me politikat e tyre që iu dhanë një leksion kombëtar historik se si nuk bëhet Shqipëria!
Shqipëria bëhet, sepse kjo armatë e të rinjve të lindur dhe rritur me frymë atdhetare, tashmë e ka të qartë se nëse ka diçka që e shpëton atdheun e tyre nga kjo situatë e krijuar politike dhe sociale, është vetëm një lëvizje politike e djathtë!
Dhe, sot, për këtë bindje të krijuar që ju lehtëson këtyre të rinjve arritjen e qëllimit madhor për dallim nga paraardhësit e tyre që vuajtën aq shumë, duhet ta falënderojnë një njeri të vetëm, Edi Ramën!
