Skenari i duhur për Protestën e 11 Korrikut!
nga Agim Popoci
Në prag të Protestës Kombëtare të Partisë Demokratike më 11 korrik “Të Bashkuar në Betejë”, impianti propagandistik i Edi Ramës ka ndezur motorët për të bindur shqiptarët se Saliu me demokratët e tij nuk dinë të bëjnë protestë, dhe sërish do i bëjnë ato të lodhshmet me nga dy orë, dhe do të shpërndahen në shtëpi!
Një ndihmë të konsiderueshme në këtë lojë të pistë po i japin të gjitha televizionet kombëtare dhe shpura e portaleve që janë preokupuar me pyetjen qindra milionëshe, meqë milionat nuk i kanë zët, “çfarë pas përfundimit të protestës?!”.
Pa ju larguar protestës së domosdoshme më 11 korrik kundër regjimit të Edi Ramës dhe me kaq shumë kundërshtarë, të cilës domosdoshmërisht i duhet një skenar serioz, fillimisht duhet sqaruar pse bëhet një protestë!
Protestuesja veterane L.A. Kaufman në librin e saj “Si ta lexoni një protestë: Arti i Organizimit dhe Rezistencës” sqaron se cili mund të jetë efekti i një proteste, pa përjashtuar dhe mundësinë e dështimit.
“Efekti i protestës shpeshherë nuk mund të vërehet teksa zhvillohet. Efektet ndonjëherë janë delikate, të shpërndara dhe indirekte. Ndonjëherë je i dënuar me humbje dhe protesta është vetëm një derdhje e zhgënjimit. Por ndonjëherë harku i historisë përkulet drejt drejtësisë dhe ndez një moment magjik e të papritur fitoreje,” thotë veterania amerikane e protestave duke e cilësuar protestën si akt besimi.
“Një protestë është gjithmonë një akt besimi, një bast i verbër se një aksion do të shkaktojë aksione të tjera, se frymëzimi do të marrë rrugë të paparashikueshme, se një qëndrim i guximshëm do të nxis forca të reja, se drejtësia do të mbizotërojë,” thotë protestuesja veterane L.A. Kaufman në librin e saj “Si ta lexoni një protestë: Arti i Organizimit dhe Rezistencës” duke e pranuar se sfida më e vështirë e një proteste është se si të ruhet shpresa tek njerëzit për të vazhduar të veprojnë dhe qëndrojnë në luftën e tyre!
A ka kundërshtar një protestë?! Natyrisht që ka edhe aty ku qeverinë nuk e drejton një delirant si Edi Rama, dhe media servile që mund të shfaqen edhe në djepin e demokracisë.
L.A. Kaufman në librin e saj përmend një tekst konfuz të një gazetari i cili po luftonte një lëvizje kundër emërimit të Brett Kavanagh si gjyqtar i Gjykatës së Lartë, sipas tij, lëvizje e çorganizuar dhe pa udhëheqës që po ndikonte në politikën amerikane në mënyrë të papritur, duke sqaruar gazetarin dhe jo vetëm, me sjelljen në vëmendje të marshit të parë në Washington me 1963, që ishte në çdo mënyrë një veprim i koordinuar nga lart.
Kushtet e protestës ishin objekt i negociatave të kujdesshme me një administratë shumë nervoze të Shtëpisë së Bardhë, të udhëhequr nga 10 aktivistë meshkuj të ngarkuar me përgatitjen e marshimit. Pjesëmarrësit u udhëzuan të mbanin vetëm pankartat e përgatitura nga organizatorët paraprakisht; ndalimi i mesazheve të bëra vetë u zbatua në mënyrë rigoroze. Marshi kulmoi me një tubim dhe fjalime të folësve sipas listës së përcaktuar. Në kohën kur Martin Luther King kishte radhën të fliste për ëndrrën, shumica e njerëzve ishin shpërndarë tashmë. Detyra e tyre ishte të marshonin dhe më pas të qëndronin dhe të dëgjonin.
“Pasiviteti ishte pjesë integrale e planit për Marshimin në Washington,” shkruan Kaufman. “Pjesëmarrësit u mobilizuan si trupa, jo si zëra”. Në atë kohë, vëren autorja, prania e thjeshtë e trupave të zinj “aty ku nuk u takon, qoftë të ulur në një lokal për të bardhët apo duke bllokuar rrugën, ishte një mesazh mjaft i qartë”.
Duke u kthyer në realitetin shqiptarë me ata që sjellin teori nga më të ndryshmet se si duhet protestuar kundër Edi Ramës, Kryetari i Partisë Demokratike, Sali Berisha, dhe stafi i tij organizativ nuk kanë nevojë të shpenzojnë kohën me leximin e modeleve të ndryshme të protestës kur kanë 21 janarin 2011, i cili edhe nga ndërkombëtarët u cilësua si protestë paqësore madje ishin të habitur pse duhej të gjuhej me armë zjarri mbi protestues!
Meqë dihet pika e vlimit të protestës së 21 Janarit, fillimi i saj pa i ndryshuar asnjë presje duhet të nis me 400 protestues jo domosdoshmërisht nga veriu siç i keqpërdor Edi Rama, të pajisur me hunj që do të godisnin mbi policë pa ndërprerje deri sa do të fillonte furnizimi me gurë i protestuesve nga personi që është projektuar të bëhet Ministër i Brendshëm, siç bënte Saimir Tahiri!
Nëse rastësisht Policia e Shtetit është treguar e pakujdesshme dhe ka lënë ndonjë makinë në Bulevardin Dëshmorit e Kombit ku do zhvillohet protesta, tashmë është licencuar ndërkombëtarisht dhe zjarrvënia që bëri Lali Eri me bashkëpunëtorët e tij, që i jep leje dhe Belind Këlliçit me drejtuesit që kishte projektuar në Bashkinë Tiranë ta bëjë të njëjtën gjë!
Ca prej tyre me bojë të kuqe në dorë duhet ti përqendroj në radhët e para të protestës nëse dëgjohet ndonjë e shtënë në formë krisme, për ti lyer ca koka protestuesish që t’i kujtojnë Edi Ramës ditët e sajuara me protestat e gjakosura nga Saliu!
Flamur Noka dhe Gazment Bardhi larg nga vija e parë e frontit meqë lideri i opozitës Sali Berisha është në arrest shtëpie, duhet të lëvizin kohë pas kohe gishtin nën mjekër dhe mbi kokë, sikur po drejtojnë protestën, që të krijohet ideja se, po, protesta po drejtohet si më 21 Janar!
Në këtë ansambël të protestës, me patjetër duhet të përfshihen ca biznesmenë, nëse jo, atëherë aktivistë që shpërndajnë lekë për pjesëmarrësit e kësaj proteste në mënyrë që syri vigjilent i medias së Edi Ramës të kapin edhe ato raste që nuk u quan shkelje në protestën paqësore të Partisë Socialiste kundër korrupsionit të Zv/Kryeministrit, Ilir Meta!
Për t’i qëndruar besnik skenarit të 21 Janarit, Saliu me drejtuesit e PD, duhet të organizoj dhe ardhjen e një makine që të përplaset në dyert e Kryeministrisë!
Në fund, Kryesia dhe Këshilli Kombëtar i Partisë Demokratike duhet ta kenë parasysh se Komandanti i Grupit të Zjarrit në Gardën e Republikës, me përfundimin e kësaj proteste paqësore duhet të zgjidhet Kryetar i PD, në degën ku jeton.
Dhe, për të mos ndryshuar skenarin e një proteste paqësore nga e cila edhe Prokuroria mbyll sytë, por, thotë se hetoi protestën e 21 Janarit 2011, ky Komandant i Grupit të Zjarrit në Gardën e Republikës duhet të kandidohet edhe për kryetar bashkie, në vendin ku doli ky filiz demokracie, i gatshëm ti shërbejë partisë, si në paqe ashtu edhe në luftë!
A duhet të kenë frikë protestuesit nga bilanci përfundimtar i kësaj lloj “proteste paqësore”, dhe ata demokratë që thonë se nuk vijnë për dy orë protestë, që të kthehen në shtëpi?!
Po! E ka thënë shumë kohë parë lideri i demokracisë, Azem Hajdari: Komunzimi kur jeton, vret!
