Sot jam Sokol Mëngjesi!
nga Agim Popoci
Në shtetin e Edi Ramës mund të marrësh rrugën drejt Parisit për të nderuar viktimat e një akti terrorist, por, në asnjë mënyrë nëse ky akt bëhet në Tiranë, dhe për homazhe nuk jep urdhër Kryeministri!
Kjo vlen për fat të keq, edhe për ata që veten e quajnë klerik fetar dhe sot janë thjeshtë vegël në duart e Edi Ramës!
“Nuk ka Zot, nuk ka Profet dhe nuk ka fe që inkurajon vrasjen e njerëzve,” na tha Kryeministri Edi Rama nëntë vjet më parë në Marshin e Unitetit në Paris ndërsa ishin bërë homazhe për 12 punonjësit e vrarë të gazetës “Charlie Hebdo”, në Francën me 68.3 milionë banorë ku gërthiste “sot jemi të gjithë Francë”, dhe sot hesht në Shqipërinë me dy milionë banorë kur rrihet për vdekje një avokat, pasi mbi supe mbanë një mëkat të madh, është avokat edhe i Sali Berishës!
Thënë kështu, sepse pas një akti terrorist që bazuar në performancën barbare dhe numrin e popullsisë është shumë më i tmerrshëm se sa ai i Francës, ku as Zoti dhe as Profeti por Kryeministri, inkurajon vrasjen e njeriut që mendon ndryshe, dhe e pëson nga disa barbarë, avokat Sokol Mëngjesi, nuk reagoi as Edi Rama dhe as klerikët e tij, si për atë që u dhunua barbarisht dhe sot po lufton me jetën, ashtu dhe fëmijët me prindërit e tyre që panë tmerrin me sy duke u futur në kopsht!
Të tjerët, ç’është e vërteta nuk u terrorizuan si zakonisht me televizionet nën kontrollin e Edi Ramës, ku për vrasjet më ordinere dëgjonin fqinjët, pronarët e kafes së fshatit ose dhe dajot e viktimës, se si ndodhi ngjarja dhe kush e ka fajin, dhe natyrisht raporte dhe deklarata nga Spitali i Traumës ose QSUT ku përfundonte viktima; Por, as kjo nuk i ndihmoi që ta bëjnë një reagim logjik pa frikën nga Kryeministri!
Sepse, avokat Sokol Mëngjesi u dhunua për vdekje mëngjesin e 29 majit te Ish-Blloku në qendër të Tiranës, pamjet u transmetuan me njerëzit e tmerruar që shiheshin duke vrapuar me fëmijët në krah pa u kujtuar për njeriun e shtrirë në pellgun e gjakut, dhe këtu përfundoi e gjitha pasi për fatin e keq të avokatit, në këtë shoqëri të tredhur nga komunistët, ai ishte dhe avokat i Sali Berishës!
Dhe, jo vetëm që nuk u panë në media dëshmitarët okularë duke rrëfyer, jo vetëm që heshtën Kryeministri me klerikët e tij, por edhe kur e mori guximin Policia e Shtetit që të jep një deklaratë zyrtare, nuk kishte kush ta pyeste Drejtorin e Policisë së Tiranës se si është e mundur të goditet një njeri për vdekje në Ish-Bllok, të hip në taxi dhe të shkoj deri te Astiri nëpër këtë trafik ferri të Lali Erit, dhe të mos ndalohet nga askush, kur policia vjen të vë gjobën në këtë zonë edhe kur ndalon për tre minuta në një bankomat!
Apo, pse duhet ndaluar këta barbarë kur goditën avokatin e Sali Berishës?!
Nëse kësaj i shtojmë dhe versionin zyrtar se avokati Sokol Mëngjesi u godit sepse kishte fituar çështjen, dhe ata që kishin për ta paguar zgjodhën vrasjen para respektimit të kontratës për pagesë, situata bëhet shumë më komike pasi tragjikja bojatiset me ngjyrat e qeverisë së pistë të Edi Ramës!
Sot kur kanë kaluar pesë ditë nga dhuna barbare ndaj Sokol Mëngjesit, kur shqiptarët dëgjuan nga mediat nën kontrollin e Edi Ramës se Sokoli ishte avokat i Mirel Mërtirit por nuk e tha njeri se ishte dhe avokat i Kryepeshkopit Janullatos, kur propaganda rezulton e suksesshme dhe tre nga pesë autorët e këtij krimi barbar janë në kërkim, para gjykatës dolën dy nga autorët për të marrë masën e sigurisë me versionin e zbutur të akuzës, “plagosje e rëndë me dashje kryer në bashkëpunim dhe kundërshtim dhe goditja e gjyqtarit, kryer në bashkëpunim.”
Jo se akuza fillestare “vrasje të funksionarëve publik e mbetur në tentativë” nuk ishte reale, por nuk ishte akuzë që u përshtatet personave në kërkim kur tashmë dihet identiteti i tyre, duke pasur parasysh gjithmonë dhe faktin se ata e bënë për vdekje vetëm një avokat të Sali Berishës!
Madje kjo akuzë nuk i përshtatet as realitetit që e panë shqiptarët me sytë e tyre, sepse shqelmat barbar që u transmetuan duke i rënë kokës së avokat Sokolit të shtrirë për toke, dhunë komuniste mund të jetë por në asnjë mënyrë një mosrespektim i kontratës me përfaqësuesin ligjor!
Në fund, me trishtim duhet pranuar se e gjithë kjo dhunë komuniste nuk i shkoj dëm Edi Ramës dhe shpurrës së tij, kur Sokol Mëngjesi nuk do bëhet më sikur edhe zgjimi të rezulton i suksesshëm, pas një jave në koma!
Kur, për rastin e avokat Sokolit nuk guxon të flas as edhe një opozitar aleatë ose kundërshtar i Sali Berishës!
Dhe, derisa Edi Rama hesht dhe inkurajon vrasje ndër ata që nuk mendojnë si Kryeministri, rrahja për vdekje e një avokati, qoftë ai edhe i Sali Berishës, ka vetëm një përgjigje për njeriun e ekzaltuar me kokë kundërshtari të përmbytur në pellgun me gjak, në pragun e një kopshti fëmijësh:
Sot jam Sokol Mëngjesi!
