SPAK: Unë nuk jam politikan!
nga Agim Popoci
Vesi del me shpirtin! Pasi mori sëpatën për të hequr një shtyllë të KESH-it që pengonte ndërtimin e një rruge në Tiranë ndërsa burokracitë vazhdonin me qeverinë edhe pse ishte socialiste, u duartrokit shumë nga injorantët e tij komunistë që nuk e kanë dashur kurrë dhe nuk e duan Ligjin!
E lideri i tyre që po vinte, Edi Rama, me plotë gojë tha: Unë nuk jam politikan!
Në cilësinë e Kryetarit të Bashkisë Tiranë vendosi pengesa pneumatike te Kryesia e Parlamentit për të ndaluar fluksin drejt Bllokut në kohën kur Ambasadori i Hungarisë ishte në takim me Kryeministrin e kohës, Fatos Nano! Ambasadori nuk po dilte dot, policët bashkiak fodull kishin kompetencat e njeriut me sëpatë, por shumë shpejtë u gjetën nën pranga dhe u zhdepën dru; Në fund, normalisht nuk gëzuan mbrojtjen e sëpatarit të tyre që nuk ishte politikan!
I erdhi dita e zezë Shqipërisë, dhe po ky rrugaç u bë lider i opozitës, pengesat pneumatike nuk i kontrollonte dot ama mediat po! Publikoi një video ku shihej Zv.Kryeministri Ilir Meta duke numëruar lekë pafund, të cilat u interpretuan si Korrupsion. Meta dha dorëheqje, filluan hetimet por njeriu me sëpatë nuk e kishte për ves të priste. Mori ku janë e ku s’janë komunistët e tij dhe i vendosi si pengesa të gjalla para Kryeministrisë, aty ku nuk ishte më Fatos Nano por Sali Berisha!
Në krye të turmës nuk ishte vetë pasi Sigurimi i Shtetit aty kishte përqendruar dhunën, dhe ashtu siç ishte parashikuar, dhuna nga falangat komuniste dhe mbrojtja e institucioneve nga forcat e shtetit dolën jashtë kontrollit dhe mbetën të vrarë 4 persona!
Çuditërisht personi i korruptuar për të cilin u flijuan 4 komunistë, Ilir Meta, nuk përfundoi në pranga por në Qeverinë e Edi Ramës të cilën e formoi me ndërmjetësimin e Beogradit, duke rrëzuar Sali Berishën dhe pa pushuar duke përsëritur: Unë nuk jam politikan!
Edi Rama vazhdon edhe sot të thotë se nuk është politikan, por politika e tij qeverisëse detyroi mbi 700 mijë shqiptarë të largohen nga shteti që ai drejton!
Nuk jam politikan, është togëfjalëshi i Edi Ramës që nxjerr nga goja për çdo gjë, por me politikën e tij sot Rruga e Kombit është rruga e vetme të cilën shqiptarët e paguajnë për të lëvizur, dhe asnjë centimetër tjetër në tokën shqiptare.
Edi Rama vazhdon dhe përsërit duke menduar se e beson njeri, përveç morrave të kuq që po i pinë gjakun shqiptarëve, se nuk është politikan, ndërkohë politikat e tij degraduan dy shtresat sociale më të përvuajtura të komunizmit, pronarët dhe të përndjekurit politik.
Nuk jam politikan u tha dhe fqinjëve italianë dhe DEA-s që ishin të shqetësuar nga trafiku i narkotikëve, por, ndërkohë e kuptoi se nuk ka arsye ta kap sëpatën vetëm për t’iu drejtuar Lazaratit, kur mund ta mbyllë dhe të mbjellë me drogë të gjithë tokën shqiptare.
Mirë kultivimi, po si do bëhet me trafikun dhe shitjen! Gjithë zonën që u paraqitë si pengesë kryesore drejt Serbisë dhe tregut perëndimor, që nuk e kontrollonte policia e Sajme Qorrit ndonëse ishte shqiptare, pra, Dardania, e hodhi në treg ndërkombëtar për ta shitur edhe pse nuk ishte politikan!
Meqë rivalët politik nuk po i degdiste dot për shkak të burokracive ligjore dhe procedurave që kërkonin fillimisht prova, vendosi ti largoi nga skena politike me mënyrat e veta sepse ishin dhe pengesa kryesore e shitjes së kësaj pjese të tokës shqiptare! Dikush i vuri gishtin në plagë, dhe njeriu me sëpatë e pëlqeu sepse mund ta godiste mu në zemër malin që s’bëzanë: Drejtësinë!
Largoi të gjithë ata që u konsideruan njerëz të Saliut dhe Metës, e me gjithë mbetjen e sistemit të Drejtësisë vazhdoi luftën politike duke përsëritur vazhdimisht se nuk është politikan!
Thotë se nuk është politikan, por, krijoi SPAK-un vetëm me njerëzit e Zonës së I-rë Operative, madje nuk e la as një prokurore të vetme mbi Fushë Krujë që mburrej se Edi Ramën e ka mik dhe ha dreka vazhdimisht me të!
SPAK filloi punë dhe çuditërisht si dy pika uji me Edi Ramën filloi refrenin “unë nuk jam politikan”! Pse duhet një Prokurori e Posaçme të jetë politike këtë vetëm këta prokurorë të paaftë e dinë, por, pse është vërtetë politike dhe siç u akuzua pjellë e Sigurimit të Shtetit, dëshmoi rasti i fundit me hetimin e privatizimit të Kompleksit Partizani!
Filloi me propagandë mbi krimet e Sali Berishës ashtu siç gumëzhinte Edi Rama me brigadën e tij të kuqe nga viti 1996, ku për gjithçka kishte faj Saliu, për të përqendruar goditjet mediatike mbi pronat dhe krimet e pretenduara të të birit të tij, Xenit!
Kaluan dhjetë vjet gërmime dhe hetime mbi dhe nën tokë, dhe kur të gjithë morrat e kuq pritnin arrestimin e Xenit, shpërthen një skandal i madh në duart e kësaj bande kriminale që nuk ishte politike por drejtonte vendin me politikat e saj komuniste. Të gjithë filluan të flasin për inceneratorët që nuk ekzistojnë por për të cilët po paguhen plotë 430 milionë euro nga buxheti i shtetit që drejton ky që nuk është politikan!
Përkundër lojërave politike që inkorporoi me Lulzim Bashën, përçarjen e Partisë Demokratike dhe propagandën mbi degradimin moral të Sali Berishës deri dhe me “non grata” amerikane, besimin demokrat te Saliu nuk arriti ta dëmtoj ndërkohë kryefjalë e çdo lajmi ose bisede shqiptare ishte: Inceneratori!
Arrestoi ca protagonistë politikë por në publik dolën dokumente nga të gjithë ata që kjo bandë jopolitike por grabitçare nuk i kishte përfshirë në ndarjen e tortës inceneratore, dhe që dëshmonin se koka e krimit që firmos edhe deri në 17 VKM në ditë vetëm për këtë krim ishte, Edi Rama!
Me politikanët e paaftë që i mbetën vërdallë, me SPAK-un tërësisht politik që nuk kishte dhe nuk ka lidhje me drejtësinë, në vesh i sollën dhe një arrestim të mundshëm që lidhet me Saliun ndonëse nuk kishte të bënte as me Xenin dhe as familjarët e tij, por, që do të shpërqendronte vëmendjen nga ky Skandal që doli jashtë kontrollit!
Përveç se dhëndër i Saliut, kishte elementin që më së shumti ngjitë tek elektorati i tij llum, që vazhdon dhe urren për vdekje kategorinë më cilësore të shoqërisë, pronarin!
Ishte ky Jamarbër Malltezi, i cili, përveç se kishte horoskopin të jetë i martuar me të bijën e Saliut, kishte dhe gjyshin tirons të vjetër dhe trashëgimtarë të shumë pronave!
Në betejën për kthimin dhe kompensimin e pronave, Malltezit i takoi që si trashëgimtar i pronave të jetë përfitues i pronave që mbajnë firmën e Saliut Kryeministër! Ashtu siç i takoi Saliut të firmos MSA-në, anëtarësimin në NATO dhe liberalizimin e vizave, që nuk ishin faj i tij, por, fundi i një procesi kur atij i ra për hise të jetë Kryeministër, ashtu ndodhi me fundin e procesit të privatizimit të Kompleksit Partizani.
Pa pasur nevojë të theksohet se njohjen e pronës pronarëve nuk e kishte bërë Saliu por ishte Kryeministër kur u bë kthimi, nëse sot Saliu akuzohet pse mori në telefon një zyrtar ose ministër lidhur me këtë proces pa i shkaktuar dëm shtetit shqiptar, Sali Berisha do të myket në burg nëse numërohen dhe identifikohen tabulatet e thirrjeve telefonike që ai i ka bërë zyrtarëve dhe ministrave për anëtarësim në NATO dhe liberalizim të vizave.
Sot, shqiptarët gëzojnë jetën të sigurt nën ombrellën e Aleancës politiko-ushtarake më të fuqishme në botë, ashtu si dhe lëvizjen e lirë në Zonën Schengen, por “tortura” deri në arritjen e këtij qëllimi duhet vetëm të përjetohet sepse komunistët e SPAK-ut këtë nuk e konceptojnë dot; Aq më shumë kur bëhet fjalë për lëvizjen e lirë, nga ana e njerëzve që as mendimin nuk e kanë të lirë!
Ndryshe, nuk do të kërkonin kufizimin e lëvizjes së një deputeti pavarësisht nëse kishin porosi ose jo nga Edi Rama! Sepse nuk ka prokuror në Shqipëri, madje as ata që nuk janë nga Zona e I-rë Operative dhe Edi Rama i ka larguar nga sistemi i drejtësisë, që nuk e dinë se për privimin e kësaj lirie, duhet të kërkohet leje nga Parlamenti!
Po ja që SPAK-u përveç se politik është dhe kriminal, dhe në gjirin e saj mbanë dhe ushqen hetues të Sigurimit të Shtetit nga koha e diktaturës së Enver Hoxhës!
A është ky ndonjë mëkatë?! Sot, jo, sepse sistemi në të cilin vepron SPAK është shumë më shumë diktatorial për drejtësinë se Hetuesia ku punonte prokurori Arben Kraja!
Sot, tashmë u konfirmua, se nga të gjitha vendimet që janë dhënë gjatë procesit të privatizimit të Kompleksit Partizani, SPAK ka fshirë emrin e Edi Ramës, në atë kohë Kryetar i Bashkisë Tiranë. Dhe, meqë procesi mori fund, SPAK vlerëson se Kryeministri Sali Berisha, duhet të ketë ndikuar sepse ka favorizuar pronarët!
Meqë kjo ka ndodhë, pse SPAK nuk i kufizon lëvizjen Edi Ramës dhe ta akuzoj që po favorizon investitorët strategjik, jo duke ju kthyer por duke ju falë prona, deri dhe një shtetasi arab që merr dhuratë Portin e Durrësit!
Apo, SPAK ashtu si dhe shefi i tyre në detyrë Kryeministër, mund të shfajësohet nga gjithë kjo batërdi drejtësie që krijoi duke u arsyetuar: Nuk jam politikan!
Qytetarët tjerë shqiptarë, që janë normal dhe lexojnë, janë të qartësuar si me veprimet e Edi Ramës ashtu dhe SPAK-ut nga Thomas Hobbes i cili shumë kohë më parë e ka thënë dhe shpjeguar në detaje:
Pushteti, dhe jo e vërteta, bëjnë Ligjin!
