Spiunazh dhe Shantazh, ngritet aktakuzë ndaj Fatmir Shehollit
Prokuroria Speciale e Kosovës ka ngritur aktakuzë ndaj Fatmir Shehollit për dy vepra penale: “Spiunazh” dhe “Shantazh”.
Sipas aktakuzës, Sheholli, nga një datë e papërcaktuar e deri më 9 tetor 2025, në cilësinë e personit të rekrutuar nga Shërbimi Informativ i Serbisë, i njohur si “BIA”, e ka ndihmuar veprimtarinë e këtij shërbimi, duke vepruar sipas urdhrave dhe detyrave të zyrtarëve të tij.
“I pandehuri F.Sh. akuzohet se ka mbledhur, siguruar dhe përcjellë përmes mesazheve telefonike të dhëna, informacione dhe dokumente lidhur me aktivitetet politike, gjendjen e sigurisë dhe funksionimin e institucioneve të Republikës së Kosovës. Po ashtu, F.Sh. akuzohet për veprën penale “Shantazh”, pasi gjatë vitit 2022 deri në dhjetor 2025, e ka shantazhuar të dëmtuarin A.J., duke e detyruar të veprojë në dëm të pasurisë së tij, në shumën që tejkalon 13.000 euro”, thuhet në njoftimin e Prokurorisë Speciale.
Sipas aktakuzës, Fatmir Sheholli i ka kërkuar të dëmtuarit para në emër të huazimit, duke e kërcënuar se, në rast të mosdhënies së parave, do të publikonte në media video-incizime dhe informacione që do t’i dëmtonin rëndë nderin, reputacionin dhe autoritetin e të dëmtuarit.
Rasti i ka kaluar për shqyrtim Gjykatës Themelore në Prishtinë, ndërsa i pandehuri ndodhet nën masën e paraburgimit.
Aktakuza e Prokurorisë, Sheholli dhe raportet me Radoiçiçin
Prokuroria Speciale e Kosovës në aktakuzën e ngritur ndaj Fatmir Shehollit për veprat penale të spiunazhit dhe shantazhit, ka përfshirë edhe një sërë paraqitjesh publike dhe deklarimesh të tij lidhur me Milan Radoiçiçin.
Sipas aktakuzës, një raport informues i Policisë së Kosovës, i hartuar mbi bazën e informacioneve të mbledhura nga burime të hapura, evidenton deklarime, intervista dhe paraqitje publike të Shehollit, të cilat Prokuroria i ka përfshirë në materialin provues të rastit.
Në raport, sipas aktakuzës, i kushtohet vëmendje e veçantë deklarimeve të Shehollit për Radoiçiçin, i cili kërkohet nga organet e drejtësisë në Kosovë, raporton RTK.
Sipas aktakuzës, në disa paraqitje publike Sheholli kishte shprehur besim në pafajësinë e Milan Radoiçiçit lidhur me hetimet për vrasjen e politikanit serb të Kosovës, Oliver Ivanoviç.
Në materialin e përfshirë në aktakuzë thuhet se Sheholli kishte deklaruar se Radoiçiçit duhej t’i jepej mundësia për ta dëshmuar pafajësinë e tij.
Po ashtu, Prokuroria i referohet paraqitjeve të tjera mediale të Shehollit, në të cilat, sipas saj, ai e kishte paraqitur Radoiçiçin si një person me ndikim pozitiv në veriun e Kosovës.
Këto deklarime janë përfshirë në raportin e Policisë së Kosovës, të cilin Prokuroria e ka paraqitur si pjesë të provave në aktakuzën për spiunazh.
Në aktakuzë përmendet gjithashtu një paraqitje televizive e vitit 2023, ku Sheholli kishte zhvilluar një bisedë telefonike të transmetuar drejtpërdrejt me një person të identifikuar në material si Milan Radoiçiç.
Sipas Prokurorisë, raporton RTK, telefonata ishte transmetuar më 11 qershor 2023 në emisionin “Kojshia Show”.
Në aktakuzë thuhet se gjatë kësaj bisede janë përcjellë deklarime lidhur me praninë e Radoiçiçit në territorin e Republikës së Kosovës, në kohën kur ndaj tij ishin aktive procedurat dhe masat e kërkimit nga organet e drejtësisë.
Prokuroria e ka përfshirë këtë material në raportin informues të Policisë së Kosovës, së bashku me intervista, artikuj dhe materiale audio-vizuale të tjera që lidhen me paraqitjet publike të Shehollit.
Sipas aktakuzës, raporti informues i Policisë së Kosovës është hartuar mbi bazën e të dhënave dhe materialeve të publikuara në burime të hapura.
Prokuroria pretendon se këto materiale, të analizuara në tërësinë e tyre dhe të ndërlidhura me provat e tjera të rastit, mbështesin dyshimin se Sheholli ka zhvilluar veprimtari të vazhdueshme të ndikimit në opinionin publik në favor të interesave shtetërore dhe politikave të Serbisë.Fatmir Sheholli akuzohet nga Prokuroria Speciale për veprat penale të spiunazhit dhe shantazhit.
