Sulmi në Banjskë, ngrihet aktakuzë ndaj 45 personave

Prokuroria Speciale e Kosovës ka ngritur aktakuzë për sulmin e 24 shtatorit në Banjskë të Zveçanit, ku mbeti i vrarë polici Afrim Bunjaku.

Aktakuza u ngrit rreth një vit pas sulmit në Banjskë.

Kryeprokurori i Prokurorisë Speciale, Blerim Isufaj, tha se aktakuza është ngritur ndaj 45 personave.

“Prokuroria Speciale ka punuar intensivisht duke zhvilluar hetime në këtë rast shumë kompleks. Pas grumbullimit të gjitha provave dhe analizimit të tyre, sot kemi ngritur aktakuzë kundër 45 të pandehurve. Për ta ngritur aktin na u është dashur të presim gjatë, ndoshta edhe një vit. Pranimi i rezultateve të ekzaminimeve që janë kryer jashtë vendit, ishte shkaku kryesor i vonimit të ngritjes së aktakuzës,” tha Kryeprokurori Isufaj.

“Në mesin e të akuzuarve kryesorë është edhe individi me pozitë kyçe si udhëheqës i grupit, Milan Radoiçiç, i cili ka luajtur rol të rëndësishëm në koordinimin dhe veprimtarinë kriminale,” tha sot prokurori i rastit, Naim Abazi, por nuk përmendi përfshirjen e mundshme të udhëheqjes së Serbisë në sulm.

Prokurori Abazi tha me këtë rast se falë bashkëpunimit ndërkombëtar me SHBA dhe shtetet e BE-së, prokuroria ka arritur të sigurojë prova që ndihmuan në ngritjen e kësaj aktakuze, sipas tij, të fuqishme.

Gjatë procesit të hetimeve, sqaroi ai, janë konfiskuar mbi 1.266 armë dhe pajisje të tjera, prona, automjete të blinduara, para të gatshme dhe llogari bankare, të cilat dyshohet se janë fituar nga aktivitete të paligjshme.

“Ky veprim ka për qëllim të parandalojë përdorimin e këtyre aseteve për aktivitete të mëtejshme kriminale, duke goditur strukturën financiare të këtij grupi kriminal,” tha prokurori Abazi ndërsa sa i përket veprës penale të pastrimit të parave, hetuesit kanë zbuluar se fondet janë transferuar nëpërmjet rrjeteve të ndërlikuara financiare, duke përfshirë biznese të regjistruara në emra të personave të tretë dhe investime në pasuri të paluajtshme.

“Nga kjo aktakuzë, presim që të gjithë të përfshirët në këtë rast të mbahen përgjegjës për veprimet e tyre,” tha Prokurori i rastit Naim Abazi.

Ndryshe, në orët e para të 24 shtatorit të 2023-tës, në fshatin Banjskë të Zveçanit, policia kishte vërejtur se ishin vendosur dy kamionë me anë të cilëve ishte bllokuar rruga.

Gjatë ndërhyrjes së policisë, grupi kriminal serbë kishte shtënë në drejtim të Policisë së Kosovës, me ç’rast ishte vrarë polici Afrim Bunjaku, si dhe ishte plagosur zyrtari policor, Alban Rashiti.

Në përleshjet e armatosura u vranë edhe tre sulmues serbë, të cilët në Serbi u pritën si heronjë.

Pse Policia e Kosovës i la terroristët tjerë të ikin, kur i kishte në shënjestër, ngelet e paqartë edhe pas ngritjes së kësaj aktakuze.