Tallja me demokracinë, ata që nuk duan ta konstituojnë Parlamentin shkojnë në takim me Haxhiun, opozita…
Në hall nuk është vetëm Kosova me këtë klasë politike që po ushtron demokracinë por edhe ata që ligjërojnë demokracinë në universitete të ndryshme të botës dhe duhet të sqarojnë se demokracia prodhon edhe kaos, kur bie në duart e atyre që nuk e duan shtetin, por, Partinë!
Atë që demonstroi sot partia fituese, Lëvizja Vetëvendosje është për Psikolog, kjo nuk ka lidhje me Politikë, në veçanti pas takimit ku morën pjesë vetëm partitë e koalicionit që do bëjnë qeverinë por nuk duan ta konstituojnë Parlamentin, kur U.D.Presidentit, Albulena Haxhiu, del dhe pa pikë turpi dhe e pashqetësuar pse nuk mori opozita përkatësisht PDK, LDK dhe Aleanca, thotë se në takim morën pjesë liderët e 11 partive!
“Ishin 11 liderë të partive politike që përfaqësohen në Kuvend. Qëllimi i takimit ishte të shohim nëse kemi ndonjë rrugë për të ecur bashkë, për ta shmangur ngërçin institucional dhe zgjedhjet e parakohshme. Ju e dini që para nesh janë dy qëndrime politike. Kemi qëndrimin e Vetëvendosjes dhe partnerëve që, nëse hyjnë në konstituimin e Kuvendit pa marrëveshje për presidentin, mund të përsëritet kriza e vitit të kaluar dhe e këtij viti,” tha Albulena Haxhiu duke theksuar qëndrimin e PDK-së, LDK-së dhe Aleancës që Parlamenti të konstituohet dhe pastaj të diskutohet.
“Çështja që duhet ta trajtojmë me seriozitet është çështja e presidentit. Kryeministri Kurti e theksoi se i ka votat për kryetarin e Kuvendit dhe Qeverinë dhe çështja është te marrëveshja për presidentin,” tha U.D. Presidentes duke u munduar ta bind opinionin se është e bindur për atë që flet, madje edhe kur thotë se partitë politike duhet të nisin diskutimet për gjetjen e një kandidati konsensual për pozitën e Presidentit.
Por, hall i Kosovës nuk është vetëm Lëvizja Vetëvendosje që ka fituar, i ka votat për koalicion qeverisës dhe nuk do që ta konstituon Parlamentin, por, edhe ajo që quhet opozitë, PDK, LDK, Aleanca, dhe nuk është e qartë se çfarë do!
Albulena Haxhiun nuk e njohin si U.D. Presidente sepse është zgjedhur deputete dhe mbanë dy poste, gjë që Kushtetuta e Kosovës nuk e lejon, por nga ana tjetër i drejtohen asaj pikërisht si U.D.Presidentes “në bazë të kompetencave që ka”, dhe i dorëzojnë propozimet për anëtarë të Komisionit Qendror të Zgjedhjeve, si PDK ashtu dhe LDK.
Në këtë terren të sëmurë psiqik vend zuri edhe kryesuesi i seancës, deputeti më i moshuar Avni Dehari, i cili ka ngatërruar sërish kompetencat që i jep mosha me atë kryesuesit dhe vazhdon i jep leksione 120 të paaftëve që vazhdojnë dhe kontaminojnë Kosovën me ide nga më të ndryshmet konstitucionale, por, Parlamentin nuk e konstituojnë dot.
Ndryshe, veprimet politike me dështimin e dy zgjedhjeve nga 9 shkurti i vitit 2025 që shtynë Kosovën edhe në zgjedhjet e treta me 7 Qershor me një pjesëmarrje ekstremisht të ulët, vetëm 37%, nuk tregon se kjo klasë politike është e papjekur, çështja është shumë më serioze se sa një fatkeqësi kur pushteti bie në duart e një gomari, si ai i Babatasit!
