Tatimet, doganat dhe bashkitë nisin zbatimin e ligjit për faljen e detyrimeve. Afatet për pagesat

Pas daljes së Udhëzimit të Ministrisë së Financave, institucionet me radhë kanë njoftuar nisjen e zbatimit e ligjit nr. 86/2025 për faljen e detyrimeve të papaguara në tatime, dogana dhe taksat vendore.

Bashkia e Tiranës, përmes Drejtorisë së Përgjithshme të Taksave dhe Tarifave vendore njofton qytetarët pronarë të njësive tregtare dhe bizneset, që rezultojnë debitorë për detyrimet vendore se mund të përfitojnë nga fshirja e plotë ose e pjesshme e detyrimeve, si dhe nga falja e gjobave dhe kamatëvonesave, sipas periudhës së krijimit të tyre.

Sipas përcaktimeve të ligjit, detyrimet që i përkasin periudhës deri më 31 Dhjetor 2014 fshihen plotësisht, pa kryer asnjë pagesë dhe pa pasur nevojë për asnjë veprim nga ana e taksapaguesit vendor.

Për detyrimet e periudhës 1 Janar 2015 – 31 Dhjetor 2019, parashikohen dy alternativa për përfitim:

-pagesa e 50% të principalit deri më 30 Qershor 2026, me faljen e pjesës tjetër,

-ose pagesa e 75% të principalit deri më 31 Dhjetor 2026, me faljen e pjesës së mbetur.

Në të dy rastet falen të gjitha gjobat dhe kamatëvonesat.

Gjithashtu, në rastet kur principali është paguar më herët dhe kanë mbetur vetëm gjoba apo kamatëvonesa, edhe këto detyrime falen.

Për detyrimet e krijuara në periudhën 1 Janar 2020 – 31 Dhjetor 2024 kërkohet pagesa e plotë e principalit deri më 31 Dhjetor 2026. Pas kryerjes së pagesës, falen gjobat dhe kamatëvonesat.

Drejtoria e Përgjithshme e Taksave dhe Tarifave Vendore u bën thirrje qytetarëve dhe bizneseve që, gjatë kryerjes së pagesës, të specifikojnë me patjetër në përshkrim se pagesa po realizohet në bazë të ligjit të faljes.

Taksapaguesit mund të kontrollojnë detyrimet e tyre përmes platformës e-Albania. Për çdo paqartësi ose informacion të mëtejshëm, taksapaguesit kryqytetas mund të shkruajnë në adresën elektronike taksat@tirana.al ose të paraqiten pranë sporteleve fizike të Drejtorisë së Përgjithshme të Taksave dhe Tarifave Vendore.

Nga kjo falje përjashtohen subjektet që janë dënuar me vendim gjyqësor të formës së prerë ose janë në proces gjyqësor apo hetim penal për vepra në fushën tatimore dhe doganore.

Dogana: Kush paguan deri më 30 Qershor 2026, përfiton falje deri në 50% të principalit

Edhe Drejtoria e Përgjithshme e Doganave (DPD) ka njoftuar për nisjen e aplikimeve për pagesat e pjesshme me qëllim përfitimin e pjesës së mbetur të principalit.

Sipas DPD-së për aplikimet bizneset e interesuara duhet të drejtohen pranë degëve doganore për të nisur procedurat e aplikimit dhe mjafton një vërtetim i gjendjes gjyqësore.

“Nëse paguan deri më 30 Qershor 2026, përfiton falje deri në 50% të principalit dhe 100% të gjobave dhe kamatëvonesave. Mos prit afatin e fundit, apliko sa më parë pranë degëve doganore”, njoftoi administrta doganore.

Tatimet: Gati brenda 20 ditëve lista e plotë e subjekteve që përfitojnë nga fshirja e detyrimeve

Administrata Tatimore njoftoi më herët se të gjithë tatimpaguesit se, brenda 20 ditëve nga hyrja në fuqi e këtij udhëzimi, do të hartohet lista e plotë e subjekteve që përfitojnë nga fshirja e detyrimeve tatimore, si dhe e atyre që nuk përfitojnë. Njoftimi përkatës do t’u përcillet tatimpaguesve elektronikisht nëpërmjet sistemit “e-Filing”.

Pas përfundimit të procesit të hartimit dhe njoftimit të listave, Administrata Tatimore do të vijojë me kompensimin automatik të tepricës kreditore të TVSH-së ose të tatimeve të tjera me detyrimet tatimore të subjekteve.

Kategoritë e detyrimeve që përfitojnë nga fshirja/shuarja

Detyrimet tatimore deri më 31 dhjetor 2014
Fshihen plotësisht detyrimet tatimore të papaguara që i përkasin periudhave tatimore deri më 31.12.2014, përfshirë gjobat dhe kamatëvonesat. Për kontributet e sigurimeve shoqërore dhe shëndetësore nuk falet detyrimi principal.

Detyrimet tatimore për periudhën 1 janar 2015 – 31 dhjetor 2019
-Shuhet 50% e detyrimit principal, nëse 50% e mbetur paguhet njëherësh nga 10.06.2026 deri më 30.06.2026;
-Shuhet 25% e detyrimit principal, nëse 75% e mbetur paguhet nga 10.06.2026 deri më 31.12.2026.Në të dy rastet, gjobat dhe kamatëvonesat fshihen plotësisht.
Në të dy rastet, gjobat dhe kamatëvonesat fshihen plotësisht.

Detyrimet tatimore për periudhën 1 janar 2020 – 31 dhjetor 2024
Fshihen gjobat dhe kamatëvonesat me kusht që tatimi për periudhën përkatëse të paguhet i plotë (100% e principalit) nga data 10.06.2026 deri më 31.12.2026.

Përfitime të tjera të parashikuara nga ligji
Sipas ligjit nr. 86/2025:

Fshihen detyrimet për subjektet e çregjistruara në QKB ose me vendim gjykate deri më 31.12.2024, pervec kontributeve te sigurimeve shoqerore dhe shendetesore;

Fshihen gjobat për mosdeklarim ose deklarim të vonuar të deklaratave që i përkasin periudhave deri në 31.12.2024, me kusht që deklaratat e padorëzuara të dorëzohen deri më 30.06.2026;

Fshihen gjobat për dorëzim të vonuar të pasqyrave financiare dhe vendimit për destinimin e rezultatit, të llogaritura deri më 31.12.2024;

Fshihen gjobat dhe interesat e krijuara nga ndryshimet e listëpagesave si pasojë e akteve ligjore/nënligjore me efekt prapaveprues ose vendimeve gjyqësore të formës së prerë.

Fshihen gjobat administrative për periudhat deri më 31.12.2024.

Subjektet që nuk përfitojnë
Nuk përfitojnë nga fshirja/shuarja e detyrimeve subjektet që:

Janë dënuar me vendim gjyqësor të formës së prerë për vepra penale në fushën tatimore dhe/ose doganore;

Janë në proces gjyqësor ose hetimi për vepra penale tatimore dhe/ose doganore gjatë periudhës së zbatimit të ligjit;

Kanë vendim gjyqësor të formës së prerë në favor të Administratës Tatimore apo Doganore për detyrimet objekt përfitimi.

Tatimpaguesit që janë në proces ankimi administrativ ose gjyqësor mund të përfitojnë nga dispozitat e ligjit vetëm nëse heqin dorë nga ankimi administrativ ose nga e drejta e padisë, ankimit ose rekursit, sipas përcaktimeve ligjore. Paraqitja e aktit nga ana e subjektit, do të kryhet me kërkesë zyrtare pranë Drejtorisë Rajonale Tatimore përkatëse, duke filluar nga data 10.06.2026 përpara kryerjes së pagesës së detyrimit principal, por jo më vonë se data 30.11.2026.

Administrata Tatimore fton të gjithë tatimpaguesit të verifikojnë situatën e tyre financiare në sistemin “e-Filing” dhe të kryejnë pagesat sipas afateve të publikuara, me qëllim përfitimin nga lehtësitë e parashikuara në ligj./Monitor/