Tensione në Veri, Policia: Protestuesit, dhunë dhe gaz lotsjellës! Ambasadori amerikan takim…

Mëngjesi i sotëm ka filluar me tensione dhe dhunë serbe para godinave të komunave në veri të Kosovës. Policia e Kosovës ka njoftuar se protestuesit në forma të organizuara janë tubuar para objekteve të komunave në veri, Leposaviç, Zubin Potok dhe Zveçan.

Para objektit të komunës së Zveçanit, protestuesit duke shfaqur dhunë dhe duke hedhur gaz lotsjellës kanë tentuar të kalojnë kordonët e sigurisë për tu futur me dhunë në objektin e komunës, njoftoj Policia.

“Policia është detyruar të përdorë mjetet e ligjshme si sprej-in, për të ndaluar protestuesit dhe për të vënë situatën nën kontrollë”, thuhet në njoftim.

“Angazhimet policore në zbatimin e rendit dhe sigurisë publike, ofrimi sigurisë ndaj qytetarëve, liria e lëvizjes së lirë si dhe ndërmarrja e masave policore konform situatës dhe zhvillimeve në veri të vendit, do të vazhdojnë të mbesin ndër objektivat dhe detyrat primare të Policisë së Kosovës.

Policia e Kosovës është duke menaxhuar situatën, njëkohësisht fton qytetarët që të kenë vëmendje dhe kujdes të shtuar përgjatë thirrjeve të protestave, të protestojnë në mënyrë të qetë dhe të mos bien pre e provokimeve të mundshme, të çfarëdo natyre qofshin ato”, thuhet në reagimin e Policisë.

Ndërkohë mëngjesin e sotëm janë parë forca të KFOR-it dhe Policisë së Kosovës Rrugës për në Komunën e Zubin Potokut dhe para kësaj godine.

Hovenier takim kryetarët e rinj të veriut

Ambasadori amerikan në Prishtinë, Jeffrey Hovenier, ka thirrur në takim tre kryetarët e rinj shqiptarë të Zveçanit, Leposaviçit dhe Zubin Potokut.

Kreu i Zubin Potokut, Izmir Zeqiri, tha se do të marrë pjesë në takim me ambasadorin Hovenier dhe përfaqësues të tjerë diplomatikë.

Zeqiri tha se takimi do të mbahet në ora 9:00 në zyrën e Bashkimit Evropian në Prishtinë.

I pyetur nëse gjatë ditës do të shkojë në zyrën e tij në objektin e komunës së Zubin Potokut, Zeqiri, tha se nuk mund ta di tani për tani.

“Nuk e di nëse do të shkoj në zyre sot. E kam agjendë shumë të ngjeshur. Ta shohim gjatë ditës”, tha Zeqiri, që është nga radhët e Partisë Demokratike të Kosovës ndërkohë kryetarët e tjerë nuk e kanë konfirmuar pjesëmarrjen në këtë takim.

Ndryshe, sot ashtu siç kishte paralajmëruar Presidenti i Serbisë, Aleksandar Vuçiç, grupe të serbëve lokalë janë mbledhur para godinave të komunave në veri për të kundërshtuar kryetarët e rinj shqiptarë.

Para këtyre godinave, përveç Policisë së Kosovës ka prezencë të shtuar të pjesëtarëve të misionit të NATO-s në Kosovë, KFOR.