Thërret Batoni o Albin!
nga Agim Popoci
Kryeministri Edi Rama i sugjeron BE dhe Shteteve të Bashkuara që të mos i bëjnë presion Presidentit të shkretë të Serbisë, Aleksandar Vuçiç, se ai vetëm kos po hanë dhe pa Rusinë nuk jeton dot!
Nga ana tjetër dora e djathtë e Edi Ramës, i kudondodhuri ndër negociatat shqiptaro-serbe tashmë pa harta në dorë, Baton Haxhiu, publikon një plan franko-gjerman me 13 pika duke i ofruar Kosovës një njohje nga Serbia pas 10 vjetësh!
Pas lançimit të Planit enigmatik nga Batoni dhe deklaratës së Presidentit të Serbisë, Aleksandar Vuçiç, se nuk e kishte lexuar por e kishte hedhur poshtë, kur kjo, siç u quajt, Kornizë e re e dialogut, i ishte afruar nga të dërguarit e Scholzit dhe Macronit për dialogun Kosovë-Serbi, Kryeministri i Kosovës, Albin Kurti, tha se nuk është as e dobishme e as drejtë që t’i komentoj ato dokumente që nuk kanë autor, por bëhen për të matur pulsin e qytetarëve dhe politikanëve!
Dokumenti që lançohet nga Baton Haxhiu për metodologjinë e njohjes së Kosovës nga Serbia, pas përvojës me atë të shkëmbimit të territoreve, nuk është për të matur pulsin e qytetarëve dhe politikanëve, por është një dokument që publikisht duhet hedhur poshtë pikërisht nga Albin Kurti, për ti bërë me dije Edi Ramës dhe Aleksandar Vuçiçit se ata mund të bien dakord për shumë dokumente, edhe për ato propozime që kishin ra dakord mbrëmjen e 20 shtatorit në New York para se të takohen me shefin e diplomacisë evropiane, Josep Borrell, por për asgjë që kanë të bëjnë me Kosovën!
Ndryshe, Batoni me Ramën kanë iluzione se kur thërrasin Albinin, mendojnë se do t’rrijnë me Kryeministrin e Kosovës pasi e kanë vëlla, duke marrë edhe Durrësin dhe Tiranën nëse është nevoja, vetëm për ta gëzuar nanën Serbi me Presidentin e saj Aleksandar Vuçiç!
Duke korrigjuar veten nga Plani për shkëmbimin e territoreve, kur Batoni me urdhër të Edi Ramës shëtiti me harta në dorë nga Adem Demaçi e deri tek Presidenti i Republikës së Shqipërisë, Ilir Meta, por shpërfilli opozitarin Albin Kurti meqë e quajti punë të kryer, e që ditë më parë edhe vetë Presidenti i Serbisë, Aleksandar Vuçiç, e pranoi se ishte dakord, sot ai vjen me një plan më të sofistikuar për promovimin e një projekti sa djallëzor aq edhe të dobishëm për Vuçiçin që është nën presion ndërkombëtar për shkak të rrethanave gjeostrategjike që janë krijuar!
Meqë po thërret Batoni, Kryeministri i Kosovës, Albin Kurti, për të mos i lënë asgjë rastësisë, 9 vjet pas Marrëveshjes së Brukselit, ku garantuesit heshtin edhe pse nuk zbatohet asgjë kjo marrëveshje, duhet ti bëjë të qartë Edi Ramës dhe krahut të tij të djathtë, se n’kala shqiptarët s’bashku vazhdojnë t’ rrinë nga Peja e Gjakova, Drenicë, Llapi dhe Rugova, deri te Ferizaji edhe Klina.
Kjo edhe mund ti duket folklorike Edi Ramës përderisa këshillohet nga Batoni, por si modelin e dy Gjermanive ashtu dhe Asociacionin, nëse pranohet, e bëjnë të zbatueshëm shqiptarët dhe jo batonët që harrojnë kompromiset e dhimbshme që janë pranuar me Planin e Ahtisarit!
Dhe, janë po këta shqiptarë që pyesin jo ku është Batoni e e Edi Rama por ku janë ata që kanë garantuar Marrëveshjen e Brukselit kur u firmos në vitin 2013, dhe ku do të jenë Sholtz dhe Macron pas 10 vitesh që do të kurorëzojnë njohjen e shtetit të Kosovës nga Serbia!
Sot, pavarësisht se si pushteti ashtu dhe opozita serbe e hedhin poshtë këtë Kornizë të re të dialogut, në mungesë të një Franjo Tuxhmani që shkrinë “jo-të serbe”, shqiptarët të gjithë së bashku, nga Mitrovica në Prevezë, duan të dëgjojnë Albin Kurtin që deri më sot nuk u ka shitë asnjë pëllëmbë të tokës shqiptare, se asgjë nuk do të vendoset pa lejen e tyre.
Sot, thërret Batoni o Albin, kujdes, Hashim Thaçi nuk shkoi në Hagë sa kishte në krah Fatmir Limën e Kadri Veselin, por kur filloi të shoqërohet me Batonin dhe këlyshët e tij!
Po, Hashim Thaçi nga non grata për të dal në RTK u bë dhe boss i saj dhe gjithë televizioneve kombëtare në Shqipëri; Por, kjo ishte dhe kthesa e rrënimit të karrierës së tij politike, kur filloi të firmos gjithçka që i vihej përpara, nuk i lëvizi qerpiku kur doli Shtëpia e Verdhë, as Gjykata Speciale dhe as Asociacioni në Marrëveshje, dhe sot Batoni e cilëson si negociator të mrekullueshëm.
Mund të ishte i tillë, dhe këtë nuk e vënë njeri në dyshim, por një gjë harroi duke pasur në krah Batonin, se në negociata përfaqësohen interesat e shqiptarëve, dhe, për inat të askujt!
