Tiranë, mbërrin Izet Haxhia, i dënuar për vrasjen e Azem Hajdarit

Mbërrin në aeroportin “Nënë Tereza” në Rinas, Izet Haxhia, i dënuar me 25 vite burg si një nga autorët e vrasjes së deputetit Azem Hajdari në shtator 1998. Ai u ekstradua nga autoritetet turke këtë të martë pas një vendimi të Gjykatës së Lartë të Stambollit.

                                                          Sqarimi i policisë

Policia e shtetit ka bërë sqarimin e parë zyrtar pas ekstradimit në Shqipëri të Izet Haxhisë, njërit prej personave të dënuar për vrasjen e Azem Hajdarit 20 vjet më parë. Në njoftimin zyrtar thuhet se specialistët e Interpol Tirana bënë të mundur ekstradimin nga Turqia drejt Shqipërisë të shtetasit shqiptar Izet Haxhiaj, 52 vjeç, lindur në Babinë, Tropojë.

“Shtetasi Izet Haxhiaj është shpallur në kërkim ndërkombëtar, pasi Gjykata e Rrethit Gjyqësor Tiranë me vendim penal nr. 316, datë 29.04.2002 e ka dënuar me 25 vjet burg për veprat penale “Vrasje në rrethana të tjera cilësuese e kryer në bashkëpunim”, “Vrasje me paramendim e kryer në bashkëpunim” dhe “Vrasje me paramendim të mbetur në tentativë, e kryer në bashkëpunim”, parashikuar nga nenet 79/c-25, 78-25 dhe 78-25/22 të Kodit Penal”.

Në datë 12.09.1998, rreth orës 21:15, pranë ish Selisë Qendrore të Partisë Demokratike në Tiranë, janë vrarë me armë zjarri Azem Hajdari, deputet i Kuvendit të Shqipërisë, Besim Çerja. truproja e tij dhe është plagosur rëndë shtetasi tjetër Z. N.

Hetimet kanë zbuluar se Izet Haxhiaj, ka qenë një prej autorëve të kësaj ngjarjeje, thotë policia.