Transformimi i DPA/ Dixhitalizimi, garanci për ruajtjen e dokumenteve arkivore origjinale
Mbi 200 milionë dokumente arkivore për shqiptarët dhe historinë e shtetit shqiptar, deri dje vështirësisht të depërtueshme, sot janë lehtësisht të aksesueshme në Drejtorinë e Përgjithshme të Arkivave, DPA, falë jo vetëm transformimit të ambienteve, por edhe sistemit të dixhitalizimit të dokumenteve arkivore.
Këtë transformim e pa sot nga afër edhe Kryeministri Edi Rama ku vizitoi ambientet e reja tërësisht të modernizuara të Drejtorisë së Përgjithshme të Arkivave, ku të pranishëm ishin edhe studiues dhe historianë.
Drejtori i Përgjithshëm i Arkivave, Ardit Bido, theksoi se dixhitalizimi ka rritur sigurinë në ruajtjen e dokumenteve origjinalë, por njëherësh i ka bërë edhe më të hapura arkivat për publikun, duke shpjeguar edhe procedurën online të regjistrimit dhe kërkimit të dokumenteve.
“Ajo çfarë bëhet, në fakt, është shumë e thjeshtë. Mjafton një fotografi. Vendoset për printim kjo kartë dhe mbaron e gjithë procedura në një periudhë prej 20 sekondash.Karta do vetëm 20 sekonda që të printohet. Printohet vetëm 1 herë në vit. Është falas. Arkivi online mund të bëhet nga shtëpia dhe është me pagesë,” shpjegoi Bido.
Kryeministri Rama me këtë rast përgëzoi ekipin e DPA për modernizimin dhe transformimin e Arkivës së Shtetit.
“Kjo është një punë e mirë e vitit të Skënderbeut, se u bë shkak për t’u fokusuar më shumë dhe për ta adresuar një plagë të vjetër të rëndë. Fakti që tani gjithçka është e digjitalizueshme, edhe origjinalet nuk janë më e vetmja mundësi, është garanci e madhe për ruajtjen e tyre. Por gjëja më e rëndësishme është që u arrit të mbrohet ajo që i mbijetoi deklasifikimit, nga pikëpamja materiale, jo nga pikëpamja përmbajtjesore,” tha Kryeministri Rama.
Ndryshe, zhvillimet teknologjike në Drejtorinë e Përgjithshme të Arkivave kanë sjellë edhe përafrimin e arkivave shqiptare me arkivat euvropiane. DPA është bërë pjesëtare me të drejta të plota e Fondacionit të Portalit të Arkivave Evropiane. Kjo e bën arkivin shqiptar të parin vend të Ballkanit Perëndimor pjesë e Portalit të Arkivave Europiane
