Vetëvendosje: Shtatë vjet nga zbrapsja e Qeverisë për shtrirjen e sovranitetit në veri

Në shtatë vjetorin e zbrapsjes së Qeverisë nga shtrirja e sovranitetit në veri të vendit, Lëvizja Vetëvendosje thekson se gjatë kësaj kohe janë bërë vetëm lëshime ndaj Serbisë ndërkohë kjo datë më nuk shënohet nga Hashim Thaçi.

“Që prej atëherë, çka ka bërë Hashim Thaçi dhe qeveritë e tjera janë vetëm negociatat me Serbinë”, thekson Vetëvendosje duke shtuar se nuk shënohet as për hir të aktit heroik të rënies së dëshmorit Enver Zymberi.

“Ai ishte flijuar për shtrirjen e plotë të sovranitetit të vendit. Ndërkaq, vrasësit e tij vazhdojnë të jetojnë në liri”.

Komunikata e Lëvizjes Vetëvendosje:

Kanë kaluar shtatë vite që prej zmbrapsjes së Qeverisë nga shtrirja e sovranitetit në veri të vendit. Që prej atëherë, çka ka bërë Hashim Thaçi dhe qeveritë e tjera janë vetëm negociatat me Serbinë.

Lëshimet ndaj Serbisë vazhdojnë ndërkohë kjo datë më nuk shënohet prej Hashim Thaçit. Madje nuk po shënohet as për hir të aktit heroik të rënies së dëshmorit Enver Zymberi. Ai ishte flijuar për shtrirjen e plotë të sovranitetit të vendit. Ndërkaq, vrasësit e tij vazhdojnë të jetojnë në liri përkundër kohës që ka kaluar.

E vetmja gjë që ka ndryshuar në tavolinat e Brukselit është se Thaçi tani aty ulet si president, por negociatat mbesin të paprekura dhe kompromiset në dëm të Kosovës veç sa janë rënduar dhe shtuar.