Vladimir Putin betohet për të katërtën herë si president i Rusisë

Vladimir Putin, u betua sot në fillim të mandatit të tij të katërt si president i Rusisë, duke u zotuar se do të ndjekë një agjendë ekonomike, që do të përmirësojë standardin e jetesës gjithandej vendit.

Në një ceremoni në një sallë të stolisur të Kremlinit, ai tha se përmirësimi i ekonomisë së Rusisë pas një rënieje pjesërisht të lidhur me sanksionet ndërkombëtare, do të jetë synimi parësor i mandatit të ri gjashtëvjeçar.

“Tani duhet të përdorim të gjitha mundësitë ekzistuese, para së gjithash për zgjidhjen e detyrave të brendshme urgjente të zhvillimit, për përparimin ekonomik dhe teknologjik, për ngritjen e konkurrencës në ato fusha që përcaktojnë të ardhmen”, tha ai në fjalimin e tij para mijëra mysafirëve në sallën Andreevsky të Pallatit të Madh të Kremlinit dhe dy salla aty pranë.

“Një cilësi e re e jetës, mirëqenies, sigurisë dhe shëndetit të njerëzve – kjo është parësore sot”, tha ai.

Megjithëse Putini ka rimëkëmbur peshën e Rusisë në skenën botërore përmes veprimeve ushtarake, ai është kritikuar për përpjekje të papërshtatshme për të çliruar ekonominë e Rusisë nga varësia e saj nga eksportet e naftës dhe gazit dhe për të zhvilluar sektorin e prodhimit.

Ai siguroi mandatin e ri në zgjedhjet e muajit mars në të cilat fitoi me 77 për qind të votave.

Vladimir Putin është realisht udhëheqës i Rusisë përgjatë tërë kësaj periudhë të shekullit 21. Ai u largua nga presidenca në vitin 2008 për shkak të kufizimeve të mandatit, por u emërua kryeministër dhe vazhdoi të drejtojë vendin derisa u kthye në postin e presidentit në vitin 2012.

Ai nuk mund të zgjidhet më si president, nëse nuk bëhen ndryshime në kushtetutën ruse e cila ndalon ushtrimin e më shumë se mandateve radhazi.

Vladimir Putin, aneksoi Krimenë nga Ukraina gjatë mandatit të kaluar dhe u vu në mbështetje të presidentit sirian, Bashar al-Assad, në fushatën ushtarake në Siri.

Në zgjedhjet e marsit ai fitoi kundrejt sfiduesve të dobët në një proces që u kritikua nga vëzhguesit.

Përurimi i tij u bë vetëm dy ditë pas demonstratave gjithandej vendit në kundërshtim të mandatit të ri të ish shefit të KGB-së.

Të shtunën, udhëheqësi i opozitës, Alexei Navalny, u arrestua pak minuta pasi arriti në demonstrata në qendër të Moskës. Alexei Navalny dhe qindra mbështetës të tij u arrestuan gjatë demonstratave në Moskë dhe 90 qytete të tjera. Navalny u lirua të dielën.