Vonë, shumë vonë! Nuk e ndihmon as Edi Rama 2.0!

nga Agim Popoci

Nuk i mjaftuan 12 vjet në krye të Bashkisë Tiranë dhe as 13 vjet si Kryeministër ti jap të paktën Tiranës ujë, dhe, ta pastrojë nga plehrat! Por, jo, ashtu siç e filloi me ujërat e zeza në qendër të Tiranës, Edi Rama e vazhdoi rrugëtimin e tij politik me ujërat e zeza mes përmes Shqipërisë, nga vendi ku mburonte dhe arma e tij më e fortë, lajmi i partisë; Për të ardhur deri tek premtimi madhor: Rilindja Urbane 2.0!

Pa ardhur tek kjo nismë urbane, që vetëm koka e shefit të Fugës mund të shpik ndërsa ka nëpër këmbë revoltën brenda partisë që drejton si një revolucion të flamingove, duhet sqaruar se termi buron nga Web 2.0, i cili përshkruan kalimin nga faqet pasive të internetit në platforma interaktive, dhe nuk bie ndesh si me tre mandatet si kryebashkiak ashtu dhe tre mandatet dhe besimi që iu dha për herë të katërt si kryeministër, sepse Edi Rama ishte dhe është pasiv, pra, mashtrues patologjik i cili premton jo duke e menduar se si do ta realizoj ndonjërin prej premtimeve por si do të tmerroj shqiptarët ndërsa fillojnë ti lëngëzohen fjalët me jargët e tij komuniste gjithmonë i gatshëm të klith: Fajet i ka Saliu!

Dhe, sot, nuk është koha ti ridizajnohet politika dhe qeverisja e tij për të funksionuar më mirë dhe për të sjell ndryshime rrënjësore pas 25 viteve të pushtetërimit, ose më saktë, krimit dhe pushtetit!

I ngritur mbi propagandën, pa lënë gjurmë me ansjërën nga premtimet madhore që nga dita kur shkeli në krye të Bashkisë Tiranë, Edi Rama ishte i qartë se për pastrimin e plehrave, furnizimin me ujë 24 orë dhe sistemimin e ujërave të zezave kishte nevojë vetëm për media me pronarët e tyre mediokër, të cilët përveç mashtrimit do ti mundësonin dhe krijimin e personazheve të përçudnuara të kombit shqiptar, deri në pikën sa do të lumturohen të jenë dhe qelbësira, vetëm e vetëm për të zhdukur nga skena politike gogolin e liderit të tyre politik, Sali Berisha!

I ngritur mbi hirin shqiptar që kishte lënë partia e tij komuniste me 34.135 të burgosur dhe dënuar për arsye politike 984 prej të cilëve nuk i mbijetuan torturave, 59.009 të internuar në kampe përqendrimi prej të cilëve 7.022 humbën jetën, dhe 6.027 të vrarë gjatë diktaturës, pas një garancie publike që kjo parti kriminale kishte marrë nga familjet e të përndjekurve politikë se nuk do të hakmerren, Edi Rama nxori kokën me katër viktimat që i mbetën në revolucionin e tij komunist të 21 Janarit në Tiranë ndonëse zhgënjeu bashkëpunëtorët e tij që ishin të gatshëm të lënë edhe 10 mijë shqiptarë të vrarë në Bulevard, dhe filloi betejën e hapur me rivalët e tij jokomunistë, jo me ide dhe programe qeverisëse, por, ashtu sikur se kishte qeverisur kryeqytetin shqiptar vazhdoi dhe si kryeministër, me akuza që tashmë shumëfishoheshin përmes rrjeteve sociale pa frikë nga veprimi i drejtësisë, ku në çdo rast, Fajet i ka Saliu!

Por, kur nga po këto rrjete sociale i erdhi një tsunami që nuk e kishte prodhuar vetë dhe as impianti i Fugës, por, një tronditje tektonike komuniste që njehë propagandën dhe i ka shërbyer këtij lideri të mbrapsht që Shqipëria e ka për taksirat ta ketë dhe Kryeministër, u pa se udhëheqësi komunist tashmë në mandatin e tij të katërt është plakur, lodhur dhe shumë larg realitetit shqiptar, dhe, nuk prodhon më shumë se sa një Rilindjje Urbane 2.0 dhe Polici Review, që nuk i shërbejnë as dreqit, as të birit, as shpirtit të shenjtë! Ndësra shqiptarët e kuptuan se tani është vonë, dhe, nuk i ndihmon dot asnjë rilindje dhe asnjë lloj ndryshimi në qeverisje që për Kryeministër ka Edi Ramën, po atë i cili rritjen e mirëqenies e mendon, ashtu siç i kishte thënë Zëvendësit të tij Arben Ahmetaj kohë më parë, duke kultivuar dhe trafikuar drogë.

Sot, kur, pasi minoi Partinë Socialiste dhe premtoi një të ardhme me Rilindjen e cila nuk diti asgjë më shumë se sa të kultivoi dhe trafikoi drogë! Premtimin epik Urbanizim dhe më pas Legalizim e telendisi në shpërndarje të Kartonëve të Lamçes pa e parë njeri urbanizimin, dhe tani me Rilindjen Urbane 2.0, Edi Rama premton menaxhim dhe lehtësim të parkimeve, krijim të kompanive publike bashkiake me autobus elektrik, digjitalizim të shërbimeve, muze me identitetit lokal, shndërrimin e qindra hapësira të braktisura në zona biznesi dhe marrëzi të ngjashme, dhe shumë gjëra të tjera që shumicës së shqiptarëve në këtë ditë të zezë të tyre pa bukë, shtëpi e katandi, nuk ju hynë në punë fare!

Sot, kur Policia Review nuk i hynë njeriu në punë sikur ta hetoj edhe gjithë veprimtarinë kriminale kibernetike të Patronazhistëve, vetëm e vetëm për të sulmuar të gjithë ata që guxuan ta prekin llumin e tij prej peshkatari të Lucajve; Sepse, tashmë Patronazhistët me të cilët mburrej dhe mburret vetë Edi Rama, janë fut në çdo familje shqiptare dhe kanë shkatërruar çdo element të harmonisë dhe mbijetesës shqiptare, ku biznesi që mbështetë Qeverinë Rama është gjëja më pa interes që ekziston e lëre më për t’u sulmuar!

Sot, shqiptarët e kuptuan se nuk i ndihmon madje as Shqipëria në BE, sikur të ndodhë edhe mrekullia dhe Edi Rama të korr suksesin e parë diplomatik që nga momenti që shkeli në politik, sepse ishte po ky Kryeministër që lejoi krimin që të  përmbys ekonominë dhe traditën shqiptare, aty ku dhe mikpritja është tashmë e frikshme: Bukë, e drogë, e zemër!

Sot, kur sundon krimi, është vonë për Kryeministrin Edi Rama, pavarësisht se ku mendon ta vendos Shqipërinë, në Ballkanin e Hapur të cilin e shiti si Serbia 2.0 apo BE!

Sot, kur përveç protestës që humbi kuptimin dhe ky monstër i dha fund edhe shpresës së shqiptarëve, është vonë, shumë vonë për vendin e shqipeve, dhe, nuk e ndihmon dot më asnjë lloj rilindje nën qeverisjen komuniste, madje as Edi Rama 2.0.

Ashtu siç ishte në Romën e lashtë, kur në njërën nga seancat gjyqësore, po merrej në shqyrtim vrasja e një konsulli i cili kishte qenë një kriminel me emër.

Gjykatësi e pyeti Ciceronin:

– Kur është vra Konsulli?

Gojëtari i famshëm u përgjigj:

– Vonë, shumë vonë!