Vuçiç: Serbët vetë e kanë vënë vulën në zarfin e pavarësisë së Kosovës

Serbët vetë e kanë vënë vulën në zarfin e pavarësisë së Kosovës. Kështu u shpreh presidenti i Serbisë, Aleksandar Vuçiç duke iu përgjigjur gazetarëve për sanksionet eventuale pas marrëveshjes së Evropës dhe Shteteve të Bashkuara këto ditë në Washington, siç u pagëzua tashmë kjo nismë nga BE dhe SHBA, “Dokumenti i Washingtonit”.

Presidenti i Serbisë tha me këtë  rast se nuk druan nga sanksionet e Perëndimit në procesin e zgjidhjes së çështjes së Kosovës, aq sa e brengosin problemet që po ecin zvarrë.

“Me probleme që po ecin zvarrë e që po e rrezikojnë ardhmërinë e Serbisë, nënkuptoj braktisjen e Serbisë nga të rinjtë dhe natalitetin e ulët,” tha ai duke shtuar:

“Për situatën e këtillë dhe rrethanat shumë të këqija në të cilat duhet zgjidhur çështjen e Kosovës në një masë përgjegjësinë e kanë edhe vetë serbët  duke pasur parasysh politikën e gabuar dhe disa veprime të Serbisë”.

Aleksandar Vuçiç, sipas B92.net, tha se s’ka parë ende asnjë dokument të dalë nga ky takim i Quintit dhe se ajo që mund të jetë folur në Washington nuk mund të jetë ndonjë befasi e madhe, meqë bëhet fjalë për vende të cilat të gjitha e kanë njohur pavarësinë e Kosovës.

“Nuk do të ketë sanksione, kjo është e tëra që mund ta them. S’kam parë kurrfarë dokumenti të Washingtonit. Dëgjova se çfarë ofrojnë disa si do farë parimesh të vetat. Diçka më është komunikuar gjysmë-zyrtarisht. Kjo s’është ndonjë gjë kush e di se sa e re”, tha Vuçiç.