14 vjeç vrasës!
nga Agim Popoci
“Kërkova të di nëse ishte vrarë vajza ime e cila është në klasën ku kishte të shtëna, por nuk më tregojnë, dua të di nëse vajza ime është gjallë ” – ishte reagimi i një nëne të shqetësuar para shkollës në Beograd ku dje u vranë tetë fëmijë dhe 1 punëtor sigurie, që për shumë pak minuta u bë objekt linçimi në rrjetet sociale me komentet fyese dhe denigruese, pse ajo kërkonte të dinte vetëm për fatin e vajzës së saj, sikur fëmijët tjerë nuk kanë nëna?!
Reagimi qytetar edhe mund të kuptohet sikur në Beograd të ekzistonte një reagim i zakonshëm i këtij lloji! Por, jo, pak ditë më parë rezultoi se po në këtë qytet, inicitiva e një grupi të rinjëve për të përkujtuar vrasjen e 36 fëmijëve shqiptarë në Mejë dështoi me sukses! Pra, nuk reagoi njeri! Edhe pse këta fëmijë kishin nëna, madje që të gjitha të vrara po në kamionin i cili u gjet me 744 kufoma të tjera në Batajnicë, vetëm 15 kilometra nga ku ndodhi krimi makabër i 3 Majit 2023 në Beograd!
E shqiptarët, për dallim nga qytetarët serbë dhe Presidenti i tyre kriminel, Aleksandar Vuçiç, ndonëse të afërm të viktimave të Masakrës së Mejes ku mbetën të vrarë nga forcat serbe 376 civilë shqiptarë, shprehen keqardhje dhe së bashku me Presidenten Vjosa Osmani dhe Kryeministrin Albin Kurti, i dëshiruan shërbim të shpejtë atyre që mbetën të plagosur.
Nga Prishtina dhe Tirana nuk mund të kishte reagim ndryshe, përveç se shprehje ngushëllimi për familjet e viktimave dhe urim për shërim sa më të shpejtë të atyre që mbetën të plagosur në këtë ngjarje tragjike, sepse të vetmin akt të çuditshëm të një 14 vjeçari shqiptar që njohin është ai i Gjinos së Çajupit, 14 vjeç dhëndër!
Jo se kjo e bënë fajtor Kosta Kecmanoviçin, 14 vjeç vrasës! Ndonëse sot është konstatuar se nxënësi serb ende pa i mbushur 14 vjeç, është vrasësi më i tmerrshëm në historinë e gjithë masakrave në botë, duke lënë pas 11 vjeçarin Andrew Golden i cili së bashku me 13 vjeçarin Michael Johnson në vitin 1998 vrau 4 nxënës në një shkollë të mesme në Arkansas; Marcelo Eduardi Bovo Pesseghinin, 13 vjeç, i cili në vitin 2013 në Sao Paolo vrau katër njerëz; Mason Siskun, 14 vjeç, i cili vrau pesë anëtarët e familjes së tij; Dhe, Kyle Alwood, 9 vjeç, i cili vrau pesë anëtarët e familjes së tij në vitin 2019 duke i vënë flakën shtëpisë së në Ilinois; Sot, personi i fundit që mund të fajësohet për këtë masakër është autori i tragjedisë në shkollën fillore në Beograd!
Kosta Kecmanoviç, lindi në vitin 2009 në Beograd të Serbisë, e cila ndonëse drejtohej nga demokrati i vetëshpallur Boris Tadiç, nuk i njihte asnjërën nga 400 masakrat në Kosovë, madje as atë të Srebrenicës në Bosnje Hercegovinë ku për tre ditë u vranë mbi 8 mijë persona nga forcat ushatarake dhe policore serbe!
Ndërsa Kosta po rritej, President i Serbisë u bë dhe krimineli Tomislav Nikoliç e pas tij dhe ai aktual Aleksandar Vuçiç!
Sot të gjithë e fajësojnë të atin e Kostës pse e merrte të birin në një poligon ku gjuante, madje akuzohet për pasionin e çuditshëm me armë që kishte ndërsa ishte mjek!
A mund të jetë vallë kjo arsyeja që i dha idenë Kosta Kecmanoviçit, të niset i armatosur deri në dhëmbë në shkollën e tij për të vrarë zushën e Historisë që nuk i dha notë kaluese, dhe shokët e tij të klasës që e përqeshnin?!
Këtij Koste që u rritë duke mësuar se autorët serbë të masakrave në Kroaci, Bosnje dhe Kosovë ishin heronj të popullit serb! Madje Kosta ishte 6 vjeç kur komandanti i korpusit të Prishtinës, Vladimir Lazareviç, që kishte koordinuar Masakrën e Mejes dhe jo vetëm, u prit si hero në Serbi, nuk pushonte duke dalë deri në ditët e masakrës së djeshme në ekranet serbe, e Vuçiç e cilësoi “hero i madh serb”.
Po, po, ky Aleksandar Vuçiç me të cilin Edi Rama do ta hap Ballkanin, me qëllim të lëvizjes së lirë, si të Gjinos ashtu dhe të Kostës e mallërave të tyre, duke shpërfillur në ekstrem realitetin ballkanik:
Aty ku Gjino është rritur duke mësuar se 14 vjeç nuk bëhesh dot dhëndër, por, mirë është ta dish të kaluarën e vendlindjes dhe familjes, dhe, patjetër veprat e Andon Zako Çajupit!
Dhe, Kosta të cilin historia e mësoi se heronj janë ata që vranë çdo gjë joserbe, Vunoi ndoshta jo por Mitrovica deri në Durrës është Serbi, e pushkën në krah e ka mbajtur dhe e mbanë çdo hero serb, i cili, nëse është nevoja për Kishën dhe shtetin serb, pse jo dhe në Ballkanin e Hapur, mund të bëhet dhe 14 vjeç vrasës!
