Tre ditët e fundit të fushatës….

nga Lutfi Dervishi

Kanë mbetur vetëm 72 orë nga heshtja zgjedhore dhe gara për zgjedhjet parlamentare të 25 prillit po i afrohet fundit! Pyetja: kush do të fitojë do të marrë përgjigje vetëm ditën e dielë nga secili prej jush.

Fushata e cila po zhvillohet në kushtet e pandemisë, por duke shpërfillur rregullat, ka shënuar ditët e fundit incidente që gjithsesi do të lenë njolla në raportet e vëzhgimit dhe në kujtesën e gjithësecilit.

Fushata është raportuar pothuajse totalisht nga partitë politike dhe media tradicionale është kujdesur kryesisht për të respektuar balancën kohore të përcaktuar në kodin zgjedhor! Fushata në rrjetet sociale, e cila ka qenë mjaft intensive, po zhvillohet jashtë syrit të vëzhguesve për shkak se kodi zgjedhor nuk parashikon monitorim të rrjeteve sociale.

Incidenti i djeshëm me armë në Kavajë, incidenti me “furgonin” me ndihma në Berat, tentativa për shitblerje vote, një përgjim i bërë publik sot i kreut të Hipotekës për legalizimet dhe debati që vijon për bërjen publike të të dhënave personale të mbi 900 mijë votueseve të qarkut të Tiranës, janë dëshmi e faktit se sado pa incidente të zhvillohet dita e votimit, edhe këtë radhë nuk duket se po arrijmë të zhvillojmë zgjedhje të qeta dhe pa probleme.
Për herë të parë në zgjedhjet parlamentare, Presidenti i Republikës ka marrë një rol aktiv dhe ka paralajmëruar se do të jetë në terren jo vetëm në ditën e votimit por edhe gjatë ditëve të numërimit.

Fenomeni i shëmtuar i shitblerjes së votës vijon të mbetet një shqetësim- një shqetësim që është më shumë i artikuluar nga përfaqësuesit e klerit dhe komunitetit ndërkombëtar sesa nga partitë politike.

Me tone të forta dhe të drejtpërdrejta kleri shqiptar u bën thirrje votuesve të mos shesin votën, të mos shesin dinjitetin.

Sado qoftë shuma e parave që të ofrohen, ajo nuk do të zgjidhë asnjë hall tëndin apo të familjes tënde për të nesërmen. Njerëzit që ofrojnë para nuk janë budallenj. Ata ofrojnë sot para që nesër t’i marrin ato 10 dhe 100- fish! Nuk kemi nevojë të pyesim rreth e rrotull se cilat janë pasojat. Ata kërkojnë të marrin nesër tenderat publikë, të diktojnë emërimet në administratë dhe të kenë ndikimin e tyre, ku të munden.

Zgjedhjet do t’i fitojë njëra palë. Më shumë se cila fiton ka rëndësi çfarë zgjedhjesh do të bëjmë. Fituesi i 25 prillit nuk do të jetë i përjetshëm, po ashtu edhe humbësi. Zgjedhje do të ketë sërish. E rëndësishme është që të marrim pjesë në votime, të votojmë masivisht sepse vetëm kështu ushtrojmë presion tek ata që zgjedhim për të dëgjuar zërin dhe për të administruar më mirë taksat tona./Përballë/