Pas vrasjes në Elbasan, Ambasada e SHBA: Meta, Rama dhe Basha të vetëpërmbahen!

Pas dhunës në Elbasan e cila sot përfundoi me vdekjen e një personi dhe plagosjen e katër të tjerëve, ka reaguar Ambasada e SHBA në Tiranë duke i bërë thirrje zyrtarëve të zbatimit të ligjit të hetojnë këtë incident sa më shpejt dhe në mënyrë të plotë, të identifikojnë autorët dhe t’i dënojnë me të gjithë forcën e ligjit ndërsa Presidentit Meta, Kryeministrit Rama dhe Kryetarit të Partisë Demokratike Basha të vetëpërmbahen.

“Veprimet tona duhet të bazohen në fakte, jo në frikë apo thashetheme. Kur vetëm disa ditë na ndajnë nga zgjedhjet e 25 prillit, ne përsërisim deklaratën tonë të 26 marsit duke bërë thirrje që udhëheqësit, ata që janë në pushtet dhe ata që kërkojnë pushtet, të refuzojnë qartazi dhunën,” thekson Ambasada e SHBA duke siguruar se do të vazhdojë të monitorojë situatën nga afër.

Kemi ndjekur raportimet për dhunën në Elbasan sot, e cila përfundoi në vdekjen e një personi dhe plagosjen e të tjerëve.

Ne u bëjmë thirrje zyrtarëve të zbatimit të ligjit të hetojnë këtë incident sa më shpejt dhe në mënyrë të plotë, të identifikojnë autorët dhe t’i dënojnë me të gjithë forcën e ligjit. Ata që përfshihen në dhunë të tillë duhet të ndëshkohen.

Ambasadorja Kim i ka kërkuar Presidentit Meta, Kryeministrit Rama dhe Kryetarit të Partisë Demokratike Basha të ushtrojnë vetëpërmbajtje – dhe të udhëheqin në të njëjtën mënyrë – ndërsa çështja është duke u hetuar.

Veprimet tona duhet të bazohen në fakte, jo në frikë apo thashetheme.

Kur vetëm disa ditë na ndajnë nga zgjedhjet e 25 prillit, ne përsërisim deklaratën tonë të 26 marsit duke bërë thirrje që udhëheqësit – ata që janë në pushtet dhe ata që kërkojnë pushtet – të refuzojnë qartazi dhunën.

Ambasada Amerikane do të vazhdojë të monitorojë situatën nga afër.