Me familjet tironse, Jorida Tabaku: Këtij komuniteti do t’i ipet vendi që i takon!

Familjet tradicionale të Tiranës i dhanë mbështetjen kandidates për deputete të Partisë Demokratike, Jorida Tabaku, ndërsa vetë ajo si pjesë e këtij komuniteti, pasardhëse e dy familjeve të mëdha, Tabaku e Turdiu, fillimisht duke kërkuar falje që ndoshta nuk është respektuar sa duhet ky komunitet u zotua se do jetë zëri dhe mendja e tyre sa herë që ja kërkojnë.

“Për mua do të jetë privilegj i një jete dhe nderi më i madh që t’u përfaqësoj në parlamentin e ardhshëm dhe jam e sigurt, që do të do të bëj maksimumin për të çuar zërin tuaj kudo. Tani kjo ka dalë nga sepetet e vjetra të shtëpisë (një jelek tradicional i Tiranës), kisha vite që nuk e shihja dhe nuk e vishja, po është thjesht një gjest për të treguar që do përpiqem në maksimum të respektoj traditën tonë, ta vlerësoj traditën tonë, të nxjerr më të mirë e traditës tonë dhe sa herë që të kem mundësi, e kudo që të kem mundësi, sa herë të më jepet rasti, të vlerësoj komunitetin tonë, që jo gjithmonë ka pasur atë vend që i takon në qeverisje, në administratë dhe kudo,” u shpreh Jorida Tabaku e vetëdijshme për përgjegjesitë që ka si pjesë e këtij komuniteti, por angazhimi për të qenë në krah të tij është një privilegj jo vetëm për shkak të mbështetjes që ka marrë nga familjet tironse, por edhe për vlerat që ato mbartin.

“Do jem zëri juaj e mendja juaj sa herë që ju të ma kërkoni, e di që kam një barrë shumë të rëndë se kemi edhe gabime të të shkuarës për të shlyer, që ndoshta nuk e kemi respektuar sa duhet këtë komunitet. Por një gjë ua them nga zemra ashtu siç më keni pritur dhe ju nga zemra sa herë që i kam rënë dyerve tuaj,” tha kandidatja për deputete e Partisë Demokratike, Jorida Tabaku, duke shtuar se në rrugëtimin e saj politik, në këto 12 vjet, familjet tironse kanë qenë mbështetësit e saj më të mëdhenj, por krahas atyre nuk ka munguar as mbështetja e çdo familje tjetër, e cila nuk duron padrejtësitë, shkatërrimin e qytetit dhe të identitetit të tij ndërsa përfundoi:

“Do bëj maksimumin që ju të respektoheni e të vlerësoheni. Të përpiqemi që fëmijët tuaj, që janë të talentuar, të studiuar jashtë, që ndoshta nuk kanë pasur mundësi, që të vlerësohen deri më sot, do kenë mbështetjen time maksimale! Ashtu siç do e kenë mbështetjen time maksimale edhe të gjithë nënat që më kanë hapur dyert e baballarët tuaj që më kanë mbështetur.”