Spanja shpreson të hapet për turistët nga muaji qershor

Spanja shpreson të hapet për turistët e huaj nga muaji qershor, ndërkohë që autoritetet e Bashkimit Evropian punojnë në planet për pasaportat digjitale për koronavirus.

Ministri spanjoll për Turizëm, Fernando Valdés, tha se testi fillestar do të nisë në muajin maj, në mënyrë që Spanja të jetë e gatshme të pranojë pushuesit muajin e ardhshëm.

Pasaportën digjitale të BE-së, mund ta marrë secili banor i bllokut evropian që është vaksinuar kundër koronavirusit, ka test negativ apo është shëruar së fundmi nga COVID-19, sëmundja që shkakton koronavirusi.

Një mori shtetesh tani kanë nisur të përdorin pasaporta të tilla, me qëllim të luftimit të pandemisë.

Valdés tha në një konferencë për media në Meksikë, raporton RFE, se shteti i tij do të mund të jetë gati në qershor për të pritur udhëtarët nga e gjithë bota.