Pas Vuçiçit, Dodik mbështet idenë për “botën serbe”

Anëtari serb i Presidencës së Bosnje Hercegovinës, Milorad Dodik, tha se e mbështet plotësisht idenë për krijimin e së ashtuquajturës “botë serbe”, e cila, sipas tij, nuk do të drejtohej kundër askujt, por qëllim të vetëm do të kishte bashkëpunimin dhe ruajtjen e identitetit kombëtar dhe kulturor serb.

Këtë ide e shfaqi për herë të parë ministri i Brendshëm i Serbisë, Aleksandar Vulin.

Dodik tha se e përkrah, sepse është patriotike dhe nuk ka kurrfarë pretendimesh territoriale.

”Kjo ide ka për qëllim bashkëpunimin dhe ruajtjen e identitetit, gjuhës dhe kulturës serbe. Këtë gjë e kanë bërë shumë popuj para nesh dhe askush nuk ka bërë probleme. Por, kur serbët dalin me këtë ide, menjëherë bëhet zhurmë dhe ngrihen tensionet,” tha Dodik, raporton RFE.

Një ditë më parë, anëtari mysliman i Presidencës së Bosnjës, Shefik Xhaferoviç, tha se deklaratat e Vulinit kujtojnë vitet ‘90, kur Jugosllavia e atëhershme ishte përfshirë në luftëra të përgjakshme.

Ndryshe, Aleksandar Vulin tha në një tubim të partisë së tij më 18 korrik, se detyrë e këtij brezi politikanësh është të krijojë botën serbe dhe t’i bashkojë serbët kudo që jetojnë.

Ai tha se për krijimin e “botës serbe”, është e nevojshme që Serbia të jetë ekonomikisht e suksesshme, e udhëhequr mirë dhe të ketë një ushtri që është në gjendje ta shpëtojë atë, ashtu si edhe serbët kudo që jetojnë.

Deklaratat nxitën reagime në Ballkan dhe u panë si kërcënim për rajonin.

Në përgjigje të reagimeve, presidenti i Serbisë, Aleksandar Vuçiç, i cili ndodhej në audiencë gjatë fjalimit të Vulinit, tha se politikë e shtetit të tij është ajo që thotë se kufijtë e Serbisë janë të paprekshëm dhe se Serbia nuk merret me kufijtë e të tjerëve.