Messi në PSG, në Paris tifozët në radhë…

Nis një epokë e re për futbollin dhe për yllin argjentinas që tashmë është larguar kështu nga Barcelona pas 21 vitesh. Transferimi i shekullit, Lionel Mesi zyrtarisht është tek skuadra e PSG-së. 6 herë fitues i “Topit të Artë” u prezantua përpara mediave në sallën e konferencës për shtyp në stadiumin “Parc des Princes”.

“Unë e kam ndjekur Ligue 1 sepse kam miq këtu, siç thashë. Ligue 1 është një kampionat që ka përparuar mirë vitet e fundit, veçanërisht falë PSG-së. E bën atë më konkurruese. Konkurrentët gjithashtu po përparojnë dhe duan të mposhtin Parisin. Do të jetë një stadium i ri, kundërshtarë të rinj,” tha Messi pas prezantimit duke shtuar:

 “Sa i përket ndikimit në Ligue 1, unë mendoj se Kampionati po shkon në një nivel tjetër. Edhe në të drejtat televizive, dhe partneritete marketingu. Të gjithë tani duan të shohin PSG-në e Messit. Kjo rrit vlerën e klubeve të tjera. Presidentët e tjerë më falënderuan për transferimin. Ne nuk po e bëjmë këtë vetëm për klubin, por edhe për Francën dhe Ligue 1.”

Edhe në këto momente nuk la pa respektuar tifozët e Barçës:

“Para se të largohesha nga Barça, u thashë tifozëve: Unë gjithmonë do të jem mirënjohës për dashurinë e treguar. Është shtëpia ime. Kam përjetuar shumë që nga fëmijëria ime. Ata e dinin që unë do të shkoja në një ekip konkurrues sepse jam fitues. Nuk kisha asnjë dyshim se PSG ndau qëllimet e mia. Të shohim nëse takohemi përsëri me Barçën.”

Por sot në Paris të gjithë janë të çmendur pas Messit ku siç duken dhe nga pamjet që janë bërë virale, janë tifozë të shumtë që po mbajnë radhën në dyqanin zyrtar të PSG-së për të blerë fanellën e Leo Messit me numër 30.

“Pleshti” firmosi një kontratë 2-vjeçare me opsion edhe për një tjetër vit, nga ku do të përfitojë plot 35 milionë euro në sezon./Panorama/