Albin Kurti: Nuk e kemi luksin të gabojmë!

Momenti i fundit që Kosova të ballafaqohet me të kaluarën. Kështu u shpreh Kryeministri i Kosovës, Albin Kurti, në takimin e parë të Grupit të punës për hartimin e Projekt Strategjisë për Drejtësinë Tranzicionale, duke shtuar se, duhet që të ketë bashkëpunim ndërmjet të gjitha institucioneve në mënyrë mos të themelohen nisma të përsëritura.

Gabimi më i madh që kanë bërë institucionet, tha Kurti është se janë përsëritur të gjeturat dhe gjërat kanë mbetur vetëm në letër. Por, sipas tij, Kosova nuk e ka luksin të gabojë e as të eksperimentojë më me këtë temë duke shtuar se sepse qëllimi është i përbashkët e ka të bëjë me krijimin  e kujtesës kolektive.

“Nevoja për bashkërendim për iniciativë të ndryshme u folën në takimin e kaluar, ky është momenti i fundit për ballafaqim me të kaluarën. Është e rëndësishme që të kemi koordinim të duhur në mënyrë që të kemi konsistencë, nuk i bëjmë nder as vetës as bartësve të dëmit nëse krijojmë nisma që e përsërisin vetveten. Strategjia duhet të bashkojë të gjitha nismat e filluara. Problemi dhe gabimi më i madh është që kemi pasur nisma ad-hoc që kanë përsëritur të gjeturat dhe nuk kanë adresuar këtë temë, kjo është vetëm një nga arsyet që kjo strategji të ofrojë platformë veprimi ndërmjet nismave dhe të shërbejë si referencë,” tha Albin Kurti duke shtuar se e kanë bërë të qartë ballafaqimin me të kaluarën ndërsa përfundoi:

“Me shumë rëndësi është që strategjia mos të mbetet në letër. Nuk do të jetë e lehtë, por ka interesim nga ekspertët që të na ndihmojnë në këtë drejtim. Ne nuk e kemi luksin që të gabojmë me, nuk kemi mundësi të eksperimentojmë e të dështojmë, të bashkojmë forcat të gjithë sepse qëllimi është i përbashkët e ka të bëjë me krijimin  e kujtesës kolektive që u shërben brezave pas nesh, por paqja kërkon drejtësi, në Kosovë nuk ka ndodhur drejtësia e viktimat e meritojnë atë.”