Me 30 Shtator, Vuçiç: Inaugurimi i fillimit të Autostradës Nish-Prishtinë

Me 30 Shtator do të inaugurohet fillimi i punimeve në lotin e parë të Autostradës Nish-Prishtinë e cila do të kushtoj 244 milionë euro, 15 për qind prej të cilave janë dhuratë nga Bashkimi Evropian.

Kështu u shpreh Presidenti i Serbisë, Aleksandar Vuçiç, duke folur për rëndësinë e axhendës së politikës së jashtme dhe atë ekonomike të shtetit serb gjatë muajit shtator, ku bëri të ditur se pas kancelares gjermane Angela Merkel më 13 Shtator, Beogradin do ta vizitoj më 29 e 30 shtator, Presidentja e Komisionit Europian, Ursula von der Leyen.

Presidenti i Serbisë bëri të ditur gjithashtu se gjatë muajit shtator do ta vizitoj Turqinë ku do të takohet me Presidentin Recep Tayyip Erdogan, takim i cili do të pasohet me atë të liderëve të Grupit të Vishegradit në Budapest.

Aleksandar Vuçiç ndërsa iu drejtua qytetarëve të Serbisë, bëri të ditur se gjatë muajit shtator do të pres në takim dhe senatorët amerikanë dhe ata francezë, si dhe pritet vizita e Përfaqësuesit Special të BE për dialogun Kosovë-Serbi, Miroslav Laçak në Beograd.