Kosova nuk do të jetë pjesë e Open Balkan, Kurti: Ndaj Serbisë vetëm reciprocitet!
Kryeministrit Edi Rama sot e akuzoi Kosovën për teori konspiracioni me nismën Open Ballkan, por Kryeministri Albin Kurti pas taimit me kancelaren Angela Merkel tha se nuk e di se për çfarë po flet Rama, por Kosova nuk do të jetë pjesë e kësaj nisme sepse u konfirmua se procesi i Berlinit është korniza edhe rruga për integrimin e 6 shteteve të Ballkanit Perëndimor në Bashkimin Evropian.
“Unë nuk e di për çfarë teorie konspiracioni është fjala këtu. A e keni pyetur për cilën teori? Është dashur të pyesni. Unë nuk e di se për çfarë teorie konspiracioni bëhet fjalë. Unë po ua tregoj qëndrimin tim, të cilin po ashtu e thash edhe aty, e ky është që Procesi i Berlinit është i nevojshëm, por njëkohësisht edhe i mjaftueshëm për rrugëtimin evropian dhe nuk ka nevojë për variante të tjera. Ballkani, jo që nuk është tri shtete, por nuk është as gjashtë shtete. Ballkani është së paku 12 shtete, e Ballkani perëndimor me këto 6 shtete e ka Procesin e Berlinit. Iniciativa rajonale, ne nuk besojmë se duhet të bëhen pa BE-në brenda. BE-ja duhet të jetë aty. Dallimi në mes procesit të Berlinit, edhe Ballkanit të hapur, është që në të dytën se keni BE-në,” tha Kurti duke shtuar:
“Ne kemi nevojë edhe për bashkëpunim sa më të madh midis Republikës së Kosovës dhe Gjermanisë, meqenëse Gjermania është edhe shtyllë politike dhe motor ekonomik i Bashkimit Evropian dhe është vendi në të cilën shqiptarët e Kosovës e kanë mërgatën më të madhe. Kryeministër Kurti, a ju është kërkuar që të përfshiheni në këtë proces? Jo. Qeveria, e Republikës së Kosovës është qeveri e një shteti sovran. Ne i përfaqësojmë popullin e Kosovës pas zgjedhjeve që i kemi fituar masivisht si asnjëherë më parë dhe natyrisht që çfarëdo bashkëpunimi që zhvillohet, zhvillohet në përputhje me interesat tona. Ne nuk e konsiderojmë interes të Kosovës, me një Serbi që mohon krimet dhe s’ta njeh pavarësinë, e të bëhemi bashkë, e të vendoset me shumicë votash aty.”
Përveç për Open Balkan, Kryeministri i Kosovës, Albin Kurti tha se me Tiranën janë në komunikim dhe bashkëpunojnë.
“Po nuk biem dakord për Ballkanin e hapur, çfarë të bëjmë tash? Por, s’mendoj ashtu. Unë nuk mendoj që është që është nismë që është në interes të shqiptarëve të Kosovës. Për gjëra tjerë ne jemi në komunikim dhe bashkëpunojmë,” tha Kurti ndërsa për raportet Kosovë-Serbi, ai u shpreh se presioni duhet të bëhet mbi Serbinë.
“Për raporte normale në Ballkanin perëndimor nuk duhet të ndryshoj Kosova, duhet të ndryshojë Serbia. Nuk bën trysnia të jetë mbi Kosovën, por mi Serbinë dhe bëjnë gabim ata të cilët mundohen që ta ndërtojnë një trysni mbi Kosovën. Trysnia duhet të jetë mbi Serbinë, e cila I mohon krimet dhe e cila nuk e njeh pavarësinë e Kosovës.”
Edhe në Tiranë, Kryeministri i Kosovës u pyet për vendosin e reciprocitetit ndaj Serbisë, të cilën ai e konfirmoi sepse, siç tha, ndryshe nuk bënë, s’ka barazi pa reciprocitet me Serbinë.
“Unë iu kam shkruar letër të gjitha qeverive të Bashkimit Evropian dhe jo vetëm, ku kam renditur 11 shkeljet që po i bën Serbia me barriera sistematike dhe sporadike. Unë po i pres përgjigjet e tyre dhe reciprociteti do të vendoset për shkak se nuk ka ndryshe, s’ka barazi pa reciprocitet. Mirëpo, me ministren tonë të Ndërmarrësisë, të Industrisë dhe të Tregtisë, Rozeta Hajdari dhe me doganat tona po përgatitemi që ta zbatojmë me sukses atë, sepse asnjë qeveri e më hershme nuk ka zbatuar reciprocitet. Ne kur ta zbatojmë reciprocitetin, nuk guxojmë të dështojmë.”
