Policia maqedonase arreston katër persona për blerje të votave

Policia maqedonase ka arrestuar katër persona të dyshuar për blerje të votave për zgjedhjet lokale që do të mbahet nesër më 17 tetor.

Ministria e Punëve të Brendshme, ka njoftuar se personat janë arrestuar sot në lagjen Dracevë të Shkupit, derisa po u shpërndanin njerëzve para në këmbim të votës.

Me këtë rast, raporton RFE, Policia ka konfiskuar 121 mijë denarë (2 mijë euro) dhe 250 euro.

“Të ndaluarit akuzohen për veprën penale ‘ryshfet në zgjedhje dhe votim’. Rasti i ka kaluar Prokurorisë publike për procedim të mëtejmë”, thuhet në njoftimin e MPB-së.

Ndërkohë, Policia ka njoftuar për arrestimin edhe të një personi tjetër në qytetin e Prilepit për kërcënim ndaj një kandidati për kryetar të komunës.

I ndaluari i moshës 21-vjeçare në procedurë urgjente është dënuar me tetë ditë burgim.

Sot, të drejtën e votës e kanë shfrytëzuar të burgosurit, të moshuarit me sëmundje kronike, personat me invaliditet si dhe të infektuarit me koronavirus.

Ndryshe, nesër 1.824.863 qytetarë me të drejtë vote në Maqedoninë e Veriut zgjedh kryetarët e 80 komunave dhe këshillave komunalë, si dhe kryetarin e Shkupit, që është njësi e veçantë e pushtetit lokal. Në garë janë 10.653 kandidatë të partive politike, koalicioneve si dhe kandidatë të pavarur.

Gara kryesore, raporton RFE, zhvillohet mes dy blloqeve politike, LSDM-së dhe BDI-së që janë në pushtet, dhe partive opozitare VMRO-DPMNE, Aleanca për Shqiptarët dhe Alternativa.