Basha i përgjigjet Berishës/ Kuvendi, shkarkimi i Luan Baçit e Flamur Nokës, Vettingu në Politikë…
Politika shqiptare u sfumua e tëra nga “Foltorja” me demokratë sa as satelitët e Edi Ramës dhe Vettingu në Politikë i Lulzim Bashës nuk arritën ta thyejnë këtë vëmendje që sot mund të thuhet se ka tejkaluar të gjitha parashikimet. E tillë ishte dhe dalja e sotme publike e Kryetarit të PD, Lulzim Basha, për Komisionet Hetimore dhe pengesat që po i krijon Kryeministri Edi Rama, që pasoi me pyetjet që të gjitha kishin të bëjnë me akuzat e artikuluara të Presidentit Sali Berisha në “Foltore”.
S’ka Kuvend, ishte i prerë Lulzim Basha duke shtuar se Sali Berisha nuk ka ndonjë mbifuqi nga Statuti i partisë , shkarkimi i Luan Baçit u arsyetua me plotësim vakance, ai i Flamur Nokës për t’i paraprirë apo për të parandaluar përçarjen mes demokratëve, ndërsa arsyetimi pse po i besohet SPAK-ut për vettingun në politikë më mirë është as të mos lexohet dhe as të dëgjohet.
Kështu, Lulzim Basha në detaje foli për Komisionet Hetimore, atë masakrës zgjedhore të 25 Prillit, incineratorëve dhe Becchettit por interesi i gazetarëve që në fillimi sinjalizoi përqëndimin e vëmendjes tek “Foltorja”! “Se si e quan veten demokratike të propozojë që të vendosë SPAK për mandatet e deputetëve që është i Ramës, do të thotë të jesh skllav i tij,” ishte komenti i Sai Berishës nga “Foltorja” e mbrëmshme në Berat lidhur me nismën e PD me në krye Lulzim Bashën, i cili për dallim nga herët tjera është më konkret edhe kur është fjala me liderin historik të Partisë Demokratike:
“Duhet të themi edhe njëherë diçka për njerëzit, që nisma jonë nuk është e javës së kaluar, nisma jonë është e vitit 2018-të. Në vitin 2018-të, i gjithë Grupi Parlamentar i Partisë Demokratike dhe gjithë opozita e bashkuar kërkoi vettingun e politikanëve, depozitoi edhe me firmën e Sali Berishës, edhe me firmën e të tjerëve, në kuvend, amendamentet kushtetuese, kërkesën për vetting-un e politikanëve. Ky është fakti.
Pas kësaj, siç e dini, Edi Rama, për të vonuar procesin kërkoi dërgimin në Komisionin e Venecias. Ne pranuam. Komisioni i Venecias solli një përgjigje të cilën e kemi publikuar dhe besoj e dispononi në media që nga java e kaluar. Çfarë po ndodh sot është që ne tani kemi marrë të njëjtin propozim të firmosur nga opozita në shtator apo tetor të 2018-ës dhe kemi reflektuar të gjitha vërejtjet, kërkesat e Venecias. Kaq ka ndodhur. Unë i qëndroj firmës time të shtator apo tetor të 2018-ës. Nëse dikush tjetër i qëndron apo ka ndryshuar mendim, kjo është çështje e çdokujt tjetër. Unë dhe grupi parlamentar i Partisë Demokratike, me depozitimin që i kemi bërë kërkesës për vettingun e politikanëve, tashmë në përputhje dhe në zbatim të rekomandimeve të Komisionit të Venecias, nuk bëjmë gjë tjetër veçse konfirmojmë atë që kemi kërkuar prej 2018-ës, por siç e thashë të plotësuar me të gjitha aspektet që ka kërkuar Venecia të adresohen. Kjo dhe vetëm kjo është e vërteta. Dhe nuk ka asnjë tërheqje nga kjo,” tha Lulzim Basha duke shprehur mirëkuptim për frikën e kundërshtarit politik apo shqetësimet që mund të ketë, por tha se kjo nuk është ekspeditë ndëshkimore ndaj korrupsionit të Edi Ramës dhe ministrave të tij, ndonëse një ekspeditë e tillë është e fort-merituar.
“Jo, ne s’po themi që ta bëjmë ne vettingun. Kjo është, kjo nuk bëhet për ne, s’ bëhet për interesat tona politike, prandaj kemi thënë të fillojë nga ne të parët, nga unë i pari, por duhet të marrë fund rrotaxhilja e të bërtiturit në emër të reformës në drejtësi, ndërkohë që atë që kërkon për gjyqtarët dhe prokurorët ke frikë ta bësh për veten tënde. Vettingu për politikanët do të jetë publik dhe testi i çdo politikani, i çdo force politike qoftë ai është pikërisht qëndrimi ka ndaj procesit të vettingut të politikanëve.”
Në këtë sqarim, për të cilin Lulzim Basha mendoi se i dha përgjigje Sali Berishës, ai u përballë me pyetjen e radhës mbi deklaratat kundërthënëne mbi mbledhjen e Kuvendit Kombëtar të PD. Këtë radhë jo për kundërthënien Basha-Berisha por në mes të Kryetarit të PD, Lulzim Basha dhe Kryetarit të Grupit Parlamentar të PD, Alfred Rushaj, lidhur me mbledhjen e Kuvendit Kombëtar. Se kujt duhet ti besojnë demokratët, Bashës apo Rushajt, edhe pas përgjigjes së Kryetarit mbetën të pasqaruar vetëm se dëgjuan sërish se PD është me Amerikën.
“Ju duhet të besoni të vërtetën dhe e vërteta është fare e thjeshtë. Unë kam thënë që detyra e kryetarit të Partisë Demokratike, pra në këtë rast detyra ime është zbatimi i statutit. Dhe neni 3 i statutit është i qartë sa i takon drejtimit Euro-Atlantik të Partisë Demokratike, ndaj kam thënë dhe përsëris, që Kuvendi Kombëtar, që të marrë në shqyrtim vendimet e qeverisë Amerikane nuk ka për të pasur sa të jem unë kryetar i partisë dhe qëllimi të paktën për momentin është të përfundoj mandatin e dhënë nga shumica dërmuese e demokratëve duke e çuar këtë parti drejt objektivave të saj që është rrëzimi i regjimit të Edi Ramës, duke e çuar këtë parti drejt objektivave të saj që është rrëzimi i regjimit të Edi Ramës dhe sjellja e Partisë Demokratike në pushtet. Pra, këtë kam thënë dhe kësaj i qëndroj 100%. Tani, ajo që duhet t’iu habis ju është dhe këtu nuk ka ndonjë divergjencë me atë që thotë dhe zoti Rushaj. Ajo që duhet t’iu habis në fakt siç më ka habitur mua është që, njeriu që bërtet statuti, statuti, statuti, shpall dhe i jep vetes kompetenca që nuk i ka dhe s’mund t’i ketë me statut,” tha Basha por kur iu rikujtua Neni 43 i Statutit të PD dhe nëse ai do merret parasysh ai shtoi:
“Sali Berisha nuk ka ndonjë mbifuqi nga Statuti i partisë për të njoftuar apo thirrur asnjë institucion të partisë. Partia ka institucionet e saj dhe statut dhe procedurat si mblidhen institucionet janë të qarta. Sali Berisha mund të thërras institucione themelore, në përpjekjen e tij për ta bërë partinë bunker për hallet e tij personale, por demokratët kanë halle të tjera dhe prioritete të tjera, Shqipëria dhe shqiptarët kanë hallë të tjera dhe prioritete të tjera. Kuvend Kombëtar kam thirrur, thërras e do të thërras pa asnjë shqetësim, pa më të voglin shqetësim dhe hezitim sa herë që të ketë një çështje statutore për të vendosur apo për të vendosur, apo një vendim tjetër për të marrë. Por institucione paralele dhe bunker nuk thërras dot, sepse atë s’ma lejon statuti. Cilido qoftë, nëse ka çështje për diskutim t’i drejtohet institucioneve të partisë dhe jo bunkerit.”
Edhe kur pyetjet dolën nga kanali i “Foltores” dhe nuk iu dedikuan, nuk ishte e qartë pse por u përgjigj Lulzim Basha. Nënkryetarja e PD, Grida Duma në një debat televiziv duke folur vetëm për të një vërtetë, atë me fakte, tha se ekziston sepse mbledhjet me deputetët regjistrohen. E lutur të sqaroj deklaratën, ajo shpëtoi pa u shkarkuar por fjalën nuk ia dha Kryetari i cili vazhdoi:
“Jo nuk ka deklaruar këtë meqë ra fjala, është një nga keqinformimet e shumta për fat të keq që vijnë nga një hapësirë mediatike që për një kohë të gjatë ka qenë shpresa e demokratëve dhe shpresoj që dita mund të vij, ishallah vjen që të kthehet në shpresën e demokratëve, se për momentin me thënë të drejtën e shoh me trishtim dhe me dhimbje të madhe ku është katandisur. Nuk ka njeri besoj që nuk e kupton që çdo institucion i partisë ka procesverbale për çdo takim. Ka dhe mban qëndrimet e veta për çdo çështje, aq më shumë për çështjet e rëndësishme. Kështu që ky është një nga ato të tjerat spekulime fantastike të cilat nuk meritojnë sesa keqardhjen e thellë dhe shpresën dhe lutjen zotit, që t’iu kthejë qartësinë e mendjes dhe qetësinë e shpirtit për të mos shtrembëruar të vërtetat.”
Sa është fuqia eklipsuese e “Foltores” dëshmoi dhe rasti kur Basha u pyet pse nuk është bërë analiza për zgjedhjet e 25 Prillit që ishte premtuar për muajin shtator, a është bërë kjo analizë dhe në rastin e zotit Luan Baçi, përse nuk bëhen zgjedhje në Fier dhe emërohet një tjetër drejtues në qarkun e Fierit, meqenëse mbështetet edhe nga 95% e bazës!
“Në fakt mbështetja ka shkuar 97% tani që flasim. Ndërsa çështja e Luan Baçit nuk ka lidhje fare me këtë që thoni ju dhe me as me atë që është raportuar nga ndonjë hapësirë mediatike. Luan Baçi ka dhënë dorëheqjen një vit e gjysmë përpara, komandimi është bërë pikërisht në të mirë të mirëfunksionimit në atë degë, siç do të bëhet dhe në degë të tjera ku kemi vakanca të krijuara për shkak të përvaktimeve statutore dhe rregullave që rrjedhin nga këto përcaktime statutore siç ishte rasti i dualitetit, kandidat për deputet në këtë rast deputet dhe kryetar partie. Zoti Bardhi nuk e di nëse do të plotësoni diçka meqë është çështja e statutit,” tha Basha dhe natyrisht Sekretari i Përgjithshëm, Gazment Bardhi foli por mashtroi thuase vakancë ka vetëm në PD Dega Fier kur dihet që Luan Baçi u penalizua vetëm pasi mori pjesë në “Foltoren” e Fierit:
“Dhe në përputhje me statutin, sa kohë krijohen vakancat e deri në realizimin e procesit statutorë që nis në nivel seksioni për të shkuar tek Kuvendi i degës që zgjedh kryetarin e degës që është një proces që merr kohë më shumë se tre muaj. 3-6 muaj, kryesia e partisë ka ushtruar të drejtën që i jep statuti, quhet e drejta e ndërhyrjes për të komanduar deri në ndjekjen e kësaj procedure një kryetar të degës së Fierit si pasojë e vakancës së krijuar. Përsa i përjetë pyetjes mbi analizën e bërë në çdo degë, mund të konfirmojë që po analiza është kryer apo është dorëzuar nga secila degë pranë Sekretariatait Ekzekutiv të partisë dhe në mbledhjen më të parë të kryesisë do t’i prezantohet nga sekretariati analiza në nivel seksioni, grup seksioni dhe dege për të shkuar më pas edhe në procesin e brendshëm të organizimit të mëtejshëm të partisë.”
Pasi Lulzim Basha u shpreh se i qëndron firmës për vetting që kishte hedhur në vitin 2018, ai u pyet nëse i qëndron dhe deklaratës për SPAK se është kapur nga qeveria edhe sot kur kërkon që vettingun politik ta bëjë SPAK. Dhe jo vetëm kaq! Kur Sali Berisha u përjashtua nga Grupi Parlamentar, Basha e arsyetoi vendimin si kërkesë të SHBA. Kryetari i PD u pyet sot pse nuk e kishte respektuar kërkesat e SHBA që të mos djeg mandatet dhe të mos zgjedhjet lokale më 2019!
Përgjigja për SPAK është epike, për kërkesat e SHBA nuk ka emër por përgjigje nuk është:
“SPAK-u nuk po e bën punën. Po pikërisht që mos të fshihet pas preteksteve të ndryshme, se ndërkohë kemi depozituar me dhjetëra padi, duke përfshirë dhe masakrën zgjedhore, që mos të fshihet po i japim këtë instrument, që tani e detyron me afate të caktuara kohore, me strukturë të posaçme të bëjë vettingun e politikanëve, që është diçka që po jua përsëris, e duan e kërkojnë dhe e meritojnë të gjithë shqiptarët, të djathtë dhe të majtë, votues të mi dhe votues kundër meje. Këtu bashkohen të gjithë shqiptarët. Ndaj, për këtë arsye kjo strukturë që është votuar me 140 vota në nivel kushtetues dhe është votuar dhe në ligjin për SPAK-un nga Partia Demokratike, me ligjin për vettingun e politikanëve nuk është se po i japim besim, se besimin duhet ta justifikojë, por po i japim mundësinë të mos fshihet, po i japim shansin të fillojë të veprojë e të bëjë detyrën për të cilën është krijuar dhe për të cilën paguhet,” tha Lulzim Basha ndërsa përgjigje e dytë është rast për psikologun por në asnjë mënyrë përgjigje:
“Pyetja e dytë hedh poshtë çdo alibi, shpifje trillim të kundërshtarit tim politik që tani fatkeqësisht e dëgjoj nga goja e Sali Berishës ose disa pseudombështetësve të tij që merak të vetëm kanë nxjerrjen e inatit pavarësisht kostove që kjo i sjell demokratëve, sakrificave të demokratëve për të cilat në fakt ato se kanë ditur asnjëherë madje dhe në këto palë zgjedhje rrezik nuk kanë votuar ose kanë dalë kundër demokratëve. Tregon që kur bëhet fjalë për interesin e shqiptarëve unë jam peng vetëm i perëndisë, vetëm i zotit. Siç gjykoj që çdo njeri duhet të përpiqet që frikë të ketë vetëm zotin dhe asgjë tjetër. Dhe me thënë të drejtën zotit mund t’i kem hyrë në hak, por Sali Berishës jo. Për tre muaj kam bërë çmos me përpjekjen time dhe kam investuar gjithçka timen për ta zgjidhur këtë çështje. Jam ulur shumë herë me Sali Berishën për të arritur në një zgjidhje që ndihmonte atë dhe nuk dëmtonte PD. Në fakt kam pritur që siç kishte deklaruar vetë, këtë betejë ta bënte në mënyrë personale pa përfshirë as Partinë Demokratike dhe as grupin parlamentar të partisë Demokratike,” vazhdon dhe vazhdon Basha për ta gjetur fundin:
“Vendimi im ka qenë vendim i një lidershipi të përgjegjshëm ndaj demokratëve, vendim që nuk mund të shmangej, vendim që duhet ta merrja dhe jo të hiqesha mënjanë dhe të shikoja PD të zhytej në humnerë. Ky vendim është vendim i marrë. Është vendim i marrë jo për mua, për demokratët , është vendim që i qëndroj 100%.”
Nuk dihet nëse për shkak të klimës së krijuar në këtë dalje publike apo për shkak të numrit shumë të madh të pyetjeve jashtë linjës së partisë, Lulzim Basha nuk u përgjigj edhe kur u lut të sqaroi situatën komike që u krijua gjatë javës, pasi Kryeministri Edi Rama u shpreh se është i gatshëm të negocoi për ndryshime kushtetuese por jo për zgjatjen e vettingut sepse PD duhet ta votoj, “urdhër” të cilin e konfirmoi edhe Ambasadorja e SHBA në Tiranë, Yuri Kim:
“Ato që Edi Rama thotë nuk kanë lidhje me ato që Edi Rama bën. Këto tetë vite si kryeministër dhe këto 30 vite si politikan , kryetar bashkie, ministër, kryetar opozite, gjithmonë tjetër gjë ka thënë, tjetër gjë ka bërë . Kështu që kjo është dhe arsyeja se përse testi i parë dhe kryesor është paketa kushtetuese që ne po dërgojmë në kuvend dhe nga qëndrimi i Partisë Socialiste në Kuvend , të cilin ai e kontrollon qartësisht, pra nuk mund të fshihet siç u fsheh herën e parë pas pseudo-opozitës , do të jetë treguesi i parë për ju , për shqiptarët, natyrisht edhe për ne. Nëse do të bashkoj fjalët dhe veprat, apo do të vazhdojë avazin e vjetër që tjetër gjë thotë dhe tjetër gjë bën. Ne sigurisht i kemi gati skenarët në çdo rast,” tha Lulzim Basha duke shtuar se për çështjen e fatit të vetingut janë shprehur fare qartë këtë javë , bëri ftesë ti referohen atyre përgjigjeve sepse nuk lëvizin fare, asnjë presje atyre që kanë thënë, por për cilat “shpehje” e kishte fjalën nuk e mori vesh njeri.
Në morinë e pyetjeve vend gjeti dhe shkarkimi i deputetit Flamur Noka nga posti i Nënkryetarit të Komisionit për Sigurinë. Ndonëse ishte e qartë se shkarkimi erdhi pas debateve që kishte Bashën në mbledhjen e Kryesisë së PD dhe deklaratave publike kritike kundër tij, Kryetari i PD u pyet nëse do të kenë fat të gjithë ata që e kundërshtojnë:
“Ky është një rrëfim i rremë nga fillimi deri në fund që mundohet të ngulitet përmes hapësirave degraduara mediatike të cilat nuk i shërbejnë interesit publik as interesit të demokratëve, por interesave personale. Në ka njeri në 30 vite të hapur ndaj mendimit kritik, i cili ka përgjegjësi për të drejtuar këtë pari, ky jam unë. Por një gjë është mendimi kritik dhe një gjë tjetër është që me vetëdije apo jo t’i shërbesh Edi Ramës dhe interesave të Edi Ramës për të përçarë Partinë Demokratike. Dhe vendimi i fundit ka qenë pikërisht për t’i paraprirë apo për të parandaluar përçarje apo frymë përçarjeje mes demokratëve sepse interesat personale të askujt nuk mund të dalin dhe nuk do të dalin e nuk do të prevalojnë mbi interesat e Partisë Demokratike dhe demokratëve shqiptarë,” tha Lulzim Basha duke pataksë edhe elektoratin demokrat duke i thënë se Flamur Noka po i shërbek edhe Edi Ramës.
Dhe, sërish Sali Berisha. Pas paralajmërimit në foltore se do të ndërmarrë protesta kundër Kryeministrit Edi Rama, Basha u pyet nëse do t’i bashkohet këtyre protestave:
“Tani mos te futemi në cic-mice, por në qoftë se ju kujtohet në deklarimet e mia të para kam paralajmëruar që ne do të përdorim te gjitha format dhe mjetet për tu përballur me këtë regjim derisa të rikthejmë demokracinë dhe legjitimitetin duke përfshirë këtu protesta të cilat , për të cituar veten time meqë s’më cituat, i kemi bërë në më të mëdhatë që ka njohur ndonjëherë ky vend dhe mos të keni asnjë dyshim që jemi gati ti bëjmë dhe do ti bëjmë,” tha Kryetari i PD, Lulzim Basha, i cili komentoi dhe deklaratën e liderit historik Sali Berisha se është gati të bëhet Kryetar i Partisë Demokratike nëse vendosë anëtarësia:
“Kryetari i Partisë Demokratike është zgjedhur sipas statutit. Armiku i demokracisë shqiptare është regjimi i Edi Ramës. Shpresa e vetme për t’u përballur është Partia Demokratike dhe unë nuk kam ndërmend të harxhoj as edhe një sekondë kohë më shumë se sa është e nevojshme të merrem me asnjë reflektim apo çorientim, apo tollovi apo përpjekje për të përçarë Partinë Demokratike që i shërben vetëm Edi Ramës. Ky është komenti.”
Deklaratë
Të nderuar bashkëqytetarë që na ndiqni përmes medias, të nderuar përfaqësues të medias.
Në aksionin e saj politik në nisje të parlamentit, ndër të tjera Partia Demokratike ka kërkuar ngritjen e 3 komisioneve hetimore, një komision hetimor për masakrën zgjedhore, një komision hetimor për inceneratorët e mafies së plehrave dhe një komision hetimor për çështjen Becheti.
Siç e keni ndjekur, Komisioni Hetimor për Masakrën Zgjedhore është ngritur, dhe pavarësisht përpjekjeve për ta sabotuar atë, ai vijon dhe ne do ta çojmë deri në fund zbardhjen e plotë të gjithçka që ka ndodhur me votën e shqiptarëve, të çdo aspekti të masakrës zgjedhore të 25 prillit. Kjo sepse është një parakusht për të ecur me hapat e tjerë. Ose thënë ndryshe sepse shqiptarët nuk meritojnë përsëritjen e shkrirjes së shtetit me partinë, krimin me oligarkinë, si nyja që është mbledhur në fytin e demokracisë, por dhe në fytin e çdo shqiptari. Se pa demokraci, nuk ka ekonomi, nuk ka punësim, nuk ka drejtësi. Kështu që mbetet një prioritet absolut i yni dhe do të vazhdojë pavarësisht prej pengesave që të jem fare i sinqertë me ju, i keni pritur, me siguri parashikuar dhe ju, por që nuk do të lejojmë në asnjë moment ta ndalim punën e këtij komisioni.
Po të shikojmë dy komisionet e tjera, komisionin për inceneratorët dhe komisionin për Bechettin, po vonohen, po sabotohen nga Edi Rama me pretekste sa të gënjeshtërta aq edhe acaruese për njerëzit që e kuptojnë fare mirë se çfarë fshihet pas tyre. Edhe në këtë rast dua të jem fare i qartë: siç po përpiqen të sabotojnë komisionin për masakrën zgjedhore dhe nuk kanë për t’ia dalw, nuk kanë për t’ia dalë edhe në ndaljen e përpjekjes tonë për dy komisionet e tjera hetimore.
Në rastin e mafies së inceneratorëve po kërkojnë riformulim të kërkesës tonë dhe riformulimi nuk është në mirëbesim, por është një përpjekje për të kthyer hetimin ndaj mafies së inceneratorëve të plehrave, në një pseudo grup pune për mjedisin, kur të gjithë e dimë që mjedisin e ndotin, siç bëjnë gjatë verës që të çojnë para tek inceneratorët, afro 800 milion euro ishte shifra e cituar dje, e shpenzuar për këtë qëllim. Pra, me të njëjtën lehtësi kriminale që i vunë flakën plehrave në Lushnje, në Fier, në Vlorë, e kudo tjetër, në Durrës, që pastaj t’i justifikonin firmat e kryebashkiakëve që lekët tuaja, lekët e shqiptarëve, t’ia jepnin mafies së inceneratorëve, me të cilat pastaj i ndajnë, me të njëjtën lehtësi tani mendojnë se do të ndalin apo do të ndryshojnë natyrën e këtij komisioni hetimor në një grup pune për ambientin.
Dhe dje, halli i tyre sa i përket këtij komisioni hetimor, u shpalos me atë telenovelën e shëmtuar të Edi Ramës me uzurpatorët e krerëve të bashkive që kishte një dhe vetëm një qëllim: që t’i çojnë mbetjet tek inceneratorët. E gjitha ajo batërdisje që iu bë atyre, ka vetëm një qëllim, që mbetjet të shkojnë tek inceneratorët me pronarë offshorë dhe paratë e qytetarëve t’i furnizojnë llogaritë e tyre bankare sekrete në parajsa fiskale, siç ka filluar edhe të shpaloset përmes letrave të pandorës e do të vazhdojw të shpaloset edhe në mekanizma të tjerë, sepse është një e vërtetë që nuk mund të fshihet dot. Është tepër e madhe. Eshtë një minare që s’ka thes ta fshehë.
Për Komisionin Bechetti, që është tema kryesore me të cilën dua ta nis këtë bashkëbisedim sot, e keni parë se sa i prerë në çdo kuptim të fjalës është treguar duke bërtitur se duhet ta harrojmë ngritjen e komisionit Bechetti sepse sipas tij, vendimi është i mbuluar nga kofidencialiteti dhe publikimi i vendimit do të dëmtonte interesat e Shqipërisë. Pra, me fjalë të tjera po thotë: afera e Bechetti-t nuk hetohet dot se është kofidenciale. Ngaqë është kofidenciale nuk mund ta hetoni. Sepse po ta hetoni do dalw ai, Erion Veliaj dhe Engjëll Agaçi. Thjesht dhe shkurt për çdo shqiptarë: Komisioni hetimor nuk është diçka për të cilën opozita ka nevojë për dakordësinë e qeverisë. Kushtetuta e Shqipërisë thotë: Kur 28 deputetë kërkojnë Komsiion Hetimor, Komisioni Hetimor miratohet, pikë. Ky thotë nuk do ta hetoni ju këtë sepse është kofidenciale dhe dëmton interesat e shqiptarëve.
Që Edi Rama gënjen, nuk përbën lajm. Nuk ka besoj njeri në botë që se ka kuptuar, në Shqipëri jo e jo, por duke qenë se bëhet fjalë për një dëm 120 milionë euro apo më shumë, fshehja e tij pas sekretit apo kofidencialitetit siç e quan, është qesharake, sepse vendimi në fakt është “fshehur” në hapësirën më sekrete të botës që quhet, internet. Ja ku është vendimi, klikohet linku, (tregon linkun) edhe një 6 vjeçarëe gjen që vendimi sekret i Edi Ramës në fakt është në internet. Ja ku e keni vendimin e plotë. (tregon ekranin) Në çdo rast ne do ta publikojmë, për të gjithë qytetarët, sepse paratë me të cilat do të paguajw ky këto 120 milion euro, do të dalin nga xhepat e të gjithë shqiptarëve. Ky është vendimi që Edi Rama thotë se është sekret.
Kaq sekret është, saqë me një smartphone, me lidhje interneti, kudo ku të jeni në këtë moment, në shtëpi apo në një ambient ku ka internet, klikoni linkun dhe iu del vendimi i cili përcakton qartë se për shkak të luftës personale të Edi Ramës me Bechettin, ne shqiptarët, ju do t’i paguani 120 milion euro. Po çfarë thotë ky vet, dëgjojeni pak çfarë thotë. (tregon video me deklaratën e Ramës). E dinte fare mirë që vendimi është përfundimtar. Kur ka bërë këtë deklaratë Edi Rama e dinte fare mirë edhe për faktin se studiot ligjore ia kanë konfirmuar dhe vazhdon të gënjejë edhe sot duke prodhuar justifikime për të fshehur të vërteta, që siç ua thashë, një 10-vjeçar me një telefon smart në dorë i gjente në internet. Edhe njëherë videon. (video me deklaratën e Ramës)
Tani pyetja është: Pse gënjen kur i ka të gjitha faktet kundër? Dhe faktet janë të publikuara në internet, nuk do ndonjë mund të madh për t’i zbuluar. Pse gënjen? Pse në kundërshtim me të drejtën Kushtetuese të opozitës kërkon të pengojë ngritjen e Komisionit Hetimor për çështjen Beketti? Që të kontrollojë paligjshmërinë e veprimeve të tij, të mosveprimeve të institucioneve shtetërore dhe të funksionarëve publikë që kanë sjellë si pasojë vendimin e arbitrazhit? Pse vazhdon të gënjejë me gjoja sekretin e një dokumenti që është publik? Pse?
Arsyeja si fillim është shuma e frikshme, 120 milionë euro. Është një shumë që ai dhe shpura e tij me veprimet e tyre kriminale ia kanë vendosur në kurriz çdo shqiptari. Kanë filluar ndërkohë ta paguajnë me taksat që u marrin shqiptarëve. Janë 120 milionë euro të vendit më të varfër në Europë. Nuk po shkojnë as për infrastrukturë, as për ujësjellës, as për çerdhe, as për çerdhe, as për shkolla. Nuk po shkojnë as për pensionistët, nuk po shkojnë as për ndihmën e ekonomike për shtresat në nevojë, as për kompensimin e pronarëve apo të përndjekurve dhe shumë e shumë çështje të tjera të domosdoshme për familjet shqiptare që janë sot në darën e çmimeve që rriten ditë për ditë, por po shkojnë tek një njeri: Francesko Bechetti të cilit i shpalli luftë personale bashkë me Erion Veliajn dhe për shkak të luftës së tij personale, këto para në vend që të shkojnë tek ata njerëz, do të shkojnë në xhepat e një njeriu.Prandaj del del e thotë harrojeni komisionin hetimor. Harrojeni thotë!
Në vend që paratë të shkojnë tek qytetaret, paratë do të dalin nga xhepat e qytetarëve për të mbuluar gropën që ka hapur ky. Harroje thotë ndërkohë që 120 milionë euro, siç mund ta mbani mend sidomos ju që keni mbuluar pandeminë, janë baras me ato gjysmë paketat që ofroi vitin e kaluar. Tani i merr një njeri i vetëm. Aq ishin, 60 milionë e para, 60 milionë e dyta afërsisht. Harroje thotë ndërkohë që FMN-ja konfirmoi dje që kemi vdekshmërinë më të lartë në Europë prej pandemisë, ndërkohë që ky flet për histori suksesi.Harrojeni thotë Komisionin Hetimor, ndërkohë që këto 120 milionë euro do t’ju hiqen njërëzve, do t’i hiqen bukës së fëmijëve të shqiptarëve, do t’i hiqen ilaçeve të të sëmurëve, do t’i hiqen familjeve me fëmijë të sëmurë nga leuçemia, që siç e keni parë nuk kanë ilaçe për t’i trajtuar. Mediat e kanë mbuluar dhe i përgëzoj, këtë krim të shëmtuar.
Nuk kanë para për të blerë ilaçe për fëmijët e sëmurë me leuçemi sepse paratë po hiqen për të shkuar tek Bechetti. E keni dëgjuar besoj dëshmitë e nënave, s’ka nevojë të zgjatem shumë se dhimbja flet vetë, që shpenzojnë miliona e zhyten në borxh për fëmijët në mungesë të barnave në spitale. Pse? Sepse ky do i çojë lekët, dhe po i çon lekët tek Bechetti. Gjejeni pak kronikën e Zërit të Amerikës dhe shikoni zhytjen e familjeve në borxhe për të blerë ilaçe, jo bukë dhe as këpucë, por ilaçe për fëmijët e tyre, ndërkohë që ky u merr 120 milionë euro nga taksat e tyre për të paguar Bechettin. Ky që tha që nuk do marrë asnjë lek Bechetti.
Ky ta harrojë që ne do ta harrojmë ketë Komision Hetimor sepse kjo mynxyrë duhet zbardhur, duhet hetuar dhe përgjegjësit do të marrin faturën e merituar financiare, penale dhe të gjithanshme. Sepse për fat të keq ndonëse janë këta përgjegjësit paratë që po konfiskohen janë paratë e shqiptarëve, brenda dhe jashtë vendit. Janë paratë e fermerëve që punojnë nga mëngjesi deri natën në fusha, janë paratë e grave që punojnë në fasoneri, janë paratë e taksave të sipërmarrësve shqiptarë që janë sot më të drobiturit në Ballkan, për të mos folur për Europën. Janë paratë e orareve të zgjatura të inxhinierëve, të profesionistëve, të punëtorëve, të baballarëve të studentëve dhe të vogëlushëve shqiptarë. Me këto para ky paguan Bechettin.
Këtë dëm të madh e kanë bërë 3 persona të cilët sot përpiqen të fshihen pas vendimit duke e deklaruar vendimin top-sekret.
Por vendimi është në internet dhe një vendim në internet nuk mund të jetë një vendim top-sekret. Ndaj kuptohet qartë që edhe mbyllja e medias së Bechettit ka qenë e motivuar politikisht dhe vendimi është marrë me vetëdije që të shkelet ligji për qëllime politike.
Ndaj për këtë arsye përgjegjësia është e qartë, është e Edi Ramës e Erion Veliajt dhe e Engjëll Agaçit siç është specifikuar edhe në kërkesën tonë për komisionin hetimor. Emrat e tyre janë të rreshtuar në vendimin e Gjykatës së Arbitrazhit në Shtetet e Bashkuara të Amerikës. Janë të rreshtuar për demin e madh që i kanë bërë interesave të shtetit shqiptar, interesave të taksapaguesve shqiptarë, jo vetëm në aspektin ekonomik por edhe sa i përket investimeve të huaja dhe sa i përket lirisë së medias duke u shprehur në përfundim se: “Vendimet e sekuestrimit ishin kulmi i njw fushate politike kundër Bechetit”- thotë Gjykata e Arbitrazhit në Shtetet e Bashkuiara të Amerikës. Ky është citim.
Pra janë presionet e Edi Ramës , Erion Veliajt dhe Engjëll Agaçit që na kanë dhënë këtë faturë marramendëse që bashkuar me paaftësinë, korrupsionin, koncensionet, PPP-të që e kanë rreckosur këtë shtet e bëjnë të detyrueshme, të paevitueshme ngritjen e Komisionit Hetimor, për të çuar përgjegjësit aty ku e kanë vendin. Sepse ky që sokëllin, që do të ndalë këtë komision, jo sepse dëmton interesin e shtetit shqiptar, por sepse e ndihmon interesin e shtetit shqiptar, por dëmton interesat e tij, që për një luftë personale i ka hapur një tjetër gropë prej 120 milionë euro qytetarëve shqiptarë, arkës së shtetit, buxhetit të shtetit. Prej afro një jave jeni dëshmitarë të përpjekjeve tona për të çuar përpara tre kërkesat tona për komisionet hetimore.
Ne kemi informacione të plota se kërkesa për të mos miratuar Komisionin Bechetti është urdhër i drejtpërdrejtë i Edi Ramës dhe Taulant Ballës dhe kjo tregon po kështu se si funksionon shteti shqiptar, ku është katandisur shteti shqiptar. Ndaj në kontakt edhe me partnerët ndërkombëtarë dhe të vendosur për ti shkuar deri në fund kësaj afere, sot e në ditët në vijim ne do të ndërmarrim të gjitha hapat e nevojshëm që komisioni hetimor Becheti të përfundojë me ngritjen e tij dhe të nisë një orë e më parë nga puna për të zbardhur para shqiptarëve këtë aferë të tmerrshme dhe përgjegjësit e kësaj afere dhe për ti çuar ata para drejtësisë.
Ndërkohë që java e ardhshme është java e fundit e zemërgjerësisë opozitare për riformulimin e kërkesës për inceneratorët, riformulim që ta shndërrojë komisionin hetimor për inceneratorët, grup pune për mjedisin nuk ka për të pasur. Nuk ka për të pasur asnjë milimetër tërheqje sepse nuk po bëjmë dhe nuk po kërkojmë asgjë për veten tonë por vetëm për interesin publik. Mafia e inceneratorëve, aktiviteti i tyre shkatërrimtar për buxhetin e shtetit , për shëndetin e shqiptarëve, por edhe për ambientin dhe lidhjet e tyre me politikën dhe faktorë të tjerë të fuqishëm ekonomiko-mediatik do të hetohen deri në fund.
