Kolumbi, arrestohet trafikantin më të kërkuar të drogës
Trafikanti më i kërkuar i drogës në Kolumbi dhe udhëheqësi i bandës më të madhe kriminale në këtë shtet është arrestuar.
Dairo Antonio Úsuga, i njohur si Otoniel, është kapur dje gjatë një operacioni të përbashkët të ushtrisë, forcave ajrore dhe policisë, raporton RFE. Qeveria kishte ofruar 800,000 dollarë shpërblim për informacionet rreth vendndodhjes së tij, ndërkaq Shtetet e Bashkuara kishin ofruar pesë milionë dollarë për kokën e tij.
Presidenti i Kolumbisë, Iván Duque përmes një mesazhi televiziv lavdëroi autoritetet për kapjen e Otonielit.
“Kjo është goditja më e madhe kundër trafikimit të drogës në shtetin tonë në këtë shekull. Kjo goditje mund të krahasohet vetëm me rënien e Pablo Escobarit në vitet e 90-ta”, tha ai, raporton BBC.
Otoniel u kap në provincën Antioquia në veriperëndim të Kolumbisë, që gjendet pranë kufirit me Panamanë. Ai kishte përdorur një rrjet të shtëpive të sigurta për të lëvizur dhe për të shmangur arrestimin. Sipas autoriteteve, ai nuk kishte përdorur telefon celular, por kishte përdorur korrierët e tij për të komunikuar. Megjithatë, sipas gazetës El Tiempo, vendndodhja e tij u zbulua rreth dy javë më parë.
Në operacionin për kapjen e tij u përfshin 500 ushtarë, të mbështetur nga 22 helikopterë. Një zyrtar policor u vra gjatë këtij operacioni.
Sipas shefit të policisë, Jorge Vargas, lëvizjes e tij ishin gjurmuar përmes imazheve satelitore. Agjencitë e Mbretërisë së Bashkuar dhe Shteteve të Bashkuara kishin qenë të përfshira në operacionin për gjetjen e Otonielit.
Otoniel, 50 vjeç, u bë kreu i Klanit të Gjirit, që më herët njihej me emrin Klani Usuga, pasi udhëheqësi i mëparshëm, vëllai i tij, u vra nga policia gjatë një bastisjeje gati dhjetë vjet më parë.
Autoritetet kolumbiane e cilësojnë këtë bandë si organizatën më të fuqishme kriminale në shtet, ndërkaq autoritetet në SHBA e kanë përshkruar atë si një organizatë “të armatosur rëndë dhe shumë të dhunshme”.
Banda, që operon në shumë provinca, ka shumë lidhje ndërkombëtare dhe është e përfshirë në kontrabandën e drogës dhe njerëzve, nxjerrjen e paligjshme të arit dhe zhvatje.
Banda e Otonielit, raporton RFE, kontrollon shumë rrugë që përdoren për trafikimin e drogës nga Kolumbia për në SHBA, por edhe në shtete të tjera, përfshirë edhe Rusinë.
Otoniel tani përballet me një sërë akuzash, përfshirë edhe trafikimin e kokainës në SHBA, vrasjen e zyrtarëve policorë dhe rekrutimin e fëmijëve. Ndaj tij, SHBA-ja kishte ngritur akuza më 2009 dhe ai përballet me mundësinë ekstradimit.
