Vdiq Dekomunistizimi, Rroftë Vettingu në Politikë!
nga Agim Popoci
Le roi est mort, vive le roi!/Lexo shqip: Mbreti ka vdekur, rroftë mbreti!/ Kështu lajmëtari po informonte për vdekjen e mbretit francez dhe mbretit të ri që tashmë ishte në fron.
Po kush është sot mbreti shqiptar?! Përkundër përplasjeve të mëdha politike, as Rama dhe as Basha, as Berisha dhe as Meta, por, Propaganda Komuniste! Ajo e cila mbolli në trurin e shqiptarëve vdekjen e kriminelit Enver Hoxha por jo edhe vdekjen e komunizmit! Largimin e kriminelit Ramiza Alia por jo edhe enverizmit! Vendosjen e sistemit shumëpartiak por jo dhe mendësinë e politikës shumëpartiake! Fajin e kishte Saliu sikur kur ishte ashtu dhe kur iku nga pushteti kur mungonte përparimi! Fillimi dhe suksesi i Reformës dhe Vettingut në Drejtësi edhe pse nuk pa njeri drejtësi të reformuar përveç se të spastruar nga njerëzit e Saliut dhe të paprekur nga ata të Enverit!
Dhe, së fundi dekomunistizimin e Shqipërisë i cili erdhi papritur, humbi nga faqja e dheut jo pa lënë gjurmë por pa dekomunistizuar asgjë! Kur shqiptarët hapën sytë, filluan të shikojnë vërdallë dhe u përballën me një tjetër realitet, pa e kuptuar se pse asgjë prej gjëje nuk po ju shërben. Vazhduan të ndjekin teknalitetet e nismës ligjore që u hodh në parlament dhe sërish u goditën nga propaganda që i shërbej dhe po i shërben sundimit të komunizmit në tokën shqiptare, i cili vetëm se u tha edhe sot, kujdes po vjen propozimi i radhës: Vettingu në politikë!
Kundërshtarët e Lulzim Bashës e hodhën poshtë këtë ide me argumentin se Vettingu në Drejtësi dështoi por askush nuk merr mundimin të sqaroi se si mund të dështoi një gjë që nuk ka nisur.
Për Edi Ramën, ama vetëm për Edi Ramën, Vettingu në Drejtësi që zbatohet me urdhër të tij mund të quhet histori suksesi kur del nga goja e burokratëve evropianë por jo dhe nga shqiptarët.
Por, për të nisur Reforma në Drejtësi e me të edhe Vettingu, hapi i parë duhej të ishte dekomunistizimi në mënyrë që të gjithë ata kriminelë me togë që i shërbyen regjimit komunist, të paktën të largohen nga sistemi i ri i drejtësisë.
Arsyet janë të shumta!
“Partia Demokratike është e angazhuar të çojë në Parlament ligjin për ndalimin e simboleve të komunizmit, dekomunistizimin e Shqipërisë, nderimin e plotë për heronjtë që dhanë jetën për një Shqipëri të lirë dhe demokratike por nga ana tjetër për të bërë të qartë se kurrë më nuk do të pranojmë rikthimin e të shkuarës së përgjakshme dhe të dhimbshme për të cilën shqiptarët kanë paguar çmimin më të shtrenjtë në Europë. Dhe kjo do të nisë me ndalimin e simboleve të komunizmit dhe portretit të gjakatarit Enver Hoxha,” tha më 5 Maj të vitit 2018, kryetari i PD, Lulzim Basha pas homazheve në varrezat e Dëshmorëve dhe memorialin e Përkujtimit të Viktimave të Komunizmit.
Sikur kjo të mos ishte propagandë sot Shqipëria do të ishte ndryshe e me të edhe Vettingu, KLP, KLGj, SPAK-u dhe sot edhe nisma më e re Vettingu në Politikë!
Në Shqipërinë e dekomunistizuar Kryeministri Edi Rama nuk do të krekosej siç bënte në dhjetorin e vitit 2018 me vettingun për politikanët që u propozua nga PD, se do ta pranonte sikur të përfshijë edhe pasuritë e anëtarëve të tjerë të familjes së një politikani, duke u kthyer në një “sitë” të njëjtë me atë të Vettingut në Drejtësi.
Ndonëse Komisioni i Venecias tha se qëllimi i propozimeve të opozitës është legjitim, ka boshllëqe në kushtetutshmëri dhe ftoi palët për dialog, Parlamenti i Edi Ramës rrëzoi draftin e Partisë Demokratike për Vettingun në Politikë, pavarësisht se opozita ishte kthyer në Parlament pas një bojkoti prej 6 muajsh dhe shqiptarët e shkretë edhe e besuan rikthimin e të vërtetës në tokën shqiptare!
74 vota kundër dhe 52 vota për këtë Projektligj nuk është dështim për shqiptarët por ngadhënjim i Propagandës Komuniste që po e çonte fundin e vitit 2018 me një Shqipëri të palëkundur komuniste, shumë më të fortë se në vitin 1991!
Kështu Vettingu në Drejtësi, KLP, KLGJ dhe kreu i SPAK çuan në harresë dekomunistizimin dhe vettingun në politikë pa e çuar nëpër mend se ai mund të rikthehet në menynë politike, dhe si të tillë do ta diskutojnë edhe shqiptarët!
Por, Propaganda Komuniste, ky mbret ndër shqiptarë që klithte në çdo përvjetor “Vdiq Dekomunistizimi” filloi ta fus këtë domosdoshmëri mortore në përditshmërinë e këtij populli që nuk po reagonte si me, ashtu dhe pa Enver Hoxhën!
Dhe, sërish hapi rrugë kjo lloj propagande që po gërryen shpirtin shqiptar! Kur një bashkëpunëtor i Sigurimit të Shtetit u zbulua ndër radhët e KLP, strukturë kjo e re e prodhuar nga Reforma në Drejtësi, dhe ajo ngeli duke u kontestuar vetëm nga kreu i Autoritetet të Dosjeve, iu hapën shumë rrugë si KPK, KPA ashtu dhe SPAK-ut që po ngurronte ta ndërtoj me sigurimsa piramidën drejtuese ndërsa po pritje krijimi i BKH-së!
Askush nuk do ta mendonte se emërimi i një toge të zezë të diktaturës komuniste në krye të strukturës më të lavdishme të Reformës në Drejtësi, SPAK, do të kalonte me indiferentizëm kaq të madh edhe pas rastit të sigurimsit Bujar Sheshi në KLP, por, rikthimi i “Vettingut në Politikë” në menynë politike po nga PD duke ia besuar këtë projekt kaq të rëndësishëm po këtij kreu të SPAK, tejkalon të gjitha parashikimet; Si të atyre që besuan në dekomunistizim ashtu dhe atyre që Vettingun në Politikë e kishin projektuar në kokën e tyre si varkë e shpëtimit të këtij vendi të mjerë që po fundoset!
Sot, kur Drafti i lançuar i Vettingut në Politikë po përtypet në gojën e çdo politikani, konstitucioanlisti ose analisti asimptomatik duke e futur në centrifugën e përplasjeve Basha-Berisha ndërsa Rama po bënë sehir, gjithçka mund të parashikohet për këtë nismë ligjore, por ky Projketligj, sikur të merren parasysh të gjitha vërejtjet e shoqatave të Drejtave të Njeriut, Qenëve e Maceve si dhe LGBTI-së, vetëm një gjë nuk do të prodhoj kurrë: Pastrimin e Politikës Shqiptare nga Sigurimi i Shtetit!
