Ambasada e SHBA: Escobar është duke punuar në dialogun Kosovë-Serbi

Ambasada e Shteteve të Bashkuara të Amerikës në Kosovë, ka uruar Zv/Ndihmës Sekretarin Gabriel Escobar, i cili edhe zyrtarisht tashmë është Përfaqësues Special i SHBA-së për Ballkanin Perëndimor duke theksuar se ai është duke punuar në dialogun Kosovë-Serbi të lehtësuar nga Bashkimi Evropian.

“Urime përfaqësuesit të ri special në Ballkanin Perëndimor, zëvendës ndihmës sekretarit Gabriel Escobar! Ai tashmë është duke punuar në dialogun Serbi-Kosovë të lehtësuar nga Bashkimi Evropian, duke siguruar aderimin e rajonit në BE dhe duke ushtruar presion ndaj krerëve të Bosnjës për të çuar përpara reformën dhe për të respektuar sovranitetin/integritetin territorial të BeH,” thekson Ambasada amerikane në Kosovë.

Ndryshe, të dielën Gabriel Escobar ishte për vizitë në Bosnje Hercegovinë, pas tensionimit të situatës në BeH. Para nisjes drejt Sarajevës, ai është shprehur se dëshiron t’u dërgojë mesazh qytetarëve të këtij vendi se nuk do të ketë luftë.