Me Raportuesen për Shqipërinë në PE, përfaqësuesit e PD: Në Shqipëri mungon sundimi i ligjit!
Në takim me Raportuesen për Shqipërinë në Parlamentin Europian, Isabelle Santos, përfaqësuesit e Partisë Demokratike shprehën shqetësimin e opozitës për mungesën e sundimit të ligjit të Shqipëri dhe aktet autoritariste të qeverisë. Një nga treguesit është shpërfillja e rekomandimit të institucioneve të BE për ligjin antidemokratik të mediave online, të cilin qeveria vazhdon ta risjellë në Parlament.
Nënkryetarët e PD, Alfred Rushaj dhe Jorida Tabaku informuan Raportuesen për Shqipërinë në PE me nismat reformuese të ndërmarra nga PD, duke nisur me vetingun e politikanëve dhe zyrtarëve të lartë, reformën zgjedhore dhe reformën administrative territoriale. “Të treja nismat janë në shërbim të qytetarëve për të arritur standardet europiane të zgjedhjeve të qeverisjes dhe të shërbimit ndaj qytetarëve,” u shprehën përfaqësuesit e PD.
Gjatë diskutimit, ata argumentuan se vettingu përbën një akt jetik për pastrimin e politikës nga pjesa e korruptuar dhe e lidhur me krimin e organizuar. Nënkryetarët Rushaj dhe Tabaku siguruan përfaqësuesen e Parlamenit Europian se procesi është parashikuar të kryhet sipas propozimeve të Komisionit të Venecias.
Raportuesja për Shqipërinë në PE, Isabelle Santos u shpreh se procesi i integrimit për Ballkanin Perëndimor është në fokusin e Parlamentit Europian dhe se hapat e ndjekura nga vendet kandidate do të ndiqen me imtësi. Ajo shprehu kënaqësinë për këtë takim me opozitën dhe përgëzoi PD për nismat parlamentare të ndërmarra.
Ndryshe, dje Raportuesja për Shqipërinë në Parlamentin Europian, Isabelle Santos zhvilloi një takim me përfaqësuesit e Partisë Socialiste, takim pas të cilit, Kryetari i Grupit Parlamentar të PS, Taulant Balla, shprehu mbështetjen e marrë për mbajtjen e Konferencës së Parë Ndërqeveritare, por konkretizimi i saj, tha ai, është në dorë të mosmarrëveshjes mes Maqedonisë së Veriut dhe Bullgarisë.
